ଭଞ୍ଜନଗର,୨୧ା୧୧(ଡି.ଏନ.ଏ.)-ଭଞ୍ଜନଗର ସହର ମୁଖ୍ୟ ସଡ଼କରୁ ପ୍ରଶାସନ ପକ୍ଷରୁ ଉଠା ବ୍ୟବସାୟୀଙ୍କୁ ଉଚ୍ଛେଦ କରାଯାଉଛି। ଏହି ପ୍ରକ୍ରିୟା ବୁଧବାରଠାରୁ ଆରମ୍ଭ ହୋଇଛି। ଉଚ୍ଛେଦ ଦ୍ୱାରା ରାସ୍ତା ପ୍ରଶସ୍ତୀକରଣ ହୋଇଥିବାରୁ ଟ୍ରାଫିକ ସମସ୍ୟା କିଛି ମାତ୍ରାରେ ଦୂର ହୋଇଛି। ତଥାପି ମୁଖ୍ୟ ସଡ଼କରେ ଥିବା କିଛି ସ୍ଥାୟୀ ଦୋକାନ ସମ୍ମୁଖରେ ପାର୍କିଂ ପାଇଁ ସ୍ଥାନ ରଖାଯାଇ ନ ଥିବାରୁ ଅଧିକାଂଶ ସମୟ ଟ୍ରାଫିକ୍ ସମସ୍ୟା ରହୁଛି। ଛୋଟ ବ୍ୟବସାୟୀଙ୍କୁ ଉଚ୍ଛେଦ କରାଯାଉଥିବା ବେଳେ ବଡ଼ ବ୍ୟବସାୟୀଙ୍କ ବିରୋଧରେ ସେଭଳି କୌଣସି ପଦକ୍ଷେପ ନିଆଯାଉନାହିଁ। ପ୍ରଶାସନର ଏଭଳି ନୀତି ନେଇ ଉଠା ବ୍ୟବସାୟୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ମଙ୍ଗଳବାର ସେମାନେ ଉପ ଜିଲାପାଳ ରାଜେନ୍ଦ୍ର କୁମାର ମିଞ୍ଜଙ୍କୁ ଭେଟି ଥଇଥାନ କରିବା ପାଇଁ ନିବେଦନ କରିଛନ୍ତି। ଉପଜିଲାପାଳ ମଧ୍ୟ ଥଇଥାନ ପାଇଁ ପ୍ରତିଶ୍ରୁତି ଦେଇଥିଲେ। ଏଭଳି ସ୍ଥିତିରେ ବୁଧବାର ପ୍ରଶାସନ ପକ୍ଷରୁ ମୁଖ୍ୟ ସଡ଼କରୁ ସମସ୍ତ ଉଠା ବ୍ୟବସାୟୀଙ୍କୁ ଉଚ୍ଛେଦ କରାଯାଇଥିବାରୁ କେତେକ ସ୍ଥାନରେ ବ୍ୟବସାୟୀ ଓ ଏନଏସି କର୍ମଚାରୀଙ୍କ ମଧ୍ୟରେ ଯୁକ୍ତିତର୍କ ହୋଇଥିବା ଦେଖାଯାଇଥିଲା। ଏହା ପ୍ରତିବାଦରେ ସହର ସମସ୍ତ ଅଞ୍ଚଳରେ ଥିବା ଉଠା ବ୍ୟବସାୟୀମାନେ ବୁଧବାର ଦୋକାନ ବନ୍ଦ କରି ଆନ୍ଦୋଳନ କରିଥିଲେ। ଉଠା ବ୍ୟବସାୟୀଙ୍କୁ ତୁରନ୍ତ ଥଇଥାନ କରା ନଗଲେ ଶତାଧିକ ଗରିବ ରୋଜଗାର ହରାଇବେ। ତେଣୁ ପ୍ରଶାସନ ଏନେଇ ଆବଶ୍ୟକ ପଦକ୍ଷେପ ନେବାକୁ ଦାବି ହୋଇଛି। ଅନ୍ୟପକ୍ଷରେ ଜଳସମ୍ପଦ ବିଭାଗ କାର୍ଯ୍ୟାଳୟ ନିକଟରେ କପଡ଼ା ଦୋକାନ କରିଥିବା ଉଠା ବ୍ୟବସାୟୀମାନେ ସାବିତ୍ରୀ ମହିଳା କଲେଜ ରାସ୍ତାରେ ବୁଧବାରଠାରୁ ଦୋକାନ କରିଛନ୍ତି।
ଉକ୍ତ ରାସ୍ତାରେ ଦୋକାନକୁ ନେଇ ଆଗାମୀ ଦିନରେ ବିବାଦ ଦେଖାଦେବା ସମ୍ଭାବନା ରହିଛି। କାରଣ ଗତ ମାସରେ ସାବିତ୍ରୀ ମହିଳା କଲେଜ ଛାତ୍ରୀମାନେ କେତେକ ଉଠା ଦୋକାନୀଙ୍କ ପାଇଁ ଉପୁଜିଥିତ୍ବା ସମସ୍ୟା ସମ୍ପର୍କରେ ପ୍ରଶାସନକୁ ଅବଗତ କରାଇଥିଲେ। ତେଣୁ ବିବାଦ ଆସିବା ପୂର୍ବରୁ ପ୍ରଶାସନ ପକ୍ଷରୁ ଉଠା ବ୍ୟବସାୟୀମାନଙ୍କୁ ଥଇଥାନ କରାଯିବା ଆବଶ୍ୟକ।
