ନିମାପଡ଼ା, ୯।୬(ଡି.ଏନ୍.ଏ.)-ପ୍ରଳୟଙ୍କରୀ ବାତ୍ୟା ପରେ ନିମାପଡ଼ା ବ୍ଲକରେ ଝାଡାବାନ୍ତି ବ୍ୟାପିବାରେ ଲାଗିଛି। ଗତ ୭ଦିନ ମଧ୍ୟରେ ୧ହଜାରରୁ ଊର୍ଦ୍ଧ୍ୱ ଲୋକ ଆକ୍ରାନ୍ତ ହୋଇ ନିମାପଡ଼ା ଓ ଚାରିଛକ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଫଳରେ ଲୋକ ଆତଙ୍କିତ ହୋଇ ପଡ଼ିଛନ୍ତି। ଏଥିରେ ଆକ୍ରାନ୍ତ ହୋଇ ବାହାରେଣା ଗ୍ରାମର ବର୍ଷାରାଣୀ ନାୟକ, ଛତିଆନା ଗ୍ରାମର ପ୍ରଜ୍ଞା ପଟ୍ଟନାୟକ, ବିଶିମାତ୍ରିର ସରସ୍ବତୀ ନାୟକ, ତିରୁଣାର ରିତିରାଜ ଭୋଇ, ବରପଡ଼ାର ସୂର୍ଯ୍ୟନାରାୟଣ ସେଠୀ ପ୍ରମୁଖ ଚାରିଛକ ଡାକ୍ତରଖାନାରେ ଚିକିିତ୍ସିତ ହେଉଛନ୍ତି। ସେହିପରି ନିମାପଡାରେ ଡାକ୍ତରଖାନାରେ ବିଜିପୁର ଗ୍ରାମର ସୁଷମା ଭୋଇ, ଧୀରପୁରର ଉମାମଣି ବେହେରା, ଅଂସାଲର ଗୌରାଙ୍ଗ ବେହେରା, ବିଷ୍ଣୁପୁରର କୁନ୍ତଳା ଭୋଇ ପ୍ରମୁଖ ଚିକିତ୍ସିତ ହେଉଛନ୍ତି। ଏହି ଦୁଇ ଡାକ୍ତରଖାନାରେ ଆବଶ୍ୟକୀୟ ଶଯ୍ୟା ନ ଥିବାରୁ ଉଭୟ ଡାକ୍ତରଖାନାରେ ରୋଗୀମାନେ ବାଧ୍ୟ ହୋଇ ବାରଣ୍ଡାରେ ଓ ତଳେ ଶୋଇ ଚିକିତ୍ସିତ ହେଉଛନ୍ତି। ଏ ସମ୍ପର୍କରେ ନିମାପଡ଼ା ମେଡିକାଲର ଡାକ୍ତର ସୁଶାନ୍ତ ମିଶ୍ର ଏବଂ ଚାରିଛକ ଡାକ୍ତରଖାନର ଡାକ୍ତର ସୁଶାନ୍ତ କୁମାର ଜେନା ଓ ଡାକ୍ତର ଶୁଭମୟ ଚିନ୍ମୟ ସ୍ବାଇଁଙ୍କୁ ପଚାରିବାରେ ଦୂଷିତ ଖାଦ୍ୟ ଓ ପାନୀୟ ଜଳ ସେବନରୁ ଏହି ରୋଗ ବ୍ୟାପୁଛି। ଝାଡ଼ାବାନ୍ତିରେ ଆକ୍ରାନ୍ତ ରୋଗୀଙ୍କ ପାଇଁ ମେଡିକାଲରେ ପର୍ଯ୍ୟାପ୍ତ ପରିମାଣର ଔଷଧ, ଇଞ୍ଜେକସନ୍ ଓ ସାଲାଇନ ମହଜୁଦ ରହିଛି। ରୋଗୀମାନଙ୍କୁ ଠିକ୍ ଭାବେ ଚିକିତ୍ସା କରାଯାଉଛି ବୋଲି ଡାକ୍ତରମାନେ କହିଛନ୍ତି। ଏଥିପାଇଁ ପୁରୀ ଜିଲା ମୁଖ୍ୟ ଚିକିତ୍ସାଧିକାରୀ ଦୃଷ୍ଟିଦେବା ସହ ନିମାପଡ଼ା ବ୍ଲକର ପ୍ରତ୍ୟେକ ଗ୍ରାମକୁ ଭ୍ରାମ୍ୟମାଣ ଡାକ୍ତରୀ ଦଳ ପଠାଇ ଚିକିତ୍ସା କରିବାକୁ ସାଧାରଣରେ ଦାବି ହେଉଛି। ଗ୍ରାମାଞ୍ଚଳ ପାନୀୟ ଜଳ ଯୋଗାଣ ବିଭାଗ ପକ୍ଷରୁ ଗଁା ଗଣ୍ଡାର ଥିବା ସମସ୍ତ କୂପ, ନଳକୂପ ଓ ପୋଖରୀ ଗୁଡ଼ିକୁ ଯୁଦ୍ଧକାଳୀନ ଭିତ୍ତିରେ ବିଶୋଧନ କରାଯିବା ସହ ବାତ୍ୟା ବିପନ୍ନଙ୍କୁ ପର୍ଯ୍ୟପ୍ତ ପରିମାଣ ବିଶୁଦ୍ଧ ପାନୀୟ ଜଳ ଯୋଗାଇଦେବାକୁ ଦାବି ହେଉଛି।
