ନୟାଗଡ଼ ଅଫିସ,୨୩ା୨: ଶୁକ୍ରବାର ନୟାଗଡ ବନଖଣ୍ଡ ପଞ୍ଚରିଡା ରେଞ୍ଜ ତଲାରିବନ୍ଧ ଅଞ୍ଚଳରୁ ବନ ବିଭାଗ ଜବତ କରିଥିଲା ଏକ ଜାଳେଣି କାଠ ବୋଝେଇ ଟ୍ରାକ୍ଟର। ଜବତ ପରେ ଏଥିରେ ତଳେ ପଟା ଉପରେ ଜାଳେଣି କାଠ ଥିବା ଜଣାପଡିଥିଲା। ହେଲେ ବନବିଭାଗ ନିଜ ହେପାଜତକୁ ନେବା ବେଳକୁ ପଟା ଗାଏବ ହୋଇଯାଇଥିଲା। କେବଳ ଜାଳେଣି କାଠ ଥିଲା। ଶନିବାର ଜାଳେଣି କାଠ ଥିବା ଦର୍ଶାଇ ଟ୍ରାକ୍ଟରକୁ ଛାଡି ଦିଆଯାଇଛି। ଏ ନେଇ ପଞ୍ଚରିଡା ରେଞ୍ଜର ଅର୍ଚ୍ଚନା ନାୟକଙ୍କୁ ପଚାରିବାରୁ ସେ ପ୍ରଥମେ ଜାଳେଣି କାଠ ଓ ପଟା ବୋଝେଇ ଗାଡି ଜବତ ହୋଇ ନ ଥିବା କହିଥିଲେ। ପରେ କହିଥିଲେ, ଲେଙ୍କୁଡିପଡା ଅଞ୍ଚଳରୁ ଜାଳେଣି କାଠ ବୋଝେଇ ଗାଡି ଜବତ ହୋଇଛି। ପୁଣି ଥରେ ତୁଲୁବି ଅଞ୍ଚଳରୁ କେବଳ ଜାଳ କାଠ ବୋଝେଇ ଗାଡି ଜବତ ହୋଇଥିଲା, ଯାହା ସ୍ଥାନୀୟ ବନ ସୁରକ୍ଷା ସମିତିର ଥିଲା। ଆମେ ଭୁଲ୍ବଶତଃ ଧରିଥିଲୁ। ଜାଳେଣି କାଠ ଯୋଗୁ ଛାଡିଦେଇଛୁ। ସେଥିରେ ପଟା ନ ଥିଲା ବୋଲି କହିଥିଲେ। ତେବେ ରେଞ୍ଜ ଅଫିସରଙ୍କ କଥାରେ କେତେ ସତ୍ୟତା ରହିଛି ତାହା ତଦନ୍ତସାପେକ୍ଷ ବୋଲି ମତପ୍ରକାଶ ପାଉଛି।
ହାତଗୁଞ୍ଜା ଦେଲେ ବଦଳିଯାଉଛି ନିୟମ
ପଞ୍ଚରିଡା ରେଞ୍ଜ ଅଞ୍ଚଳରେ କାଠ ମାଫିଆମାନେ ସକ୍ରିୟ ହୋଇଉଠିଛନ୍ତି। ହାତଗୁଞ୍ଜା ଦେଲେ ଏଠାରେ ନିୟମ ବଦଳି ଯାଉଥିବା ଅଭିଯୋଗ ଉଠିଛି। ଏପରି କି ୫୬ ଧାରା ଲାଗୁ ହେବାକୁ ଥିବା ଗାଡିକୁ ମଧ୍ୟ ଛାଡି ଦିଆଯାଉଛି ବୋଲି କୁହାଯାଉଛି। ଜଣେ କାଠ ମାଫିଆଙ୍କ ସୂଚନା ଅନୁସାରେ ତଲାରିବନ୍ଧ ଅଞ୍ଚଳରୁ ପଟା ଓ ଜାଳେଣି କାଠ ବୋଝେଇ ଟ୍ରାକ୍ଟର ଜବତ ହେଲା। ହେଲେ ହାତଗୁଞ୍ଜା ଦେବାରୁ ପଟା ଗାଏବ କରି କେବଳ ଜାଳେଣି କାଠ କରାଗଲା। ତେବେ ସବୁ ଘଟଣା ରେଞ୍ଜ ଅଫିସର ଜାଣିପାରୁ ନାହାନ୍ତି। କିଛି ବନ କର୍ମଚାରୀ ହାତ ଗରମ କରି ତାଙ୍କ ନଁାରେ ଅପବାଦ କରୁଛନ୍ତି। ମହିଳା ରେଞ୍ଜ ଅଫିସରଙ୍କ ସମୟରେ କାଠ ମାଫିଆ କାଠଚୋରିକୁ ବଢ଼ାଇଛନ୍ତି । ଏଥିରେ କିଛି ବନ କର୍ମଚାରୀ ସାମିଲ ଅଛନ୍ତି । ତେବେ ରେଞ୍ଜ ଅଫିସର ବନ କର୍ମଚାରୀଙ୍କୁ ବିଶ୍ୱାସକୁ ନ ନେଇ ସେମାନଙ୍କ କାର୍ଯ୍ୟକୁ ଯାଞ୍ଚ କରାଇଲେ ସତ୍ୟାସତ୍ୟ ଜାଣିପାରିବେ ବୋଲି କହିଛନ୍ତି।
ବରବରା ଜଙ୍ଗଲରୁ ଆସୁଛି କାଠ
ଖୋର୍ଦ୍ଧା ବନଖଣ୍ଡର ବରବରା ଓ ଧୂଅଁାନଳୀ ସଂରକ୍ଷିତ ଜଙ୍ଗଲରୁ ଶାଳ ଓ ଶାଗୁଆନ କାଠ ହଳଯୋଗେ କଜଳାଇପଲ୍ଲୀ ଦେଇ ଆସୁଛି। ତେବେ ବନ ବିଭାଗ ପକ୍ଷରୁ ଚଢ଼ାଉ କରାଯାଉ ନ ଥିବା ଅଭିଯୋଗ ହେଉଛି। ସପ୍ତାହର ୨ରୁ ୪ଦିନ ଏକାସମୟରେ ୧୦ରୁ ୧୫ ହଳ ଯୋଗେ କାଠ ଆସୁଛି। ତେବେ ବନ ବିଭାଗ ପକ୍ଷରୁ ଧରାପଗଡ କରାଯାଉ ନ ଥିବାରୁ ସାଧାରଣରେ ସନ୍ଦେହ ସୃଷ୍ଟି ହେଉଛି।
