ଭଞ୍ଜନଗର,୨୪।୨(ଡି.ଏନ.ଏ)-ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ବଡ଼ଗୁଣ୍ଡିରିବାଡ଼ି ଜଙ୍ଗଲରେ ଗତ ୧୪ ତାରିଖରେ ଏକ ହାତୀର ଗଳିତ ମୃତଦେହ ଠାବ କରାଯାଇଥିଲା। ମୃତଦେହ ଠାବ ହେବାର ପ୍ରାୟ ୧୫ ଦିନ ପୂର୍ବରୁ ହାତୀଟିର ମୃତ୍ୟୁ ଘଟିଥିବା ବ୍ୟବଚ୍ଛେଦ ରିପୋର୍ଟରୁ ଜଣାପଡ଼ିଥିଲା। ତେବେ ବନ କର୍ମଚାରୀମାନେ ଜଙ୍ଗଲକୁ ଠିକ୍ ଭାବେ ଯାଉ ନ ଥିବା ଜଣାପଡ଼ିଛି। କର୍ମଚାରୀମାନେ ଜଙ୍ଗଲକୁ ଯାଉ ନ ଥିବା, କର୍ମଚାରୀ ଓ ଅଧିକାରୀ, ବନ ସୁରକ୍ଷା ସମିତି (ଭିଏସ୍ଏସ୍ ) ଏବଂ କର୍ମଚାରୀଙ୍କ ମଧ୍ୟରେ ସମନ୍ବୟ ରହୁ ନ ଥିବା ସମ୍ପର୍କରେ ପୂର୍ବରୁ ‘ଧରିତ୍ରୀ’ରେ ଏକାଧିକ ଖବର ପ୍ରକାଶ ପାଇଥିଲା। ହାତୀ ମୃତ୍ୟୁ ସମ୍ପର୍କରେ ବନ ବିଭାଗ ନ ଜାଣିବା ଘଟଣା ଏହାକୁ ସତ ପ୍ରମାଣିତ କରିଛି। ଜଙ୍ଗଲକୁ କର୍ମଚାରୀ ନ ଗଲେ ହାତୀ ଓ ମଣିଷଙ୍କ ଜୀବନ ପ୍ରତି ବିପଦ ରହୁଛି। ବଡ଼ଗୁଣ୍ଡିରିବାଡ଼ିରେ ହାତୀ ମୃତ୍ୟୁ ପରେ ବିଭାଗ ପକ୍ଷରୁ ସମ୍ପୃକ୍ତ ବିଟ୍ର ବନପାଳ ଓ ବନରକ୍ଷୀଙ୍କୁ ନିଲମ୍ବିତ କରାଯାଇଛି। ହେଲେ ଭବିଷ୍ୟତରେ ଯେଭଳି ଏପରି ଘଟଣାର ପୁନରାବୃତ୍ତି ନ ହେବ ସେଥିପ୍ରତି ବନ ବିଭାଗର ଉଚ୍ଚ କର୍ତ୍ତୃପକ୍ଷ ପଦକ୍ଷେପ ନେବା ଆବଶ୍ୟକ ହୋଇପଡିଛି। ଉତ୍ତର ଘୁମୁସର ବନଖଣ୍ଡ ଜାତୀୟ ଓ ରାଜ୍ୟସ୍ତରରେ ଏକାଧିକ ଥର ଜଙ୍ଗଲ ସୁରକ୍ଷା ଓ ନୂତନ ଜଙ୍ଗଲ ସୃଷ୍ଟି ପାଇଁ ପୁରସ୍କୃତ ହୋଇଛି। ସେହି ପୁରୁଣା ଗୌରବକୁ ଫେରାଇ ଆଣିବା ପାଇଁ ପଦକ୍ଷେପ ନେବା ଆବଶ୍ୟକ। ଏହି ବନଖଣ୍ଡରେ ଅଧିକାରୀ ଓ ତଳିଆ କର୍ମଚାରୀଙ୍କ ମଧ୍ୟରେ ସମନ୍ବୟ ରହୁନାହିଁ। ଅଫିସରଙ୍କ ଅଲିଖିତ ନିର୍ଦ୍ଦେଶକୁ କେତେଜଣ ତଳିଆ କର୍ମଚାରୀ ମାନୁନାହାନ୍ତି। ଗ୍ରାମାଞ୍ଚଳରେ ଅନେକ କର୍ମଚାରୀ କର୍ମ କ୍ଷେତ୍ରରେ ରହୁନାହାନ୍ତି। ଫଳରେ ବନ୍ୟଜନ୍ତୁ ଯୋଗୁ ଫସଲ କ୍ଷତି ହେଲେ ଠିକ୍ ଭାବେ କ୍ଷତିପୂରଣ ମିଳିପାରୁନି। ଏ ନେଇ ଅକ୍ଟୋବର ୫ରେ ଧରିତ୍ରୀରେ ‘ଅଫିସରଙ୍କ ନିର୍ଦ୍ଦେଶ ମାନୁନାହାନ୍ତି କର୍ମଚାରୀ’ ଶୀର୍ଷକ ଖବର ପ୍ରକାଶ ପାଇଥିଲା। ସେହିପରି ଡିିସେମ୍ବରରେ ‘ହାତୀ ଗଁାରେ, କର୍ମଚାରୀ ସହରରେ’ ଶୀର୍ଷକ ଅନ୍ୟ ଏକ ଖବର ପ୍ରକାଶିତ ହୋଇଥିଲା। କର୍ମଚାରୀମାନେ ନିଜ କର୍ମ କ୍ଷେତ୍ରରେ ରହୁ ନ ଥିବା ଯୋଗୁ ଅନେକ ସମସ୍ୟା ଦେଖାଦେଉଛି। ଗତ ୨ ବର୍ଷ ହେବ ଜାଇକା ଅର୍ଥରେ ଏକ ସ୍ବେଚ୍ଛାସେବୀ ଅନୁଷ୍ଠାନକୁ ମଧ୍ୟ ବିଭିନ୍ନ କାର୍ଯ୍ୟକ୍ରମ ପାଇଁ ଦାୟିତ୍ୱ ଦିଆଯାଇଛି। ଏ ବାବଦରେ ବିପୁଳ ଅର୍ଥ ଖର୍ଚ୍ଚ ହେଉଛି। ଉକ୍ତ ଅନୁଷ୍ଠାନର କର୍ମଚାରୀ ମଧ୍ୟ ତତ୍ପର ହେବା ଆବଶ୍ୟକ ବୋଲି କେତେକ ଭିଏସ୍ଏସ୍ର କର୍ମକର୍ତ୍ତା ପ୍ରକାଶ କରିଛନ୍ତି।
