ନୂଆଦିଲ୍ଲୀ,୧୮।୮(ପି.ଟି.)- ଜାତୀୟ ନିଶା ନିବାରଣ ସଂସ୍ଥା (ନାଡ଼ା) ଆଗାମୀ ଦୁଲୀପ ଟ୍ରଫି ମ୍ୟାଚ୍ ଅବସରରେ ଭାରତୀୟ କ୍ରିକେଟରଙ୍କ ଡୋପ୍ ଟେଷ୍ଟ ଆରମ୍ଭ କରିବ। ବେଙ୍ଗାଲୁରୁରେ ଖେଳାଯିବାକୁ ଥିବା ଏହି ମ୍ୟାଚ୍ରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସହିତ ଚୁକ୍ତି କରିଥିବା ଖେଳାଳିମାନେ ଡୋପ୍ ଟେଷ୍ଟର ସମ୍ମୁଖୀନ ହେବେ। ବିସିସିଆଇର ଦାବି ଅନୁସାରେ ଯୋଗ୍ୟ ଡାକ୍ତର ବା ମେଡିକାଲ ପ୍ରାକ୍ଟିସନରମାନେ ଲିଡ ଡୋପ୍ କଣ୍ଟ୍ରୋଲ ଅଫିସର (ଏଲ୍ଡିସିଓ) ଭାବେ ଖେଳାଳିଙ୍କ ପରୀକ୍ଷା ନେବେ।
ନିକଟରେ ବିସିସିଆଇ କ୍ରିକେଟ ଅପରେଶନ ଜେନେରାଲ ମ୍ୟାନେଜର ସବା କରିମ ଓ ଆଣ୍ଟି ଡୋପିଂ ୟୁନିଟ୍ ମୁଖ୍ୟ ଡଃ ଅଭିଜିତ ସାଲଭି ନାଡ଼ା ଡାଇରେକ୍ଟର ଜେନେରାଲ ନବୀନ ଅଗ୍ରଓ୍ବାଲଙ୍କ କେତେକ ବରିଷ୍ଠ ଅଧିକାରୀଙ୍କୁ ଭେଟିଥିଲେ ଓ ଏ ନେଇ ରୋଡ ମ୍ୟାପ୍ ପ୍ରସ୍ତୁତ କରିଥିଲେ। ବିସିସିଆଇ ସହଯୋଗରେ ଦୁଲୀପ ଟ୍ରଫିରୁ ହିଁ ଡୋପ ଟେଷ୍ଟ ଆରମ୍ଭ ହେବ ବୋଲି ନାଡ଼ା ତରଫରୁ ଆନୁଷ୍ଠାନିକ ଭାବେ କୁହାଯାଇଛି। ତେବେ ବେଙ୍ଗାଲୁରୁରେ ଏବେ ଇଣ୍ଡିଆ ବ୍ଲ୍ୟୁ ଓ ଇଣ୍ଡିଆ ଗ୍ରୀନ୍ ମଧ୍ୟରେ ଚାଲିଥିବା ଦୁଲୀପ ଟ୍ରଫିର ଉଦ୍ଘାଟନୀ ମ୍ୟାଚ୍ରେ ଡୋପ୍ ଟେଷ୍ଟ କରାଯିବ ନାହିଁ ବୋଲି ଆଶା କରାଯାଉଛି। ଏହା ଆସନ୍ତା ୨୩ ତାରିଖରେ ଆରମ୍ଭ ହେବାକୁ ଥିବା ପରବର୍ତ୍ତୀ ମ୍ୟାଚ୍ରେ ଆରମ୍ଭ କରାଯିବ।
ଇତିମଧ୍ୟରେ ବିସିସିଆଇ ପୂରା ଘରୋଇ ସେସନର କାର୍ଯ୍ୟସୂଚୀ ପ୍ରଦାନ କରିଛି। ଫଳରେ ନାଡ଼ା ତା’ର କ୍ରିକେଟ ଟେଷ୍ଟିଂ କ୍ୟାଲେଣ୍ଡର ପ୍ରସ୍ତୁତ କରିବାକୁ ସକ୍ଷମ ହେବ। ଦୁଲୀପ ଟ୍ରଫି ଏବେ ଆରମ୍ଭ ହୋଇସାରିଛି। ଫଳରେ ଡୋପ୍ ଟେଷ୍ଟ ଆଗାମୀ ମ୍ୟାଚ୍ରେ ହେବ ବୋଲି ଆଶା କରାଯାଉଛି। ତେବେ ଟାର୍ଗେଟ କିମ୍ବା ରାଣ୍ଡମ ଟେଷ୍ଟିଂ କରାଯିବ ସେ ନେଇ କିଛି ସ୍ପଷ୍ଟ କରାଯାଇ ନାହିଁ। କେବଳ ମ୍ୟାଚ୍ ଦିନ କେତୋଟି ପରୀକ୍ଷା କରାଯିବ ବୋଲି ସାଲଭି କହିଛନ୍ତି।
