ଭବାନୀପାଟଣା,୨୪।୩ (ଡି.ଏନ୍.ଏ.)-
ବଜାର ବେବସ୍ତା ଅଭାବୁ ଭାବାନୀପାଟଣା ଆର ଧର୍ମଗଡ଼ ଉପଖଣ୍ଡର ଚରଭୁଜ ଚାଷୀ ଯେନ୍ ହିସାବେ ଲାଭ ପାଏବାର କଥା ନାଇଁ ପାଉଥିବାର ଜନାପଡ଼ିଛେ। ଇତାର ସୁଯୋଗ ନେଇ ବେପାରୀମାନେ ଚାଷୀକରନୁ ଅଲପ୍ ଦାମରେ ତରଭୁଜ ଘିନି ଭିନେ ଭିନେ ଜିଲାରେ ଦୁଇଗୁନାରେ ବିକି ମାଲେମାଲ ହେଉଛନ୍। ୮ରୁ ୧୦ ବଛର ହେଲା ଏନ୍ତା ଅବେବସ୍ତା ଲାଗି ଅଂଚଲର ତରଭୁଜ ଚାଷୀ କ୍ଷତି ସହୁଛନ୍। ହେଲେ ଚାଷୀକର ସୁଆର୍ଥ ଲାଗି ସରକାରୀ ହିସାବେ କିଛି ପଦକ୍ଷେପ ନାଇଁ ନିଆଯାଉଥିବାର ଚାଷୀମାନେ ଅଭିଯୋଗ କରିଛନ୍। ଏନ୍ତାଥି ଅନେକ ଚାଷୀ ତରଭୁଜ ଚାଷ୍ରୁ ମୁହୁଁ ଫିରେଇ ନେଉଥିବାର ଦେଖବାକେ ମିଲୁଛେ। ଭବାନୀପାଟଣା ଆର ଧର୍ମଗଡ଼ ଉପଖଣ୍ଡ ଦେଇ ବୁହିଯାଇଥିବାର ହରିହର ଯୋରର ଦୁଇ ଖଁଡ଼ି ଆର ଭିନେ ଭିନେ ଜାଗାରେ ଚାଷୀ ଶହ ଶହ ଏକର ତରଭୁଜ ଚାଷ୍ କରୁଛନ୍। ଚଲତି ବଛର ବି ଭବାନୀପାଟଣା ଆର ଧର୍ମଗଡ଼ ବ୍ଲକର ଭିନେ ଭିନେ ଗଁାରେ ଅନେକ ଚାଷୀ ତରଭୁଜ ଚାଷ୍ କରିଛନ୍। ହେଲେ ଚାଷୀ ଅମଲ ତରଭୁଜକେ ଇ ହାଟ୍ ସେ ହାଟ୍ ବିକି ନେବାକେ ସମିଆ ନାଇଁ ପାଉଥିଲାବେଲେ ବେପାରୀମାନେ ଇତାର ଫାଏଦା ନେଉଛନ୍। ବେପାରିମାନେ ଚାଷୀର ଖେତ୍କେ ଯାଇ ସସ୍ତାରେ ତରଭୁଜ ମୂଲେଇ ଘିନି ଆନୁଛନ୍। ଯେନ୍ଟା ବେପାରୀମାନେ ଉନିଅଁାନେ ସେ ତରଭୁଜକେ ଦୁଇଗୁନା ଦାମ୍ରେ ବିକୁଛନ୍। ଚାଷୀକଁର କହେବାର ହିସାବେ ବେପାରୀମାନେ ଚାଷୀକରନୁ ତରଭୁଜ କେ.ଜି. ପିଛା ୧୦ରୁ ୧୨ଟଁକା ଭାଉରେ ଘିନୁଛନ୍। ସେମାନେ ସେଟାକେ ଭିନେ ଭିନେ ଜାଗାରେ କେ.ଜି. ପିଛା ୪୦ରୁ ୫୦ଟଁକାରେ ବିକୁଛନ୍। ସେନ୍ତା ଅଦିନିଅଁା ବରଷା ଆର କରାମାଡ଼ ଭଏରେ ଚାଷୀ ବି ଅନେକ ସମିଆରେ ସସ୍ତାରେ ବେପାରିକରନେ ତରଭୁଜ ନପେଇ ଦେଉଥିବାର କହିଛନ୍। ଇଥର ଜାନୁୟାରୀ ଆର ଫେବୃଆରୀରେ ଅନେକ ବରଷା ଆର କରାମାଡ଼ ଲାଗି ଅନେକ ତରଭୁଜ ଚାଷୀ କ୍ଷତି ସହିଛନ୍। ଇଆଡ଼େ ଅମଲ ତରଭୁଜକେ ଚାଷୀ ଦିନାକେତେ ସାଇତି ରଖବାର ଲାଗି ଅଂଚଲରେ ଶୀତଲଭଣ୍ଡାରଟେ ନଁାଇଁନ। ତରଭୁଜ ଚାଷୀମାନେ ବାରବାର ବଜାର ବେବସ୍ତା କରବାକେ ଦାବି କରିଆସୁଥିଲେ ବି କେହି ନାଇଁ ଶୁନୁଥିବାର ଅଭିଯୋଗ କରିଛନ୍। ଇଠାନେ ତରଭୁଜ ଚାଷୀକଁର ସୁଆର୍ଥ ଲାଗି କୃଷି, ଉଦ୍ୟାନ ବିଭାଗ ଆର ନିୟନ୍ତ୍ରିତ ବଜାର କମିଟି ତରଫୁ ପଦକ୍ଷେପ ନେବାର ନିହାତି ଜରୁରି ବଲି ସାଧାରନରେ ମତ ପରକାଶ ପାଉଛେ।
