ଭୁବନେଶ୍ୱର,୨ା୫(ବ୍ୟୁରୋ) : ଅନ୍ୟ ରାଜ୍ୟରେ ଫସିଥିବା ପ୍ରବାସୀ ଓଡ଼ିଆଙ୍କ ଘରବାହୁଡ଼ା ପାଇଁ ରାଜ୍ୟ ସରକାର ଏକ ନୂଆ ଅଭିଯାନ ‘ଅପରେଶନ ଶୁଭଯାତ୍ରା’ ଆରମ୍ଭ କରିଛନ୍ତି। ପ୍ରବାସୀଙ୍କୁ କିଭଳି ସୁରକ୍ଷିତ ଭାବେ ଓଡ଼ିଶା ଫେରାଇ ଅଣାଯିବ ଏବଂ ନିଜ ପଞ୍ଚାୟତରେ ୧୪ ଦିନ କ୍ୱାରାଣ୍ଟାଇନ୍ରେ ରଖାଯିବ ସେନେଇ ରାଜ୍ୟ ସରକାର ଏପରି ଅଭିଯାନ ଆରମ୍ଭ କରିଛନ୍ତି। ଶନିବାର ଏନେଇ ଆଇଟି ସଚିବ ମନୋଜ ମିଶ୍ର ସୂଚନା ଦେଇଛନ୍ତି। କେରଳରୁ ଟ୍ରେନ୍ ଯୋଗେ ୨୩ଟି ଜିଲାର ୧୧୫୦ ଜଣ ଓଡ଼ିଶା ଆସୁଛନ୍ତି। କେରଳରୁ ଏମାନେ ସମସ୍ତେ ସୁବିଧାରେ ଆସୁଥିବା ମନୋଜ ମିଶ୍ର ସୂଚନା ଦେଇଛନ୍ତି।
ଓଡ଼ିଶା ଆସୁଥିବା ୧୧୫୦ ପ୍ରବାସୀ ଓଡ଼ିଶାରେ ପହଞ୍ଚିବା ପରେ କିଏ କେଉଁଠିକୁ ଯିବେ ସେଠାକାର ଜିଲାପାଳଙ୍କୁ ସୂଚନା ଦିଆଯାଇଛି। ଗନ୍ତବ୍ୟସ୍ଥଳରେ ଓହ୍ଲାଇବା ପରେ ନିଜ ଜିଲାର ଗାଡ଼ିରେ ସେମାନଙ୍କୁ ନିଆଯିବ। ସେଠାରେ ପ୍ରବାସୀଙ୍କୁ ନିଜ ପଞ୍ଚାୟତରେ କ୍ୱାରାଣ୍ଟାଇନ୍ରେ ରଖାଯିବ। ଏହା ପୂର୍ବରୁ ପ୍ରବାସୀଙ୍କ ପାଇଁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି। ଅପରେଶନ ଟ୍ରେନ୍ ଷ୍ଟେଶନରେ ପହଞ୍ଚିବା ପରେ ସେଠାକୁ ବାହାର ଲୋକଙ୍କୁ ଯିବା ପାଇଁ ବାରଣ କରାଯାଇଛି। ଏପରିକି ମିଡିଆକୁ ମଧ୍ୟ ବାରଣ କରାଯାଇଛି। ଏ ସମ୍ପର୍କରେ ତଥ୍ୟ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ଯୋଗାଇ ଦିଆଯିବ। କେବଳ ରେଳ କର୍ମଚାରୀ, ସରକାରୀ ଅଧିକାରୀ ଓ ପୋଲିସ ଉପସ୍ଥିତ ରହିବେ।
