କେନ୍ଦୁଝର, ୩।୨(ସ୍ବ.ପ୍ର.)- କେନ୍ଦୁଝର ଜିଲାର ଗୁରୁତ୍ୱପୂର୍ଣ୍ଣ ଭୀମକୁଣ୍ଡ ପର୍ଯ୍ୟଟନ କେନ୍ଦ୍ରର ବିକାଶ ପାଇଁ ପ୍ରଶାସନ ପକ୍ଷରୁ ବ୍ୟାପକ ପଦକ୍ଷେପ ନିଆଯାଇଛି ା ଫଳରେ ପର୍ଯ୍ୟଟକଙ୍କ ଆଗ୍ରହ ବଢୁଛି। ଏଥିପାଇଁ ଏହି କେନ୍ଦ୍ରର ରକ୍ଷଣାବେକ୍ଷଣ ପାଇଁ ପଦକ୍ଷେପ ନେବା ସହ ଏଣ୍ଟ୍ରି ଫି ବ୍ୟବସ୍ଥା ଆରମ୍ଭ ହୋଇଛି। ଏହି ଏଣ୍ଟ୍ରି ଫି ଆଦାୟକୁ ଏକ ସଂସ୍ଥାକୁ ଠିକାରେ ଦିଆଯାଇଛି। ଏଥିପାଇଁ ସ୍ଥାନୀୟ ଯୁବକ ସଂଘ ଲକ୍ଷାଧିକ ଟଙ୍କା ଦେଇ ଏହି କାମ ନେଇଛି। ତେବେ ଏହି କେନ୍ଦ୍ରର ଚାରିପାଖରେ ଥିବା ଜଙ୍ଗଲର ସୁରକ୍ଷା କରାଯାଉ ନ ଥିବା, ରାସ୍ତା ନାମରେ ଜଙ୍ଗଲ କାଟି ସଫା କରାଯିବା ସହ ଜଙ୍ଗଲ ମଧ୍ୟରେ ବାଲି, ପଥର ଜମା କରାଯାଉଥିବାରୁ ପରିବେଶ ପ୍ରଦୂଷିତ ହେବା ସହ ବହୁମାତ୍ରାରେ ନଷ୍ଟ ହେଉଥିବାରୁ ପର୍ଯ୍ୟଟକମାନେ ଅସନ୍ତୋଷ ବ୍ୟକ୍ତ କରୁଛନ୍ତି ା ଏଠାକୁ ଜିଲା ଓ ଜିଲା ବାହାରୁ ପର୍ଯ୍ୟଟକ ଆସିଥା’ନ୍ତି ା ଏଣୁ ଏହି ଆକର୍ଷଣୀୟ ପର୍ଯ୍ୟଟନ କେନ୍ଦ୍ର ନିକଟରେ ଏଭଳି ପ୍ରଦୂଷଣ ଯୋଗୁ ଲୋକେ ଉଦ୍ବେଗ ପ୍ରକାଶ କରୁଛନ୍ତି ା ଏପରି କି ପର୍ଯ୍ୟଟକମାନେ ଭୋଜିଭାତ କରିବା ପାଇଁ ଏଠାକୁ ଆସୁଥିଲେ ହେଁ ଏହି ସବୁ ବାଲି, ପଥର ଜଙ୍ଗଲ ମଧ୍ୟରେ ଜମା ହୋଇଥିବାରୁ ବହୁ ଅସୁବିଧାର ସମ୍ମୁଖୀନ ହେଉଥିବା କହୁଛନ୍ତି। ଏହାଦ୍ୱାରା ଜଙ୍ଗଲର ସବୁଜିମା ନଷ୍ଟ ହେବା ସହ ଏହି ସ୍ଥାନର ମନୋରମ ଦୃଶ୍ୟ କ୍ଷତିଗ୍ରସ୍ତ ହେଉଛି ା ଏହା ନିକଟ ବୈତରଣୀ ନଦୀରେ ପୋଲ ନିର୍ମାଣ ହେଉଥିବାରୁ ଉକ୍ତ ପୋଲ ପାଇଁ ବ୍ୟବହାର ହେଉଥିବା ବାଲି, ପଥର ଇତ୍ୟାଦି କେନ୍ଦ୍ର ନିକଟରେ ଗଦା କରାଯାଉଥିବା ଅଭିଯୋଗ ହେଉଛି ା ଏଥିପାଇଁ ଅର୍ଥ ଆଦାୟ ହେଉଥିଲେ ହେଁ ସ୍ଥାନୀୟ ଜଣେ ପ୍ରଭାବଶାଳୀ ରାଜନୈତିକ ନେତାଙ୍କ ପକେଟକୁ ଯାଉଥିବା ଅଭିଯୋଗ ହେଉଛି ା ଏଣୁ ତୁରନ୍ତ ଏଠାରେ ବାଲି, ପଥର ଜମାକୁ ବନ୍ଦ କରିବା ସହ ଜଙ୍ଗଲ ନଷ୍ଟ କରୁଥିବା ବ୍ୟକ୍ତିଙ୍କ ବିରୋଧରେ ଜଙ୍ଗଲ ସୁରକ୍ଷା ଆଇନ ବଳରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି ା ଏ ନେଇ ପାଟଣା ବିଡିଓ ଈଶ୍ୱର ଚନ୍ଦ୍ର ନାୟକ କହିଛନ୍ତି ଯେ, ଉକ୍ତ ବାଲି ପଥର ବ୍ୟକ୍ତିଗତ ଜମିରେ ଜମା ହୋଇଛି। ପର୍ଯ୍ୟଟନ କେନ୍ଦ୍ର ଜମିରେ ବା ଜଙ୍ଗଲରେ ଜମା ହୋଇଥିଲେ ପଦକ୍ଷେପ ନିଆଯିବ ା ସେହିପରି ଜିଲା ପର୍ଯ୍ୟଟନ ଅଧିକାରୀ ରମେଶ ଚନ୍ଦ୍ର ନାୟକ କହିଛନ୍ତି ଯେ, ପର୍ଯ୍ୟଟନ କେନ୍ଦ୍ରକୁ ପରିଷ୍କାର ଓ ପରିଚ୍ଛନ୍ନ ରଖିବା ସହ ପ୍ରଦୂଷଣମୁକ୍ତ ରଖିବାକୁ ପଦକ୍ଷେପ ନିଆଯିବ।
