ବାରିପଦା ଅଫିସ,୨୦ା୩ (ରଞ୍ଜନ କୁମାର ପଧାନ)- ରୋଷେଇ ଘରର ୪ କାନ୍ଥରେ ଅଟକି ଯାଇନି ପଖାଳ ଭାତ। ଓଡ଼ିଆ ଲୋକଙ୍କ ଅତି ଆପଣାର ପ୍ରିୟ ଖାଦ୍ୟ ପଖାଳ ବର୍ତ୍ତମାନ ବିଶ୍ୱ ଦରବାରରେ ପହଞ୍ଚି ସାରିଲାଣି। ବିଶ୍ୱର ବିଭିନ୍ନ ବଡ଼ ବଡ଼ ହୋଟେଲର ମେନ୍ୟୁରେ ସ୍ଥାନ ପାଇଲାଣି ଦହି ପଖାଳ(କର୍ଡ଼ ରାଇସ୍)। ପଖାଳ ଭାତକୁ ବିଭିନ୍ନ ରାଜ୍ୟରେ ଭିନ୍ନ ଭିନ୍ନ ନାମରେ ନାମିତ କରାଯାଇଛି। ଓଡ଼ିଶାରେ ପଖାଳ, ବେଙ୍ଗଲରେ ପନ୍ଥା ଭାତ, ଛତିଶଗଡ଼ରେ ବୋର ଭାତ, ଝାଡ଼ଖଣ୍ଡରେ ପାଣି ଭାତ, ଆସାମରେ ପୋଇତ ଭାତ ଭଳି ବିଭିନ୍ନ ରାଜ୍ୟରେ ଭିନ୍ନ ନାମ ରହିଛି ଏହାର। ବିଶେଷ କରି ଖରାଦିନେ ନାମୀ ଦାମୀ ପଞ୍ଚତାରକା ହୋଟେଲମାନଙ୍କରେ ପଖାଳର ଚାହିଦା ବଢିବାରେ ଲାଗୁଛି। ଏହାକୁ ଦେଖିଲେ ଜଣା ପଡ଼େ ସେ ଉଚ୍ଚ ବର୍ଗର ଲୋକ ହୁଅନ୍ତୁ କି ନିମ୍ନ ବର୍ଗର, ଖରାଦିନେ ପଖାଳ ଭାତ ସମସ୍ତଙ୍କର ପ୍ରଥମ ପସନ୍ଦ ପାଲଟେ। ଉଚ୍ଚବର୍ଗର ଲୋକମାନେ କେବଳ ଖରାଦିନ ପଖାଳ ଖାଉଥିବା ବେଳେ ଚାଷୀ କିନ୍ତୁ ବର୍ଷକ ବାର ମାସ ପଖାଳ ଖାଏ। ଯାହା ହେଉନା କାହିଁକି ପଖାଳର ସ୍ବାଦ ସତରେ ନିଆରା। ପଖାଳ ବିଭିନ୍ନ ପ୍ରକାରର, କେତେବେଳେ ଏହା ସଜ ତ ଆଉ କେତେବେଳେ ବାସି, କେବେ ପୁଣି ଜିରା ପଖାଳ, ଦହି ପଖାଳ ଏମିତି ବିଭିନ୍ନ ପ୍ରକାରର ପ୍ରସ୍ତୁତ କରାଯାଇ ପରଷା ଯାଏ । ସେହଭିଳି ମହାପ୍ରଭୁଙ୍କ ଟଙ୍କ ତୋରାଣୀର ସ୍ବାଦ ମଧ୍ୟ ନିଆରା। ପଖାଳ ଖାଇବାକୁ ଯେତିକି ସୁସ୍ବାଦୁ, ଦେହ ପାଇଁ ମଧ୍ୟ ସେତିକି ହିତକର। ଖରା ୪ ମାସ ପଖାଳ ଖାଇଲେ ଅଂଶୁଘାତ ରୋଗ ହେବାର ଭୟ ରହିବ ନାହିଁ। କିଛି ବର୍ଷ ହେଲାଣି ମାର୍ଚ୍ଚ ମାସ ୨୦ ତାରିଖକୁ ସାର୍ବଜନୀନ ପଖାଳ ଦିବସ ରୂପେ ପାଳନ କରାଯାଉଛି। ଏହାକୁ ଦୃଷ୍ଟିରେ ରଖି ମୟୂରଭଞ୍ଜ ଜିଲାର ବିଭିନ୍ନ ହୋଟେଲରେ ମଧ୍ୟ ପଖାଳ ପାଇଁ ସ୍ବତନ୍ତ୍ର ବ୍ୟବସ୍ଥା ପ୍ରତି ବର୍ଷ କରାଯାଏ ହେଲେ ବର୍ତ୍ତମାନ କରୋନା ଭାଇରସ୍କୁ ଦୃଷ୍ଟିରେ ରଖି ଏହାକୁ ସ୍ଥଗିତ ରଖାଯାଇଛି।
