ଭୁବନେଶ୍ୱର,୨୫।।୬(ବ୍ୟୁରୋ): ପ୍ରତିଷ୍ଠା ହେବାର ମାତ୍ର ଏକବର୍ଷ ମଧ୍ୟରେ ଲାକ୍ମୀ ଇଣ୍ଡିଆ ଫ୍ୟାଶନ ଓ୍ବିକ୍ ଏବଂ ନ୍ୟୁୟର୍କ ଫ୍ୟାଶନ ଓ୍ବିକ୍ ଭଳି ଗୁରୁତ୍ୱପୂର୍ଣ୍ଣ ଫ୍ୟାଶନ ଇଭେଣ୍ଟରେ ଅଂଶଗ୍ରହଣ କରି ବିଶେଷ ସଫଳତା ହାସଲ କରିଛି ଇଣ୍ଟରନ୍ୟାଶନାଲ ଇନ୍ଷ୍ଟିଚ୍ୟୁଟ ଅଫ୍ ଫ୍ୟାଶନ ଡିଜାଇନିଂ(ଆଇଏନ୍ଆଇଏଫ୍ଡି)। ନିକଟରେ ଇନ୍ଷ୍ଟିଚ୍ୟୁଟର ୫ଜଣ ଛାତ୍ରୀଛାତ୍ର ପ୍ରିୟବ୍ରତ ମହାପାତ୍ର, ରିଶିକା ଜେନା, ପଲ୍ଲବୀ ଷଡ଼ଙ୍ଗୀ, ଦିବ୍ୟାଶା ବିଶ୍ୱାଳ ଓ ଆଦିତି କୁମାର ନ୍ୟୁୟର୍କ ଫ୍ୟାଶନ ଓ୍ବିକ୍ ୨୦୧୯ରେ ନିଜ ଡିଜାଇନ୍ର ଶୋ’କେସ୍ କରିବାର ସୌଭାଗ୍ୟ ଅର୍ଜନ କରିଛନ୍ତି। ଆଇଏନ୍ଆଇଏଫ୍ଡି ଫ୍ୟାଶନ ଡିଜାଇନ୍ ଡିପାର୍ଟମେଣ୍ଟର ଏହି ଛାତ୍ରୀଛାତ୍ର ନ୍ୟୁୟର୍କ ଫ୍ୟାଶନ ଓ୍ବିକ୍ର ଭାଇବ୍ରାଣ୍ଟ ଇଣ୍ଡିଆ ବିଭାଗରେ ନିଜ ଡିଜାଇନ୍ ପ୍ରଦର୍ଶନ କରିଥିଲେ।
ଲଗାତାର ୩ୟ ଥର ପାଇଁ ଆଇଏନ୍ଆଇଏଫ୍ଡି ଏବଂ ଲଣ୍ଡନ୍ ସ୍କୁଲ ଅଫ୍ ଟ୍ରେଣ୍ଡ୍ସ(ଏଲ୍ଏସ୍ଟି) ମିଳିତ ଭାବେ ଭାରତୀୟ ଫ୍ୟାଶନକୁ ବିଦେଶ ମାଟିରେ ପହଞ୍ଚାଇବା ସହ ଭାରତୀୟ ହସ୍ତତନ୍ତକୁ ନ୍ୟୁୟର୍କ ଫ୍ୟାଶନ ଓ୍ବିକ୍ରେ ପ୍ରଦର୍ଶନ କରିଛନ୍ତି। ଏହାସହ ଯୁବ ଛାତ୍ରୀଛାତ୍ରଙ୍କ ହାତରେ ଥିବା ଯାଦୁକୁ ସମଗ୍ର ବିଶ୍ୱ ସମ୍ମୁଖକୁ ଆଣିବାକୁ ଏକ ଉତ୍କୃଷ୍ଟ ପ୍ଲାଟ୍ଫର୍ମ ଯୋଗାଇ ଦେଇଛନ୍ତି। ସେଣ୍ଟ୍ ମାହ୍ନାଟ୍ଟନ୍(Manhattan)ରେ ଅନୁଷ୍ଠିତ ହୋଇଥିବା କାର୍ଯ୍ୟକ୍ରମରେ ନ୍ୟୁୟର୍କରେ ଅବସ୍ଥାପିତ ଭାରତର ଡେପୁଟି କନ୍ସୁଲ୍ ଜେନେରାଲ୍ ଶତ୍ରୁଘ୍ନ ସିହ୍ନା ଓ ଅନ୍ୟ ଅତିଥିମାନେ ଉପସ୍ଥିତ ରହି ଛାତ୍ରୀଛାତ୍ରଙ୍କୁ ଉତ୍ସାହିତ କରିଥିଲେ। ଶୋରେ ଭାରତର ଉତ୍କୃଷ୍ଟ ହସ୍ତତନ୍ତ ଏବଂ ଏହାର ପ୍ରସ୍ତୁତ ପ୍ରଣାଳୀକୁ ପ୍ରଦର୍ଶନ କରାଯାଇଥିଲା। ଆର୍ଟ ଆଣ୍ଡ କ୍ରାଫ୍ଟ, ବ୍ୟାଡ୍ ଗର୍ଲସ, ଇଭିନିଙ୍ଗ୍ ଓ୍ବେର୍ ଏବଂ ଟେଲରିଂ ଏହାର ଚଳିତବର୍ଷ ଥିମ୍ ରହିଥିଲା। ସେହିଭଳି ପାରମ୍ପରିକ ଭାରତୀୟ ପୋଷାକରେ ପାଶ୍ଚାତ୍ୟ ଡିଜାଇନ୍ର ଛାପ ପ୍ରତିଟି ଡିଜାଇନ୍କୁ ଆକର୍ଷଣୀୟ କରିଥିଲା। ଆଗାମୀ ଦିନରେ ଏଭଳି ବିଶ୍ୱସ୍ତରୀୟ ଫ୍ୟାଶନ ଇଭେଣ୍ଟରେ ଅଂଶଗ୍ରହଣ କରିବା ସହ ଆଇଏନ୍ଆଇଏଫ୍ଡି ନିଜ ଛାତ୍ରୀଛାତ୍ରଙ୍କୁ ଗ୍ଲୋବାଲ୍ ମାର୍କେଟ୍ରେ ପ୍ରତିଷ୍ଠିତ ହେବାକୁ ସୁଯୋଗ ପ୍ରଦାନ କରିବ ବୋଲି ଶିକ୍ଷାନୁଷ୍ଠାନ ପକ୍ଷରୁ କୁହାଯାଇଛି।
