କଣ୍ଟାମାଳ, ୭ା୮(ଡି.ଏନ୍.ଏ): ବୌଦ୍ଧ ଜିଲା କଣ୍ଟାମାଳ ବ୍ଲକ ଅଇଁଳାଚୁଅଁା ଆଦର୍ଶ ବିଦ୍ୟାଲୟର ଅଶୋଭନୀୟ ନୀତିର ଶିକାର ହେଇଛନ୍ ଝନେ ନିରିହ ଆଦିବାସୀ ଛାତ୍ରୀ। ବିଦ୍ୟାଲୟରୁ ୧୨ କି.ମି. ଗଁାକେ ଯାଇ ପ୍ରଧାନଶିକ୍ଷକ ଛାତ୍ରୀକଁର ବାପାକେ ଟି.ସି ଦେଇଛନ୍। ଏନ୍ତାଥି ଛାତ୍ରୀ ଝନ୍କର ପାଠ୍ପଢ଼ାରେ ଗଁଠି ପଡ଼ିଛେ।
ସୂଚନା ଅନ୍ସାରେ କଣ୍ଟାମାଳ ବ୍ଲକ ବଡ଼ ଝାରମୁଣ୍ଡା ଗଁାର ଉପେନ୍ଦ୍ର ନାଏକ। ପରିବାର କହେଲେ ମାଏକିନା, ୪ ଝି’ ଆର ଗୁଟେ ପୁଓକେ ନେଇ ତାକର ସଁସାର। ପରିବାରଟା ଆଦିବାସୀ ସମାଜର ହେଇଥିଲାବେଲେ ଦୁଖ୍ସୁଖ କରି ଚଲୁଛନ୍। ଉପେନ୍ଦ୍ର ଦୁଖ୍ସୁଖ କରି ଉପରର ଦୁଇ ଝି’କେ ବିହା କଲେନ। ସବୁଥିରୁ ସାନ ହେଉଛନ୍ ରଶ୍ମିତା। ସେ ଥାନୀୟ ସ୍କୁଲରେ ୭ମ ଶ୍ରେଣୀ ପଢ଼ଲାବେଲେ ଅଇଁଳାଚୁଅଁା ଆଦର୍ଶ ବିଦ୍ୟାଲୟରେ ଭରତି ହେବାର ଲାଗି ପ୍ରବେଶିକା ପରୀକ୍ଷା ଦେଇ ପାସ କରିଥିଲେ। ଏନ୍ତାଥି ବାପା ଝି’ର ଉଚ ଶିକ୍ଷାର ଲାଗି ଶପନ ଦେଖିଥିଲେ। ହେଲେ ଗଲା ୩୧ ତାରିଖ ଉପେନ୍ଦ୍ର ଖେତେ କାମ୍ କରୁଥିଲାବେଲେ ହଠାତ୍ ଆଦର୍ଶ ବିଦ୍ୟାଲୟର ପ୍ରଧାନଶିକ୍ଷକ ଆଉର ଝନେ ଶିକ୍ଷକ ସଂଗେ ବଡ଼ ଝାରମୁଣ୍ଡା ଗଁାରେ ପୁହୁଁଚିଥିଲେ। ଝି’ର ହାତେ ବାପାକେ ଡକେଇ ପଠାଲେ। ଉପେନ୍ଦ୍ରକୁଁ ସେମାନେ ଝି’ ପଢ଼ି ନାଇଁଯିବାର କାରନ୍ ପଚରାଲେ। ଉତରରେ ଉପେନ୍ଦ୍ର ଝି’ ରଶ୍ମିତାର ଦିହିପା ଖରାପ ଥିଲା ଆର ଦିନେ ଦୁଇଦିନ୍ ଭିତରେ ପଢ଼ିଯିବା ବଲି କହିଥିଲେ। ହେଲେ ସେମାନେ ଗଁା ଖୁଲିରେ ନ ଉପେନ୍ଦ୍ରନୁ ଦସ୍ତଖତ ନେଇ ରଶ୍ମିତାର ଟି.ସି. ଧରେଇ ଦେଲେ। ସ୍କୁଲକେ ପଢ଼ି ନାଇଁଯିବାର ଲାଗି ତାର ନଁା କଟି ଯାଇଛେ। ଝି’ ଯେନ୍ଠାନେ ପଢ଼ବା ଅସ୍ବିଧା ହେଲେ ବୌଦ୍ଧ ଡିଇଓ ଅଫିସକେ ଯିବ ବଲି କହିଦେଇଗଲେ। ଏନ୍ତାଥି ଉପେନ୍ଦ୍ର ଉପେ ଶୂଇନ୍, ଆସେ ପାସେ ହାଇସ୍କୁଲ ବି ନଁାଇଁନ। ସପ୍ତମ ଶ୍ରେଣୀରୁ ରଶ୍ମିତା ଇଂଲିଶରେ ପଢ଼ି ଆସୁଛେ। ଏହେଦେ ଫେନ୍ ଓଡ଼ିଆରେ କେନ୍ଥେଇ ପଢ଼ବା ରଶ୍ମିତା ବି ଚିନ୍ତାରେ ପଡ଼ିଛେ। ଶିକ୍ଷା ବିଭାଗର ନିୟମ ହିସାବେ, ଛାତ୍ରୀଛାତ୍ର ବହୁତ୍ ଦିନ୍ ଧରି ସ୍କୁଲ ନାଇଁଗଲେ ଶିକ୍ଷକ ଅଭିଭାବକକୁଁ ଜନାବାର ନିୟମ ରହିଛେ। ହେଲେ ଇ ବାବ୍ଦେ ଉପେନ୍ଦ୍ରକୁଁ ଆଦର୍ଶ ବିଦ୍ୟାଲୟର ପ୍ରଧାନଶିକ୍ଷକ ଆଗ୍ତୁରା କିଛି ନାଇଁ ଜନେଇଥିବାର ସେ କହିଛନ୍। ଆଦର୍ଶ ବିଦ୍ୟାଲୟରେ ଭିନେ ଭିନେ କାରନ୍ରୁ ଚଲତି ଶିକ୍ଷା ବଛରରେ ୩୭ ଝନ୍ ଛାତ୍ରୀଛାତ୍ର ଟି.ସି. ନେଇ ସାରିଛନ୍। ହେଲେ କେନ୍ କାରନ୍ରୁ ଆର ପରିସ୍ଥିତିରେ ଇମାନେ ଟି.ସି. ନେଇଛନ୍, ସେମାନେ କେନ୍ ସ୍କୁଲରେ ପଢ଼ୁଛନ୍ କି ନାଇଁ ସେଟା ତଦଁତ୍ କରବାର ନିହାତି ଜରୁରି ଆଏ। ଇଆଡ଼େ ସ୍କୁଲରେ ଖାଲିପଡ଼ିଥିବାର ଜାଗାରେ ନୂତନ ଛାତ୍ରୀଛାତ୍ରକୁଁ ଭରତି କରାଯାଇଛେ। ସେମାନେ କେନ୍ ଆଧାରରେ ନଁା ଲେଖେଇଛନ୍ ଇ ବାବ୍ଦେ ବି ଖୋଲତାଡ଼ ହେବାର ନିହାତି ଜରୁରି ଆଏ ବଲି ବୁଧିଜୀବୀ ବହଲରେ ଦାବି ହେଉଛେ। ଇ ବାବ୍ଦେ ଆଦର୍ଶ ବିଦ୍ୟାଲୟର ପ୍ରଧାନଶିକ୍ଷକ ଶ୍ୟାମଲାଲ ଭୋଇକୁଁ ପଚରାଲାରୁ ବହୁତ୍ ଦିନ୍ ଧରି ସ୍କୁଲ ନାଇଁଗଲେ ଆମେ ଡାକ୍ରେ ବି ଟି.ସି. ପଠେଇ ଦେଉଛୁଁ ବଲି କହିଥିଲେ।
