ନୂଆଦିଲ୍ଲୀ, ୨୮।୭ (ପି.ଟି.)- ଏସିଆନ୍ ଚାମ୍ପିୟନଶିପ୍ ରୌପ୍ୟ ପଦକ ବିଜେତା ଆଶିଷ କୁମାର କ୍ୟାରିୟରର ପ୍ରଥମ ଅନ୍ତର୍ଜାତୀୟ ସ୍ବର୍ଣ୍ଣ ପଦକ ଜିତିଛନ୍ତି। ଥାଇଲାଣ୍ଡ ରାଜଧାନୀ ବ୍ୟାଙ୍କକ୍ଠାରେ ଶନିବାର ଶେଷ ହୋଇଥିବା ଥାଇଲାଣ୍ଡ୍ ଓପନ୍ ଇଣ୍ଟରନ୍ୟାଶନାଲ ବକ୍ସିଂ ଟୁର୍ନାମେଣ୍ଟରେ ଆଶିଷ ଏହି ସଫଳତା ପାଇଛନ୍ତି। ଏଥିସହ ଏହି ସମ୍ମାନଜନକ ପ୍ରତିଯୋଗିତାରେ ଭାରତ ୮ ପଦକ ସହ ଅଭିଯାନ ଶେଷ କରିଛି। ଯେଉଁଥିରେ ଗୋଟିଏ ସ୍ବର୍ଣ୍ଣ, ୪ ରୌପ୍ୟ ଓ ୩ ବ୍ରୋଞ୍ଜ ପଦକ ରହିଛି।
ଅନ୍ତିମ ଦିବସରେ ପୁରୁଷ ୭୫ କିଗ୍ରା ବିଭାଗରେ ଆଶିଷ ୫-୦ରେ କୋରିଆର କିମ୍ ଜିନ୍ଜାଏଙ୍କୁ ପରାସ୍ତ କରିଥିଲେ। ସେହିଭଳି ଭାରତୀୟ ବକ୍ସର ଶନିବାର ୪ ରୌପ୍ୟ ପଦକ ମଧ୍ୟ ଜିତିଥିଲେ। ବିଶ୍ୱ ଜୁନିୟର ଚାମ୍ପିୟନ ନିଖାତ୍ ଜରୀନ୍ (୫୧ କିଗ୍ରା), ଏସିଆନ ଚାମ୍ପିୟନଶିପ୍ ରୌପ୍ୟ ପଦକ ବିଜେତା ଦୀପକ (୪୯ କିଗ୍ରା), ଗିବି ବକ୍ସିଂ ରୌପ୍ୟ ପଦକ ବିଜେତା ମହମ୍ମଦ ହସମୁଦ୍ଦିନ (୫୬ କିଗ୍ରା) ଓ ଇଣ୍ଡିଆ ଓପନ୍ ରୌପ୍ୟ ପଦକ ହାସଲକାରୀ ବ୍ରଜେଶ ଯାଦବ (୮୧) ଫାଇନାଲରେ ହାରି ରୌପ୍ୟରେ ସନ୍ତୁଷ୍ଟ ରହିଥିଲେ। ଏଥିପୂର୍ବରୁ ଷ୍ଟ୍ରାଣ୍ଡଜା କପ୍ ରୌପ୍ୟ ପଦକ ବିଜେତା ମଞ୍ଜୁ ରାଣୀ (୪୮ କିଗ୍ରା) ସେମିଫାଇନାଲରୁ ବିଦାୟ ନେଇ ବ୍ରୋଞ୍ଜ ପଦକ ପାଇଥିଲେ। ପୁରୁଷ ୬୯ କିଗ୍ରା ବର୍ଗରେ ଆଶିଷ ଓ ମହିଳା ୭୫ କିଗ୍ରାରେ ଭାବ୍ୟବତୀ କଚାରି ମଧ୍ୟ ବ୍ରୋଞ୍ଜ ପଦକ ହାସଲ କରିଥିଲେ।
