ପୁରୀ ଆର୍‌ଏମ୍‌ଏସ୍‌ ସେବା ସ୍ଥାନାନ୍ତରକୁ ବିରୋଧ
8:13 amFebruary 27, 2020 / 41

ପୁରୀ ଅଫିସ,୨୭ା୨: ପୁରୀ ରେଳ ଷ୍ଟେଶନରେ କାର୍ଯ୍ୟ କରୁଥିବା ରେଳ ଡାକ ସେବା ଖୋର୍ଦ୍ଧା ରୋଡ ସ୍ଥାନାନ୍ତରକୁ ଶ୍ରୀଜଗନ୍ନାଥ ସେନା ତୀବ୍ର ବିରୋଧ କରିଛି। ଏହାର ପ୍ରତିବାଦରେ ବୁଧବାର ସେନା ପକ୍ଷରୁ ଡାକ ସେବା କାର୍ଯ୍ୟାଳୟ ଆଗରେ ଟାୟାର ଜାଳି ବିକ୍ଷୋଭ କରାଯାଇଛି। ଏହି ନିଷ୍ପତ୍ତି ଯଥାଶୀଘ୍ର ପ୍ରତ୍ୟାହାର କରିବାକୁ ଦାବି କରାଯାଇଥିଲା। ଡାକ ବିଭାଗରେ କେତେଜଣ ଉଚ୍ଚପଦସ୍ଥ ଅଧିକାରୀ ଷଡ଼ଯନ୍ତ୍ର ପୂର୍ବକ ଏଠାରେ କାର୍ଯ୍ୟକ୍ଷମ ଥିବା ଡାକ ସେବାକୁ ବନ୍ଦ ଲାଗି ଚକ୍ରାନ୍ତ କରୁଛନ୍ତି ବୋଲି ସେନା ଆବାହକ ଆଇନଜୀବୀ ପ୍ରିୟଦର୍ଶନ ପଟ୍ଟନାୟକ ଗଣମାଧ୍ୟମକୁ କହିଛନ୍ତି। ଏହି ସେବା ଉପରେ କେବଳ ପୁରୀବାସୀ ନୁହେଁ, ଆଖପାଖ ଅଞ୍ଚଳ ତଥା ବାହାର ପର୍ଯ୍ୟଟକ ମଧ୍ୟ ନିର୍ଭର କରନ୍ତି। ଜରୁରୀ ଡକ୍ୟୁମେଣ୍ଟ ଅନ୍ୟ ସ୍ଥାନକୁ ପଠାଇବା ଲାଗି ଆରଏମଏସ ଉପରେ ନିର୍ଭର କରନ୍ତି। ଏହି ସେବା ଉଠିଗଲେ, ଜନସାଧାରଣ ନାହିଁ ନ ଥିବା ଅସୁବିଧାର ସମ୍ମୁଖୀନ ହେବେ। ପୂର୍ବରୁ ମଧ୍ୟ ଏହାକୁ ସ୍ଥାନାନ୍ତର ନେଇ ଚକ୍ରାନ୍ତ ହୋଇଥିଲା। ସେତେବେଳେ ଆମେ ଏହାକୁ ବିରୋଧ କରିଥିଲୁ। ଏବେ ପୁଣି ଏହାକୁ ଉଠାଇ ନେବା ଲାଗି ଚକ୍ରାନ୍ତ ଚାଲିଛି। ଶ୍ରୀଜଗନ୍ନାଥ ସେନା ଏହାର ବିରୋଧ କରୁଛି। ଆବଶ୍ୟକ ପଡିଲେ, ଆଗକୁ ଜନ ଆନ୍ଦୋଳନ କରାଯିବ। ଏ ନେଇ ସେନା ପକ୍ଷରୁ ହାଇକୋର୍ଟଙ୍କ ନିକଟରେ ଜନସ୍ବାର୍ଥ ମାମଲା ଦାୟର କରାଯିବ ବୋଲି ପଟ୍ଟନାୟକ କହିଛନ୍ତି। ଏହି ବିକ୍ଷୋଭରେ ପଟ୍ଟନାୟକଙ୍କ ସମେତ ସେନାର ଶତାଧିକ କର୍ମୀ ଯୋଗଦେଇଥିଲେ।