ବାରିପଦା ଅଫିସ, ୧୧ା୪-କରୋନା ସଂକ୍ରମଣକୁ ରୋକିବା ଲାଗି ସାରା ଦେଶରେ ଲକ୍ଡ଼ାଉନ ଜାରି ରହିଛି। ଏଥିଯୋଗୁ ଜନଜୀବନ ପ୍ରଭାବିତ ହେଉଥିବା ବେଳେ ଚାଷୀମାନେ ଚିନ୍ତାରେ ପଡ଼ିଛନ୍ତି। ଅଭାବୀ ବିକ୍ରି ସାଙ୍ଗକୁ ଫସଲ ନଷ୍ଟ ହେବା ଯୋଗୁ ଚାଷୀଙ୍କ ମେରୁଦଣ୍ଡ ଭାଙ୍ଗିଦେଇଛି। ଏଭଳି ଦୁର୍ଦ୍ଦଶାର ଶିକାର ହୋଇଛନ୍ତି ମୟୂରଭଞ୍ଜ ଜିଲାର କ୍ୟାପିସିକମ୍ ଚାଷୀ।
ବିଶୋଇ ବ୍ଲକ ଅଧୀନ ମଣଦା ଗ୍ରାମର ସର୍ବେଶ୍ୱର ବେହେରା ୨.୫ ଏକର ଜମିରେ କ୍ୟାପସିକମ୍ ଚାଷ କରିଛନ୍ତି। ପ୍ରତିଦିନ କୁଇଣ୍ଟାଲ କୁଇଣ୍ଟାଲ କ୍ୟାପସିକମ୍ ତୋଳା ହେଉଥିବା ବେଳେ ବିକ୍ରି ହୋଇ ନ ପାରି ତାହା ନଷ୍ଟ ହେଉଛି। ଟମାଟୋ, ବାଇଗଣ ଲଗାଇ ସାରିବା ପରେ ବାହାଘର ସିଜିନକୁ ଆଖି ଆଗରେ ରଖି ପ୍ରତିବର୍ଷ ସେ କ୍ୟାପସିକମ୍ ଚାଷ କରନ୍ତି। ମାର୍ଚ୍ଚ ମାସରେ କ୍ୟାପସିକମ ଫଳୁଥିବାରୁ ସର୍ବେଶ୍ୱର ସେଥିରୁ ଭଲ ଦି’ପଇସା ରୋଜଗାର କରନ୍ତି। ଏପରିକି ସେ ପ୍ରତିବର୍ଷ ଚାଷ ହେଉଥିବା ଆୟରେ ପରିବାର ପ୍ରତିପୋଷଣ କରିବା ସହ ରିଟର୍ଣ୍ଣ ଫାଇଲ ମଧ୍ୟ କରନ୍ତି। ଏବେ କରୋନାକୁ ନେଇ ଲକଡାଉନ କରାଯାଇଥିବାରୁ ଫସଲ ନଷ୍ଟ ହେଉଥିବା ସେ ପ୍ରକାଶ କରିଛନ୍ତିି। ପୂର୍ବରୁ ସେ ପ୍ରତିଦିନ ହାରାହାରି ୧୦ କୁଇଣ୍ଟାଲ କ୍ୟାପସିକମ୍ ବାରିପଦା, ବାଲେଶ୍ୱର ଓ କଲିକତାକୁ ପଠାଇଥାନ୍ତି। ଏବେ କେବଳ ବାରିପଦାକୁ କ୍ୟାପସିକମ ପଠାଉଛନ୍ତି। ୨/୩ ଦିନରେ ଥରେ ୬ କୁଇଣ୍ଟାଲ କ୍ୟାପସିକମ୍ ସେ ବାରିପଦାକୁ ପଠାଉଥିବା ବେଳେ ବର୍ତ୍ତମାନ ଅଭାବୀ ବିକ୍ରି ଦେଖା ଦେଇଥିବାରୁ ଆଗ ଭଳି ବେପାର ହେଉ ନ ଥିବା କହିଛନ୍ତି। ଗଛରେ ଫଳ ଧରିଥିଲେ ମଧ୍ୟ କାହିଁକି ତୋଳି ଟଙ୍କା ଖର୍ଚ୍ଚ କରିବେ ଭାବି ନ ତୋଳି ଛାଡ଼ି ଦେଉଥିବାରୁ ତାହା ଗଛରେ ନଷ୍ଟ ହେଉଛି। ପୂର୍ବରୁ କ୍ୟାପସିକମ୍ କିଲୋ ୪୫ ଟଙ୍କାରେ ବିକ୍ରି କରୁଥିବା ବେଳେ ଏବେ ୧୨ଟଙ୍କାରେ ସେ ବେପାରୀମାନଙ୍କୁ ଦେଉଛନ୍ତି। ତୋଳିବା ଖର୍ଚ୍ଚ, ପ୍ୟାକିଂ, ଗାଡ଼ି ଭଡ଼ା ଆଦି ଖର୍ଚ୍ଚକୁ ବାଦ୍ ଦେଲେ ୧ କିଲୋ କ୍ୟାପସିକମ୍କୁ ମାତ୍ର ୫ରୁ ୬ଟଙ୍କାରେ ବିକ୍ରି କରୁଥିବା ସର୍ବେଶ୍ୱର କୁହନ୍ତି । ତେଣୁ ସରକାର ତାଙ୍କ ଭଳି ଫସଲ କ୍ଷତି ହୋଇଥିବା ଚାଷୀମାନଙ୍କୁ ସହାୟତା ଯୋଗାଇ ଦେବା ପାଇଁ ସେ ଦାବି କରିଛନ୍ତି।
