ବିଞ୍ଝାରପୁର,୧୫।୩(ଡିଏନଏ): ବିଞ୍ଝାରପୁର ବ୍ଲକ ବାଙ୍ଗରା ପଞ୍ଚାୟତର ଜଣେ ନାବାଳିକାଙ୍କୁ ପ୍ରେମ ଜାଲରେ ଫସାଇ ବିବାହ କରିବା ଅଭିଯୋଗରେ ୩ଜଣ ଯୁବକଙ୍କୁ ଜେଲ ଯିବାକୁ ପଡ଼ିଛି। ଗିରଫ ଯୁବକମାନେ ହେଲେ ବାଙ୍ଗରା ପଞ୍ଚାୟତର ରବୀଦ୍ର ବିଶ୍ୱାଳ(୨୫), ମଳୟ ଜେନା(୨୫) ଓ ଭୁବନେଶ୍ୱର ଅଞ୍ଚଳର ତାପସ ରାଉତରାୟ (୨୬)।
ନାବାଳିକାଙ୍କର ସେହି ଗ୍ରାମର ରବୀନ୍ଦ୍ରଙ୍କ ସହ ପ୍ରେମ ସମ୍ପର୍କ ଥିଲା। ଏହାପରେ ୨୦୧୯ ଜୁଲାଇ ୧୫ରେ ଉଭୟ ଘରୁ ପଳାଇ ଯାଇଥିଲେ। ନାବାଳିକାଙ୍କ ପରିବାର ଅତ୍ୟନ୍ତ ଗରିବ ହୋଇଥିବାରୁ ଓ ନାବାଳିକା ନିଜ ଜାତିର ପୁଅ ସହିତ ଚାଲିଯାଇଥିବାରୁ ଏହି ଘଟଣାକୁ ନେଇ ଥାନାରେ ଅଭିଯୋଗ ହୋଇ ନ ଥିଲା। ହେଲେ ୬ମାସ ପରେ ଉକ୍ତ ନାବାଳିକା ଅନ୍ୟଜଣେ ଦଳିତ ଯୁବକଙ୍କ ସହିତ ଫେରାର ହୋଇଯିବାରୁ ନାବାଳିକାଙ୍କ ପରିବାର ଲୋକେ ରବୀନ୍ଦ୍ର ତାଙ୍କୁ ପ୍ରେମ ଜାଲରେ ଫସାଇ ଫେରାର କରି ନେଇଯାଇଥିବା ବିଞ୍ଝାରପୁର ଥାନାରେ ଅଭିଯୋଗ କରିଥିଲେ। ଏହି ଘଟଣାରେ ପୋଲିସ ଏକ ମାମଲା (ନଂ.୫୭/୨୦) ରୁଜୁ କରି ରବୀନ୍ଦ୍ରଙ୍କୁ ଗିରଫ କରି କୋର୍ଟଚାଲାଣ କରିଥିଲା। ନାବାଳିକାଙ୍କୁ ସେହି ପଞ୍ଚାୟତର ମଳୟ ଯେନା ନେଇ ଯାଇଥିବା ବିଞ୍ଝାରପୁର ପୋଲିସ ସୁରାକ ପାଇଥିଲା। ହେଲେ ମଳୟଙ୍କୁ ବିଞ୍ଝାରପୁର ପୋଲିସ ହାଇଦ୍ରାବାଦରୁ ଗିରଫ କରିଥିଲେ ମଧ୍ୟ ନାବାଳିକାଙ୍କ ପତ୍ତା ପାଇ ନ ଥିଲା। ପଚରାଉଚରା ପରେ ନାବାଳିକା ଜଣକ ଭୁବନେଶ୍ୱରରେ ତାପସ ନାମକ ଯୁବକଙ୍କୁ କୋର୍ଟରେ ବିବାହ କରିବାକୁ ସଜବାଜ ହେଉଥିଲାବେଳେ ଶୁକ୍ରବାର ଅପରାହ୍ନରେ ବିଞ୍ଝାରପୁର ପୋଲିସ ତାଙ୍କୁ ଗିରଫ କରିବା ସହିତ ନାବାଳିକାଙ୍କୁ ଉଦ୍ଧାର କରିଥିଲା। ଶନିବାର ପୂର୍ବାହ୍ନରେ ପୋଲିସ ମଳୟ ଓ ତାପସଙ୍କୁ କୋର୍ଟଚାଲାଣ କରିଥିବା ଜଣାପଡିଛି। ଜଣେ ନାବାଳିକାଙ୍କ ପ୍ରେମରେ ୩ଜଣ ଜଣ ଯୁବକ ଉବୁଟୁବୁ ହୋଇ ଶେଷରେ ଜେଲଯିବା ଘଟଣା ସମଗ୍ର ବିଞ୍ଝାରପୁର ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ନାବାଳିକା ଗତ ୧୦ରେ ସାବାଳିକା ହୋଇଥିବା ଜଣାପଡିଛି।
