ଆସିକା,୨୮।୧୦(ଡି.ଏନ୍.ଏ.): ଗଞ୍ଜାମ ଜିଲା ଆସିକା ଥାନା ଅନ୍ତର୍ଗତ ପାଣ୍ଡିଆପଥରରେ ପୋଲିସ ଏନ୍କାଉଣ୍ଟରରେ ଟିଙ୍ଗିରି ଦୋରା(୩୨) ନାମକ ଜଣେ ଅପରାଧୀ ଆହତ ହୋଇଛନ୍ତି। ତାଙ୍କୁ ବ୍ରହ୍ମପୁର ଡାକ୍ତରଖାନାରେ ଭର୍ତ୍ତି କରାଯାଇଛି।
ସୂଚନାଯୋଗ୍ୟ, ଦୀପାବଳି ଅବସରରେ ଗାଁରେ କିଛି ଖେଳ ହେଉଥିଲା। ସେଠାରେ ଗାଁର ବଳରାମ ସେଠୀ (୨୨) ଠିଆ ହୋଇ ଖେଳ ଦେଖୁଥିଲେ। ଏହି ସମୟରେ ପି.ଶିବଶଙ୍କର ଦୋରା ଓରଫ୍ ଟିଙ୍ଗିରି ସେଠାକୁ ନିଶାଗ୍ରସ୍ତ ଅବସ୍ଥାରେ ଆସିଥିଲେ। ତାଙ୍କ ହାତରେ ଏକ ବନ୍ଧୁକ ଥିଲା। ସେହି ବନ୍ଧୁକରୁ ସେ ଗୁଳି ଚଳାଇଥିଲେ। ଫଳରେ ଗୁଳିଟି ଯାଇ ବଳରାମଙ୍କ ଗୋଡ଼ରେ ବାଜିଥିଲା।
ଖବର ପାଇ ପୋଲିସ ଗାଁରେ ପହଞ୍ଚିବାରୁ ପୋଲିସକୁ ଦେଖି ଟିଙ୍ଗିରି ଗୁଳି ଚଳାଇବାରୁ ପୋଲିସ ପାଲଟା ଗୁଳିଚାଳନା କରିଥିଲା। ଏଥିରେ ଅଭିଯୁକ୍ତଙ୍କ ପିଛା କରୁଥିବା ସବ୍ଇନ୍ସପେକ୍ଟର ବିଶ୍ୱଜିତ୍ ନାୟକ ଏବଂ କନଷ୍ଟେବଳ ପ୍ରଦୀପ ସାହୁ ମଧ୍ୟ ଆହତ ହୋଇଛନ୍ତି। ଆସିକା ଥାନାଧିକାରୀ ପ୍ରଶାନ୍ତ କୁମାର ସାହୁଙ୍କ ନେତୃତ୍ୱରେ ଏହି ଏନ୍କାଉଣ୍ଟର କରାଯାଇଥିଲା। ଏଥିରେ ଅଭିଯୁକ୍ତ ଟିଙ୍ଗିରିଙ୍କ ବାମଗୋଡ଼ ଆଣ୍ଠୁରେ ଗୁଳି ବାଜିଛି। ସେ ବ୍ରହ୍ମପୁର ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଅନ୍ୟପକ୍ଷରେ ଗାଁର ଯୁବକ ବଳରାମଙ୍କୁ ପ୍ରଥମେ ଆସିକା ଡାକ୍ତରଖାନା ଏବଂ ପରେ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
