ଦାରିଙ୍ଗବାଡ଼ି,୨୮।୧୨(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ଶନିବାର ଶୀତ ବୃଦ୍ଧି ପାଇଛି । ସକାଳ ୮ଟା ସୁଦ୍ଧା ସର୍ବନିମ୍ନ ତାପମାତ୍ରା ୭ ଡିଗ୍ରୀ ରହିଥିବା ବେଳେ ସନ୍ଧ୍ୟା ୫ଟା ସୁଦ୍ଧା ୯ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି । କୋହଲା ପବନ ସାଙ୍ଗକୁ ଦିନରେ ମଧ୍ୟ ଶୀତ ଅନୁଭୂତ ହେଉଥିବାରୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି। ସେହିପରି ସକାଳ ୯ଟା ପର୍ଯ୍ୟନ୍ତ କୁହୁଡ଼ି ଯୋଗୁ ଗାଡ଼ିମଟର ଚଳାଚଳରେ ବାଧାସୃଷ୍ଟି ହୋଇଛି । ଶୀତର ମଜା ନେବା ପାଇଁ ରାଜ୍ୟ ତଥା ରାଜ୍ୟ ବାହାରର ଏକାଧିକ ସ୍ଥାନରୁ ପର୍ଯ୍ୟଟକ ଦାରିଙ୍ଗବାଡ଼ିର ହିଲ୍ଭିୟୁ ପାର୍କ ସମେତ ମିଡିୟୁବାନ୍ଦା ଜଳପ୍ରପାତ, କିରିକୁଟି ଲଭର୍ସପଏଣ୍ଟ, ନେଚରପାର୍କ, ଡୁଲୁରୀ ପାଇନ ବଣରେ ଭିଡ଼ ଦେଖିବାକୁ ମିଳିଛି। ଏଭଳି ଶୀତ ଅନୁଭୁତ ହେଲେ ଦାରିଙ୍ଗବାଡ଼ି ଅଞ୍ଚଳରେ ତୁଷାରପାତ ହେବା ଆଶଙ୍କା କରାଯାଇଛି । ପ୍ରବଳ ଶୀତ ଯୋଗୁ ସ୍ଥାନୀୟ ଲୋକେ କାମଧନ୍ଦା ପାଇଁ ବାହାରକୁ ଯିବା କଷ୍ଟକର ହୋଇପଡୁଥିବା ବେଳେ ଗରିବ ଲୋକଙ୍କୁ କମ୍ବଳ ସହ ଶୀତବସ୍ତ୍ର ପ୍ରଦାନ ପାଇଁ ବିଭିନ୍ନ ମହଲରେ ଦାବି ହୋଇଛି।
