ବ୍ରିସବେନ, ୨୫।୧୧- ଅଷ୍ଟ୍ରେଲିଆ ଗସ୍ତରେ ଥିବା ପାକିସ୍ତାନ କ୍ରିକେଟ ଦଳର କିଛି ଖେଳାଳି ଜଣେ ଭାରତୀୟ ଟ୍ୟାକ୍ସି ଡ୍ରାଇଭରଙ୍କ ସହ ମିଶି ଏକାଠି ଡିନର କରିଛନ୍ତି। ଯାହା ଏବେ ବେଶ୍ ଚର୍ଚ୍ଚାରେ ରହିଛି। ବ୍ରିସବେନରେ ଖେଳାଯାଇଥିବା ପ୍ରଥମ ଟେଷ୍ଟରେ ଘରୋଇ ଅଷ୍ଟ୍ରେଲିଆ ଏକ ଇନିଂସ ଓ ୫ ରନରେ ପାକିସ୍ତାନକୁ ପରାସ୍ତ କରିଥିଲା। ଏହି ମ୍ୟାଚ୍ ଅବସରରେ ପାକିସ୍ତାନ ଦଳର ୩ କ୍ରିକେଟର୍ ଶାହୀନ ଆଫ୍ରିଦୀ, ୟାସିର ଶାହ ଓ ନସୀମ ଶାହ ରାତ୍ରି ଭୋଜନ ପାଇଁ ବାହାରକୁ ଯାଇଥିଲେ। ଏହି ସମୟରେ ଜଣେ ଭାରତୀୟ ଟ୍ୟାକ୍ସି ଡ୍ରାଇଭର ୩ ପାକିସ୍ତାନ କ୍ରିକେଟର୍ଙ୍କୁ ଏକ ଭାରତୀୟ ରେଷ୍ଟୁରାଣ୍ଟକୁ ନେଇଥିଲେ। ଏହାପରେ ସେହି ଟ୍ୟାାକ୍ସି ଡ୍ରାଇଭର ପାକିସ୍ତାନ ଖେଳାଳିଙ୍କ ନିକଟରୁ ଗାଡ଼ି ଭଡ଼ା ନେବାକୁ ମନା କରିଦେଇଥିଲେ। ଫଳରେ ପାକିସ୍ତାନ କ୍ରିକେଟର୍ମାନେ ରାତ୍ରିଭୋଜନ ପାଇଁ ସେହି ଟ୍ୟାକ୍ସି ଡ୍ରାଇଭରଙ୍କୁ ନିମନ୍ତ୍ରଣ କରିଥିଲେ ଓ ପରେ ଏକାଠି ଖାଇଥିଲେ। ଏହି ଘଟଣାକୁ ଏବିସି ରେଡିଓର ଉପସ୍ଥାପିକା ଆଲିସନ ମିଚେଲ ମ୍ୟାଚ୍ ସମୟରେ ସାଥୀ ଭାଷ୍ୟକାର ତଥା ପୂର୍ବତନ ଅଷ୍ଟ୍ରେଲୀୟ ଦ୍ରୁତ ବୋଲର ମିଚେଲ ଜନସନଙ୍କ ସାମ୍ନାରେ ବଖାଣିଛନ୍ତି। ସଂଯୋଗକ୍ରମେ ସେହି ଭାରତୀୟ ଟ୍ୟାକ୍ସି ଡ୍ରାଇଭର ଆଲିସନଙ୍କୁ ଷ୍ଟାଡିୟମରେ ଛାଡ଼ିଥିଲେ। କାରରେ ଆସିବା ସମୟରେ ଡ୍ରାଇଭର ଜଣଙ୍କ ପାକିସ୍ତାନ ଖେଳାଳିଙ୍କ ସହ କିପରି ଏକାଠି ଡିନର କରିଥିଲା ତାହା ଆଲିସନଙ୍କୁ କହିଥିଲା।
