କଟକ ଅଫିସ,୧୨।୨: ପୂର୍ବତନ ଡିଜିପି ପ୍ରଫୁଲ୍ଲ ଚନ୍ଦ୍ର ରଥଙ୍କ(୮୫)ର ହୃଦ୍ଘାତରେ ପରଲୋକ ହୋଇଯାଇଛି। କଟକ ବିଜୁ ପଟ୍ଟନାୟକ ଛକସ୍ଥିତ ବାସଭବନରେ ମଙ୍ଗଳବାର ଅପରାହ୍ନ ପ୍ରାୟ ୧ଟାରେ ସେ ଶେଷନିଃଶ୍ୱାସ ତ୍ୟାଗ କରିଥିଲେ। ଏହି ଖବର ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି। ସହରର ଅନେକ ବିଶିଷ୍ଟ ବ୍ୟକ୍ତି ତାଙ୍କ ବାସଭବନରେ ପହଞ୍ଚି ଶେଷ ଦର୍ଶନ କରିବା ସହ ଶୋକସନ୍ତପ୍ତ ପରିବାରବର୍ଗକୁ ସମବେଦନା ଜଣାଇଥିଲେ।
ବ୍ରିଟିଶ ଶାସନ କାଳରେ ଜିଲାପାଳ ଭାବେ କାର୍ଯ୍ୟ କରୁଥିବା ରମେଶ ଚନ୍ଦ୍ର ରଥଙ୍କ ପୁତ୍ର ହେଉଛନ୍ତି ପ୍ରଫୁଲ୍ଲ। ୧୯୩୪ ମସିହାରେ ଜନ୍ମ ଗ୍ରହଣ କରିଥିବା ପ୍ରଫୁଲ୍ଲ ୨୦ବର୍ଷ ବୟସରେ ଆଇପିଏସ୍ ପାଇଥିଲେ। ୩୫ବର୍ଷ ଚାକିରି ସମୟ ମଧ୍ୟରେ ସେ ଦୁଇଥର ଡିଜିପି ଦାୟିତ୍ୱରେ ରହିଛନ୍ତି। ପ୍ରଫୁଲଙ୍କ ବଡ଼ପୁଅ ସୁବ୍ରତ ରଥ ଆଇଏଏସ୍ ଚାକିରିରୁ ସ୍ବେଚ୍ଛାକୃତ ଅବସର ଗ୍ରହଣ କରି ବମ୍ବେର ଏକ ଘରୋଇ କମ୍ପାନୀରେ କାର୍ଯ୍ୟ କରୁଛନ୍ତି। ସେ ବମ୍ବେରୁ ଫେରିବା ପରେ କଟକ ସତୀଚଉରାସ୍ଥିତ ଶ୍ମଶାନରେ ପ୍ରଫୁଲ୍ଲଙ୍କ ଶେଷକୃତ୍ୟ ସମ୍ପନ୍ନ କରାଯିବ। ସାନ ପୁଅ ସାନୁ ରଥ ରାଜ୍ୟର ଜଣେ ପ୍ରତିଷ୍ଠିତ ଉଦ୍ୟୋଗୀ। ବଡ଼ଝିଅ ସାବିତ୍ରୀ ରଥ ଓଡ଼ିଶା ହାଇକୋର୍ଟରେ ଆଇନଜୀବୀ ଭାବେ କାର୍ଯ୍ୟ କରୁଥିବାବେଳେ ସାନ ଝିଅ ଗାୟତ୍ରୀ ରଥ ବିଦେଶରେ ରୁହନ୍ତି। ପ୍ରଫୁଲ୍ଲ ଚାକିରି ଜୀବନରୁ ଅବସର ନେବା ପରେ ପୋଲିସ ପାଇଁ ଉପାଦେୟ ଅନେକ ଆଇନ ପୁସ୍ତକ ସମ୍ପାଦନା କରିଛନ୍ତି।
