ରଣପୁର,୧୧।୮(ସ୍ବ.ପ୍ର.)-ନୟାଗଡ ଜିଲା ରଣପୁର ବନବିଭାଗ ଅନ୍ତର୍ଗତ ତାଳକଣି ଗାଁରେ ଶନିବାର ବାଘ ଆତଙ୍କ ସୃଷ୍ଟି ହୋଇଛି। ଗ୍ରାମ ନିକଟସ୍ଥ ଛାଟକୁମ୍ଭ ପାହାଡ ପାଖ ମଇଁଷି ଖୋଲ ଜଙ୍ଗଲରେ ଶନିବାର ଅପରାହ୍ନ ପ୍ରାୟ ୪ଟାରେ ଏକ ବାଘ ବୁଲୁଥିବା ଦେଖିବାକୁ ମିଳିଥିଲା । ଜଙ୍ଗଲକୁ ଯାଇଥିବା କେତେକ ଗ୍ରାମବାସୀ ବାଘକୁ ଦେଖି ଭୟଭୀତ ହୋଇ ଗାଁରେ ଆସି ଜଣାଇଥିଲେ। ଫଳରେ ଗ୍ରାମରେ ଭୟର ବାତାବରଣ ଦେଖାଦେଇଛି। ସେହିପରି ଅପରାହ୍ନ ପ୍ରାୟ ସାଢ଼େ ୫ଟାରେ କେତେକ ମହିଳା ଶୌଚ ହେବାକୁ ପାହାଡ ନିକଟକୁ ଯାଉଥିବାବେଳେ ବାଘକୁ ଦେଖି ଭୟରେ ପଳାଇ ଆସିଥିଲେ । ଖବର ପାଇ ରଣପୁର ବନ ଅଧିକାରୀ ଶରତ ଶତପଥୀ ବିଭାଗୀୟ କର୍ମଚାରୀଙ୍କୁ ଉକ୍ତ ଅଞ୍ଚଳକୁ ପଠାଇଥିବା ବେଳେ ଜଙ୍ଗଲରେ ବାଘ ଥିବା ସ୍ବୀକାର କରିଛନ୍ତି । ବାଘଟି କଲରାପତରିଆ ବୋଲି ଜଣାପଡିଛି । ତେବେ କେହି ଜଙ୍ଗଲକୁ ନ ଯିବାକୁ ବାରଣ କରିବା ସହ ଏଥିନେଇ ଭୟର କାରଣ ନ ଥିବା ବନଅଧିକାରୀ ଶତପଥୀ ସୂଚନା ଦେଇଛନ୍ତି।
