ଭୁବନେଶ୍ୱର,୧୫।୨ (ବ୍ୟୁରୋ): ସ୍ବଚ୍ଛ ଭାରତ ମିଶନ ଭଳି ପ୍ରମୁଖ ତଥା ଦୀର୍ଘମିଆଦୀ କାର୍ଯ୍ୟକ୍ରମରେ ସହରାଞ୍ଚଳଗୁଡ଼ିକ ମଧ୍ୟରେ ପ୍ରତିଯୋଗିିତା ଲାଗିରହିଛି। ଭୁବନେଶ୍ୱର ଖୋଲା ମଳତ୍ୟାଗମୁକ୍ତ ସହରର ପ୍ରଥମ ସୋପାନ ଅତିକ୍ରମ କରି ଦ୍ୱିତୀୟ ସୋପାନ ବା ଓଡିଏଫ୍ ++ ରେ ନିଜର ସ୍ଥାନ ନିର୍ଦ୍ଧାରଣ କରିଥିବା ମହାନଗର ନିଗମ କର୍ତ୍ତୃପକ୍ଷ ସୂଚନା ଦେଇଛନ୍ତି।
ଗୃହ ନିର୍ମାଣ ଏବଂ ନଗର ଉନ୍ନୟନ ମନ୍ତ୍ରଣାଳୟ ଦ୍ୱାରା ସ୍ଥିରୀକୃତ ବିବିଧ ଭିତ୍ତିିଭୂମି ଏବଂ ଗୁଣାବଳୀ ଆଧାରରେ ଏହି ମାନ୍ୟତା ଦିଆଯାଇଥାଏ। ସ୍ଥିରୀକୃତ ଗୁଣାବଳୀ ମଧ୍ୟରେ ଖୋଲା ମଳତ୍ୟାଗ ଏବଂ ମୂତ୍ରତ୍ୟାଗ ନ ହେବା, ସମସ୍ତ ବ୍ୟକ୍ତିଗତ ପାଇଖାନାରେ ଜଳ ସଂଯୋଗ ହୋଇ ଏହା ସ୍ବଚ୍ଛ ରହିବା, ସମସ୍ତ ଗୋଷ୍ଠୀ ଏବଂ ପବ୍ଲିକ୍ ଟଏଲେଟ୍ ସମ୍ପୃକ୍ତ ଗୋଷ୍ଠୀଠାରୁ ୫୦୦ ମିଟର ଦୂରରେ ରଖିବା, ମଳ ଉପଚାର ବିଜ୍ଞାନ ସମ୍ମତ ଭାବେ ହେବା ଆଦି ରହିଛି। ସେହିପରି ସମସ୍ତ ପାଇଖାନା ସ୍ବେରେଜ୍ ନେଟ୍ୱର୍କକୁ ସଂଯୋଗ ହେବା କିମ୍ବା ଏହାର ନିଜସ୍ବ ସୋପିଟ୍ ଓ ସେପ୍ଟିକ୍ ଟାଙ୍କି ରହିବା, ପାଇଖାନା ଟାଙ୍କି ନିୟମିତ ବ୍ୟବଧାନରେ ଖାଲିହେବା, ସମସ୍ତ ସେପ୍ଟିକ୍ ଟାଙ୍କି ସଫା କରୁଥିବା ସେସ୍ପୁଲ୍ ମହାନଗର ନିଗମ ସହିତ ନିବନ୍ଧିତ ହେବା, ବାହାରେ ଓ ଡ଼୍ରେନ୍ ଇତ୍ୟାଦିରେ ଅଣଉପଚାରିତ ମଳ ନିସ୍ତାରଣ ଲାଗି ଜରିମାନା ଆଦାୟ କରାଯିବା, ପରିମଳଜନିତ ସେବା ବ୍ୟବସ୍ଥାର ମାନଦଣ୍ଡ ସମ୍ପୃକ୍ତ ପୌରସଂସ୍ଥା ଜଣାଇବା, କୌଣସି ପାଇଖାନା ଜଳରାଶିକୁ ସଂଯୋଗ ନ ହେବା, ସହରରୁ ନିର୍ଗତ ମଳର ଉପଚାର ହେବା ଇତ୍ୟାଦି ଗୁଣାବଳୀ ରହିଛି। ତେବେ ଏହି ସବୁକୁ ନିଶ୍ଚିତ କରିବା ନିମନ୍ତେ ମୁଖ୍ୟତଃ ୪ ପ୍ରକାର ମାନଦଣ୍ଡ ଜଳଯୋଗାଣ ସୂଚକ, ସ୍ବେରେଜ୍ ଏବଂ ପରିମଳ ସୂଚକ, କଠିନ ବର୍ଜ୍ୟବସ୍ତୁ ପରିଚାଳନା ସୂଚକ ଏବଂ ବର୍ଷାବିପତ୍ାତ ଜଳ ଓ ଡ଼୍ରେନେଜ୍ ସୂଚକ ଇତ୍ୟାଦିକୁ ବିଚାରକୁ ନିଆଯାଇଥାଏ। ଏହି କ୍ରମରେ ମୋଟ ୨୮ଟି ସୂଚକର ବିବିଧ ଦିଗ ଉପରେ ଆଲୋକପାତ କରି ସମ୍ପୃକ୍ତ ଅଧିକାରୀ ମାନଦଣ୍ଡ ନିର୍ଦ୍ଧାରଣ କରିଥାନ୍ତିି। ଏ ନେଇ ବିବିଧ ସୂଚକ ଉପରେ ବିଏମସି କାର୍ଯ୍ୟାଳୟରେ ଆଲୋକପାତ କରାଯାଇଥିଲା।
