ଲିଙ୍କନ(ନ୍ୟୁଜିଲାଣ୍ଡ),୨୨।୧- ଫର୍ମରେ ଥିବା ଯୁବ ଓପନର ପୃଥ୍ବୀ ଶ’ଙ୍କ ଗୁରୁତ୍ୱପୂର୍ଣ୍ଣ ଯୋଗଦାନ ଯୋଗୁ ନ୍ୟୁଜିଲାଣ୍ଡ ଏ’ ବିପକ୍ଷ ପ୍ରଥମ ଅନ୍ଅଫିସିଆଲ ଦିନିକିଆ ମ୍ୟାଚ୍କୁ ଭାରତ ଏ’ ୫ ଉଇକେଟରେ ଜିତିନେଇଛି। ଆହତ ଶିଖର ଧାଓ୍ବନଙ୍କ ସ୍ଥାନରେ ପ୍ରଥମ ଥର ପାଇଁ ଦିନିକଆ ଦଳରେ ସ୍ଥାନ ପାଇବାର ଗୋଟିଏ ଦିନ ପରେ ୨୦ ବର୍ଷୀୟ ପୃଥ୍ବୀ ୩୫ ବଲରେ ୪୮ ରନ୍ର ଇନିଂସ ଖେଳିଛନ୍ତି। ତାଙ୍କ ଇନିଂସରେ ଥିଲା ୫ ଚୌକା ଓ ୩ ଛକା। ସେହିଭଳି ଜାତୀୟ ଟି୨୦ ଦଳକୁ ଫେରିବା ପରେ ସଞ୍ଜୁ ସାମସନ ୨୧ ବଲରେ ୩୯ (୩ ଚୌକା ଓ ୨ ଛକା) ରନ୍ ଓ ସୂର୍ଯ୍ୟକୁମାର ଯାଦବ ୧୯ ବଲରେ ୩୫ (୬ ଚୌକା ଓ ଗୋଟିଏ ଛକା) ରନ୍ର ଇନିଂସ ଖେଳିଥିଲେ। ୨୩୧ ରନ୍ର ବିଜୟଲକ୍ଷ୍ୟକୁ ପିଛା କରୁଥିବା ଭାରତ ଏ’ ୨୦ ଓଭର ପୂର୍ବରୁ ମ୍ୟାଚ୍ ଜିତି ନେଇଥିଲା। ପ୍ରଥମେ ବ୍ୟାଟିଂ କରିଥିବା ଘରୋଇ ନ୍ୟୁଜିଲାଣ୍ଡ ଏ’ ୪୮.୩ ଓଭରରେ ୨୩୦ ରନ୍ରେ ଅଲଆଉଟ୍ ହୋଇଯାଇଥିଲା। ଦଳ ପାଇଁ ରଚିନ ରବୀନ୍ଦ୍ର ୪୯, ଅଧିନାୟକ ଟମ ବ୍ରୁସ ୪୭ ଓ କୋଲେ ମ୍ୟାକ୍କୋନଚି ୩୪ ରନ୍ କରିଥିଲେ। ଭାରତ ଏ’ ପକ୍ଷରୁ ମହମ୍ମଦ ସିରାଜ ୩ ଉଇକେଟ ନେଇ ସଫଳତମ ବୋଲର ସାବ୍ୟସ୍ତ ହୋଇଥିବାବେଳେ ଅକ୍ଷର ପଟେଲ ଓ ଖଲିଲ ଅହମ୍ମଦ ୨ଟି ଲେଖାଏ ଉଇକେଟ ଅକ୍ତିଆର କରିଥିଲେ। ଜବାବରେ ୨୯.୩ ଓଭରରେ ୫ ଉଇକେଟ ହରାଇ ୨୩୧ ରନ୍ କରି ବିଜୟ ହାସଲ କରିଥିଲା। ଭ୍ରମଣକାରୀ ଦଳ ଲାଗି ପୃଥ୍ବୀ, ସାମସନ, ସୂର୍ଯ୍ୟକୁମାରଙ୍କ ଯୋଗଦାନ ଗୁରୁତ୍ୱପୂର୍ଣ୍ଣ ଥିଲା। ଏମାନଙ୍କ ଛଡ଼ା ମୟଙ୍କ ଅଗ୍ରଓ୍ବାଲ ୨୯, ଅଧିନାୟକ ସୁବମନ ଗିଲ ୩୦, ବିଜୟ ଶଙ୍କର ୨୦ ଓ କ୍ରୁନାଲ ପାଣ୍ଡ୍ୟା ୧୫ ରନ୍ କରିଥିଲେ। ଘରୋଇ ଦଳର ଜେମ୍ସ ନିଶାମ ୨ ଉଇକେଟ ନେଇଥିଲେ। ସିରିଜ୍ର ଦ୍ୱିତୀୟ ଅନ୍ ଅଫିସିଆଲ ମ୍ୟାଚ୍ ୨୪ ତାରିଖରେ ଖ୍ରୀଷ୍ଟଚର୍ଚ୍ଚଠାରେ ଖେଳାଯିବ।
