ବାରଙ୍ଗ,୩୦।୭(ଡି.ଏନ୍.ଏ.): ବିଂଶ ଶତାବ୍ଦୀରେ ଦେଶରେ ବାଘଙ୍କ ସଂଖ୍ୟା ୧ଲକ୍ଷ ଥିବାବେଳେ ଏବେ ମାତ୍ର ୩ ହଜାର ମଧ୍ୟରେ ସୀମିତ ରହିଛି। ଏଭଳି ହ୍ରାସ ପଛରେ ବାସସ୍ଥଳୀ, ଖାଦ୍ୟ, ପାଣି ଅଭାବ ବୋଲି ବନ୍ୟପ୍ରାଣୀ ବିଶେଷଜ୍ଞମାନେ ମତ ଦେଉଛନ୍ତି। ଏଣୁ ଆମେ ଜଙ୍ଗଲ ଅବକ୍ଷୟ ରୋକିବା ସହ ଜଙ୍ଗଲ ସୃଷ୍ଟିି କରିବା ଆବଶ୍ୟକ। ସୋମବାର ବିଶ୍ୱ ବ୍ୟାଘ୍ର ଦିବସ ପାଳନ ଅବସରରେ ପ୍ରାଣୀଉଦ୍ୟାନ ନନ୍ଦନକାନନ ସଭାଗୃହରେ ଆୟୋଜିତ ସଭାରେ ବକ୍ତାମାନେ କହିଛନ୍ତି। ପ୍ରାଣୀଉଦ୍ୟାନ ଉପନିଦ୍ଦେର୍ଶକ ଜୟନ୍ତ କୁମାର ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ନିର୍ଦ୍ଦେଶକ ଶଶି ପାଲ, ଡବ୍ଲ୍ୟୁଡବ୍ଲ୍ୟୁଏଫ୍ର ସଂଯୋଜକ ମାଇକେଲ ପିଟର, ପ୍ରାଣୀଉଦ୍ୟାନ ବନ୍ୟପ୍ରାଣୀ ଚିକିତ୍ସାଳୟର ବରିଷ୍ଠ ପ୍ରାଣୀ ଚିକିତ୍ସକ ଆଲୋକ କୁମାର ଦାସ, ସେଞ୍ଚୁରିଆନ ବିଶ୍ୱବିଦ୍ୟାଳୟର ବାୟୋଲୋଜି ଅଧ୍ୟାପକ ଡ. ଶିବ ପ୍ରସାଦ ପରିଡା ପ୍ରମୁଖ ଯୋଗଦେଇଥିଲେ।
ବାଘ ବଂଶର ବିସ୍ତାର ଦିଗରେ ନନ୍ଦନକାନନ ୯୫ପ୍ରତିଶତ ସଫଳତା ଲାଭ କରିଛି। ବର୍ତ୍ତମାନ ନନ୍ଦନକାନନରେ ବାଘମାନଙ୍କ ସଂଖ୍ୟା ୨୭ ରହିଛି। ସେଥିମଧ୍ୟରେ ୧୪ ସାଧାରଣ, ୯ ଧଳା ଓ ୪ କଳାଲୋମଯୁକ୍ତ ବାଘ ରହିଛନ୍ତି। କଳା ଲୋମଯୁକ୍ତ ବାଘ ଛୁଆ ଜନ୍ମକରି ଚର୍ଚ୍ଚାରେ ଥିବା ନନ୍ଦନକାନନ ଏଥର ସ୍ନେହା ସହ ସେଫ୍, ନନ୍ଦନ ସହ ସାରା, ରେଣୁକା ସହ ସମ୍ରାଟର ମିଳନ ପାଇଁ ଯୋଜନା କରାଯାଇଛି। ଏବେ କଲରାପତରିଆ ବାଘ ସଂଖ୍ୟା ୭ ଥିବାବେଳେ ସେମାନଙ୍କ ମଧ୍ୟରେ ୩ ଅଣ୍ଡିରା ଓ ୪ ମାଈ ରହିଛନ୍ତି। ୨୦୧୭ ଜୁଲାଇ ୧୬ରେ ନନ୍ଦନକାନନକୁ ଆସିଥିବା ସୁନାବେଡା ରେଞ୍ଜରେ ଚର୍ଚ୍ଚାରେ ଥିବା ମଣିଷଖିଆ ବାଘ ସହ ବାଘୁଣୀ ମଞ୍ଜୁ ଏବଂ ସୂରଜ ସହ ଅନିତାର ମିଳନ ପାଇଁ ସେମାନଙ୍କୁ ପାଖାପାଖି ଏନକ୍ଲୋଜରେ ରଖାଯାଇଛି ବୋଲି ଜନ୍ତୁବିଭାଗ ଦାୟିତ୍ୱରେ ଥିବା ଏସିଏଫ ଅଶୋକ କୁମାର ଦାସ କହିଛନ୍ତି ା ଆଗକୁ ବାଘ ବଂଶ ବୃଦ୍ଧି କରିବା ପାଇଁ ଅନ୍ୟ ପ୍ରଜାତିର ବାଘ ବାହାରୁ ଅଣାଯାଇ ମିଳନ କରାଯିବ ଓ ଅତ୍ୟାଧୁନିକ ପଦ୍ଧତି ଆପଣାଇବା ପାଇଁ ପ୍ରଚେଷ୍ଟା ଜାରି ରହିଛି ବୋଲି ଉପନିର୍ଦ୍ଦେଶକ ଜୟନ୍ତ ଦାସ କହିଛନ୍ତି। ସେ ଆହୁରି କହିଛନ୍ତି, ଅଦଳବଦଳ ପ୍ରକିୟାକୁ କେନ୍ଦ୍ରୀୟ ଚିଡିଆଖାନା କର୍ତ୍ତୃପକ୍ଷ ମୋହର ଦେଇସାରିଛନ୍ତି। ତେଣୁ ଅଗଷ୍ଟ ଶେଷସୁଦ୍ଧା ନନ୍ଦନକାନନକୁ ଆନାକୋଣ୍ଡା ଆସିବ।
ଶେଷରେ ବ୍ୟାଘ୍ର ସୁରକ୍ଷା ନେଇ ଏକ ଦସ୍ତଖତ ଅଭିଯାନ କରାଯାଇଥିଲା। ଏହି ଉପଲକ୍ଷେ ଆଖପାଖ ଅଞ୍ଚଳର ୬ଟି ସ୍କୁଲର ୫୦ ଛାତ୍ରୀଛାତ୍ରମାନଙ୍କୁ ନେଇ ବାଘମାନଙ୍କ ସୁରକ୍ଷା ବିଷୟରେ ଏକ କୁଇଜ ପ୍ରତିଯୋଗିତା ହୋଇଥିଲା। କୃତୀ ଛାତ୍ରୀଛାତ୍ରଙ୍କୁ ପୁରସ୍କୃତ କରାଯାଇଥିଲା। ବନ୍ୟପ୍ରାଣୀ ଏସିଏଫ୍ ଅଞ୍ଜନ କୁମାର ମହାନ୍ତି ଧନ୍ୟବାଦ ଦେଇଥିଲେ। କାର୍ଯ୍ୟକ୍ରମରେ ଏସିଏଫ ପ୍ରଶାନ୍ତ ପଣ୍ଡାଙ୍କ ସମେତ ଅନ୍ୟ ବିଭାଗୀୟ ରେଞ୍ଜ ଅଧିକାରୀ, କର୍ମଚାରୀ, ବନ୍ୟପ୍ରାଣୀ ପ୍ରେମୀ ଓ ବୁଦ୍ଧିଜୀବୀ ଯୋଗଦେଇଥିଲେ।
