ଧରାପଡ଼ିଲେ ୯ ଜଣିଆ ଲୁଟେରା ଗ୍ୟାଙ୍ଗ: ଫାଇନାନ୍ସ କମ୍ପାନୀ କର୍ମଚାରୀଙ୍କୁ ଲୁଟୁଥିଲେ
7:59 amJanuary 4, 2020 / 21

ଛତ୍ରପୁର,୪ା୧୨(ଡି.ଏନ.ଏ)-କର୍ମଚାରୀଙ୍କଠାରୁ ଲୁଟପାଟ କରୁଥିବା ୯ ଜଣିଆ ଏକ ଲୁଟେରା ଗ୍ୟାଙ୍ଗକୁ ଗଞ୍ଜାମ ପୋଲିସ ଧରିବାରେ ସଫଳ ହୋଇଛି। ଗଞ୍ଜାମ ଓ ନୟାଗଡ ଜିଲାରେ ହୋଇଥିବା ୧୨ଟି ଲୁଟ୍‌ ଘଟଣା ଏବଂ ଏକ ହତ୍ୟା ମାମଲାରେ ଏମାନେ ସମ୍ପୃକ୍ତ ଥିଲେ। ଅଭିଯୁକ୍ତମାନଙ୍କ ମଧ୍ୟରେ ଜଣେ ନାବାଳକ ଥିବା ପୋଲିସ ସୂଚନା ଦେଇଛି। କବିସୂର୍ଯ୍ୟନଗର ଥାନା ଅର୍ଜୁନପଲ୍ଲୀ ଗାଁର ଯୋଗୀ ଗୌଡ, କବିସୂର୍ଯ୍ୟନଗର ଆଇବି ରୋଡ୍‌ର ସୁନିଲ ମହାନ୍ତି ଓରଫ୍‌ ସୁନିଲ ନାହାକ ଓରଫ୍‌ ମଲ୍ଲ, ବଡଆଗୁଳା ଗାଁର ତନୁଜ ସ୍ବାଇଁ ଓରଫ ତନ୍ମୟ, ଆଇବି ରୋଡ୍‌ର ସଞ୍ଜୟ ନାହାକ, ଖଲ୍ଲିକୋଟ ଥାନା ଲୋଚାପଡା ଗାଁର ଶିବରାମ ଦାସ ଓରଫ ଶିବ, ପାଟପୁର ଥାନା ଏସ୍‌. ଗୋପାଳପୁର ଗାଁର ଅଶ୍ୱିନୀ ଗୌଡ, ପୁରୁଷୋତ୍ତମପୁର ଥାନା ଅରଖପୁର ଗାଁର ମନୋଜ ଗୌଡ, କନ୍ଧମାଳ ଜିଲା ସଦର ଫୁଲବାଣୀ ଥାନା ମଲିକପଡା ଗାଁର ଭରତ ପ୍ରଧାନଙ୍କୁ ଗିରଫ କରାଯାଇଛି। ଅଭିଯୁକ୍ତମାନଙ୍କ ଠାରୁ ୪ ପିସ୍ତଲ, ଗୋଟିଏ ଖେଳନା ପିସ୍ତଲ, ୧୪ଟି ଜୀବନ୍ତ ଗୁଳି, ଖଣ୍ଡା, ଛୁରି, ୪ଟି ଦୁଇଚକିଆ ବାଇକ୍‌/ସ୍କୁଟି ଓ ୧୬ଟି ମୋବାଇଲ ଫୋନ ଜବତ କରାଯାଇଛି । ଶୁକ୍ରବାର ଛତ୍ରପୁରରେ ଅନୁଷ୍ଠିତ ଖବରଦାତା ସମ୍ମିଳନୀରେ ଏସ୍‌ପି ବ୍ରିଜେଶ କୁମାର ରଏ ଏହି ସୂଚନା ଦେଇଛନ୍ତି।
ଏସ୍‌ପି କହିଛନ୍ତି, ଏହି ଗ୍ୟାଙ୍ଗ ଫାଇନାନ୍ସ କମ୍ପାନୀର କର୍ମଚାରୀଙ୍କୁ ଟାର୍ଗେଟ କରୁଥିଲେ। ଗ୍ୟାଙ୍ଗରେ କିଏ ସୂଚନା ଦେଉଥିଲେ ତ ଆଉ କିଏ ଟ୍ରାକ୍‌ କରୁଥିଲେ ଏବଂ ଅନ୍ୟମାନେ ଲୁଟ୍‌ କରୁଥିଲେ । ଗ୍ୟାଙ୍ଗ୍‌ରେ ଆଉ କିଏ ଅଛନ୍ତି ତାହା ଜାଣିବା ଓ ଲୁଟ୍‌ ଟଙ୍କା ଜବତ ପାଇଁ ତଦନ୍ତ ଜାରି ରହିଛି। ଗିରଫ ଯୋଗୀ ଲୁଟ୍‌ କରି ବାଇକ୍‌ରେ ଦ୍ରୁତ ଗତିରେ ଯାଉଥିବାବେଳ ଦୁର୍ଘଟଣାଗ୍ରସ୍ତ ହୋଇଥିଲେ। ତାଙ୍କ ଗୋଡରେ ଗଭୀର ଆଘାତ ଲାଗିଛି। ଲୁଟେରା ଗ୍ୟାଙ୍ଗକୁ ଧରିବା ପାଇଁ ଖଲ୍ଲିକୋଟ, ପୁରୁଷୋତ୍ତମପୁର, କବିସୂର୍ଯ୍ୟନଗର, ଗାଙ୍ଗପୁର ଓ କୋଦଳା ଥାନା ଆଇଆଇସି ଓ କର୍ମଚାରୀଙ୍କୁ ନେଇ ଏକ ଟିମ୍‌ ଗଠନ ହୋଇଥିଲା । ପୁରୁଷୋତ୍ତମପୁର ଓ ଛତ୍ରପୁର ଏସ୍‌ଡିପିଓ ଏବଂ ଅତିରିକ୍ତ ଏସ୍‌ପି ଏହାର ମନିଟରିଂ କରୁଥିଲେ ବୋଲି ଏସପି କହିଛନ୍ତି।