ନୂଆଦିଲ୍ଲୀ, ୨୮।୭- ଭାରତୀୟ ଡେଭିସ କପ୍ ଦଳ ଦୀର୍ଘ ୫୫ ବର୍ଷ ପରେ ପାକିସ୍ତାନ ଗସ୍ତ କରିବାକୁ ଯାଉଛି। ଏ ନେଇ ସର୍ବଭାରତୀୟ ଟେନିସ ଆସୋସିଏଶନ (ଏଆଇଟିଏ) ସାଧାରଣ ସମ୍ପାଦକ ହିରନମୟ ଚାଟାର୍ଜୀ ରବିବାର ସ୍ପଷ୍ଟ କରିଛନ୍ତି। ଆମେ ପାକିସ୍ତାନ ଗସ୍ତ କରିବୁ। ଏହା ଦ୍ୱିପାକ୍ଷିକ ସିରିଜ୍ ନୁହେଁ। ଟେନିସ କ୍ରୀଡ଼ା ଜଗତର ଏହା ବିଶ୍ୱକପ୍ ଇଭେଣ୍ଟର ଅଂଶ ହୋଇଥିବାରୁ ଆମକୁ ଯିବାକୁ ପଡ଼ିବ। ଏଥିନେଇ କେନ୍ଦ୍ର ସରକାରଙ୍କ ସହ ଆମଆଡ଼ୁ କୌଣସି ଯୋଗାଯୋଗ ହୋଇ ନାହିଁ। ୬ ଜଣ ଖେଳାଳି, ସପୋର୍ଟ ଷ୍ଟାଫ ଓ କୋଚ୍ଙ୍କ ସହ ମୁଁ ମଧ୍ୟ ପାକିସ୍ତାନ ଯିବି। ପାକିସ୍ତାନ ହକି ଦଳ ବିଶ୍ୱକପ୍ ପାଇଁ ଭାରତ ଆସିଥିଲା। ଏବେ ଆମେ ମଧ୍ୟ ଯାଉଛୁ ବୋଲି ଏଆଇଟିଏ ସମ୍ପାଦକ କହିଛନ୍ତି। ଡେଭିସ କପ୍ର ମୁକାବିଲା ଚଳିତ ବର୍ଷ ଫେବୃୟାରୀରେ ହେବାର ଥିଲା। କିନ୍ତୁ ପୁଲଓ୍ବାମା ଆତଙ୍କବାଦୀ ଆକ୍ରମଣ ପରେ ଭାରତୀୟ ଦଳର ପାକିସ୍ତାନ ଗସ୍ତ ଉପରେ ଅନିଶ୍ଚିତତା ସୃଷ୍ଟି ହୋଇଥିଲା। ଭାରତୀୟ କ୍ରିକେଟ ଦଳ ଅନ୍ତିମ ଥର ୨୦୦୭ରେ ପାକିସ୍ତାନ ଗସ୍ତ କରିଥିଲା। ଏହାପରେ କୌଣସି କ୍ରୀଡ଼ାଭିତ୍ତିକ ଦଳ ପାକିସ୍ତାନ ଯାଇନାହାନ୍ତି। ଏଆଇଟିଏ ଏ ପର୍ଯ୍ୟନ୍ତ ପଡ଼ୋଶୀ ଦେଶ ବିପକ୍ଷ ମ୍ୟାଚ୍ ଲାଗି ଦଳ ଘୋଷଣା କରିନାହିଁ। ଉଲ୍ଲେଖଥାଉ କି ଡେଭିସ କପ୍ରେ ପାକିସ୍ତାନ କଦାପି ଭାରତକୁ ହରାଇ ନାହିଁ। ଏ ପର୍ଯ୍ୟନ୍ତ ହୋଇଥିବା ୬ ଥର ମୁକାବିଲାରେ ଭାରତ ବାଜିମାତ୍ କରିଛି। ଅନ୍ତିମ ଥର ୨୦୦୬ରେ ମୁମ୍ବାଇସ୍ଥିତ ବ୍ରାବୋର୍ନେ ଷ୍ଟାଡିୟମ୍ରେ ଖେଳାଯାଇଥିବା ମ୍ୟାଚ୍କୁ ଆୟୋଜକ ଦଳ ୩-୨ ବ୍ୟବଧାନରେ ଜିତି ନେଇଥିଲା।
