ନୂଆଦିଲ୍ଲୀ,୧।୨: ଭାରତୀୟ ଅଲ୍ରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ସମ୍ପୂର୍ଣ୍ଣ ଫିଟନେସ୍ ହାସଲ କରି ନ ଥିବାରୁ ନ୍ୟୁଜିଲାଣ୍ଡ ବିପକ୍ଷ ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ରୁ ବାଦ୍ ପଡ଼ିଛନ୍ତି। ପାଣ୍ଡ୍ୟା ଏନ୍ସିଏ ମୁଖ୍ୟ ଫିଜିଓ ଆଶିଷ କୌଶିକଙ୍କ ସହ ଲଣ୍ଡନ ଗସ୍ତ କରିଥିଲେ। ସେଠାରେ ସ୍ପାଇନାଲ ସର୍ଜନ ଜେମ୍ସ ଅଲିବୋନଙ୍କୁ ଭେଟିଥିଲେ। ସର୍ଜନଙ୍କ ପରାମର୍ଶ ପରେ ପାଣ୍ଡ୍ୟାଙ୍କ ସମ୍ପର୍କରେ ନିଷ୍ପତ୍ତି ନିଆଯାଇଥିବା ବିସିସିଆଇ ସାଧାରଣ ସମ୍ପାଦକ ଜୟ ଶାହା ଏକ ବିବୃତିରେ କହିଛନ୍ତି। ସେ ଏବେ ସମ୍ପୂର୍ଣ୍ଣ ଫିଟନେସ ହାସଲ କରିବା ପର୍ଯ୍ୟନ୍ତ ଜାତୀୟ କ୍ରିକେଟ ଏକାଡେମୀ(ଏନ୍ସିଏ)ରେ ରହିବେ। ଗତବର୍ଷ ଅକ୍ଟୋବରରେ ପାଣ୍ଡ୍ୟାଙ୍କ ଅଣ୍ଟାରେ ସଫଳ ଅସ୍ତ୍ରୋପଚାର କରାଯାଇଥିଲା। ସେବେଠାରୁ ସେ ପଡ଼ିଆକୁ ଫେରି ନାହାନ୍ତି। ଅନ୍ତିମ ଥର ଭାରତ ପାଇଁ ସେପ୍ଟେମ୍ବରରେ ସେ ଦକ୍ଷିଣ ଆଫ୍ରିକା ବିପକ୍ଷରେ ଖେଳିଥିଲେ। ଅଣ୍ଟାଜନିତ ସମସ୍ୟା ଯୋଗୁ ଦଳରେ ନିୟମିତ ସ୍ଥାନ ପାଉ ନ ଥିଲେ। ଅସ୍ତ୍ରୋପଚାରରୁ ଫେରିବା ପରେ ଗତମାସରେ ପାଣ୍ଡ୍ୟା ବାଧ୍ୟତାମୂଳକ ଫିଟ୍ନେସ ଟେଷ୍ଟରେ ଫେଲ୍ ହେବା ପରେ ଭାରତ ଏ’ ଦଳରୁ ଓହରି ଯାଇଥିଲେ। ଚୟନକର୍ତ୍ତାମାନେ ତାଙ୍କୁ ରଣ୍ଜୀରେ ପରୀକ୍ଷା ନ କରାଇ ସିଧାସଳଖ ଦଳରେ ଚୟନ କରିଥିଲେ। ଫିଟନେସ ଟେଷ୍ଟରେ ପାଣ୍ଡ୍ୟାଙ୍କ ସ୍କୋର ଭଲ ନ ଥିଲା। ଫଳରେ ତାମିଲନାଡୁ ଅଧିନାୟକ ବିଜୟ ଶଙ୍କରଙ୍କୁ ଇଣ୍ଡିଆ ଏ’ ଦଳରେ ନିଆଯାଇଥିଲା। ଚଳିତମାସ ୨୧ ତାରିଖରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଓ୍ବେଲିଂଟନ୍ଠାରେ ପ୍ରଥମ ଟେଷ୍ଟ ମ୍ୟାଚ୍ ଖେଳାଯିବ। ଦ୍ୱିତୀୟ ଟେଷ୍ଟ ଫେବୃୟାରୀ ୨୯ରୁ ଖ୍ରୀଷ୍ଟଚର୍ଚ୍ଚାଠାରେ ଅନୁଷ୍ଠିତ ହେବ।
