ବାରିପଦା ଅଫିସ, ୨୩।୨-ବାରିପଦା ଟାଉନରେ ଜଣେ ଡେଲିଭରି ବୟଠାରୁ ଦୁଇ ଜଣ ଯୁବକ ୮ମୋବାଇଲ ଠକି ନେଇଥିବା ନେଇ ଥାନାରେ ଅଭିଯୋଗ ହୋଇଛି। ପୋଲିସ ଅଭିଯୋଗକୁ ଭିତ୍ତି କରି ଏହି ଘଟଣାରେ ସମ୍ପୃକ୍ତ ଥିବା ଦୁଇ ଜଣଙ୍କୁ ଯାଜପୁର ଓ ଭୁବନେଶ୍ୱରରୁ ଉଠାଇ ଆଣିଛି। ରବିବାର ପଚରାଉଚରା କରାଯିବା ପରେ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଥାନାରୁ ସୂଚନା ମିଳିଛି। ସୂଚନା ଅନୁସାରେ ଟାଉନ ଥାନା ଅନ୍ତର୍ଗତ ବିଜୟ ରାମଚନ୍ଦ୍ରପୁରର ଦେବବ୍ରତ ପଲେଇ ଏକ ସଂସ୍ଥାର ଡେଲିଭରି ବୟ ଭାବେ କାର୍ଯ୍ୟ କରନ୍ତି। ଗତ ୧୭ ତାରିଖରେ ଜଣେ ଯୁବକ ୧୦ଟି ମୋବାଇଲ ଅର୍ଡର କରିଥିଲେ। ଅମ୍ବିକା ମନ୍ଦିର ଛକ ନିକଟରେ ରହୁଥିବା ଉକ୍ତ ଯୁବକ ଜଣଙ୍କ ଡେଲିଭରି ବୟଠାରୁ ସମସ୍ତ ମୋବାଇଲ୍ ରଖି ଟଙ୍କା ଦେଇଥିଲେ।
ଏହା ପରେ ମୋବାଇଲ ଅର୍ଡର କରିଥିବା ଯୁବକ ଆଉ ଜଣେ ଯୁବକଙ୍କୁ ତାଙ୍କ ଭାଇ ବୋଲି ପରିଚୟ ଦେଇ ଡେଲିଭରି ବୟ ଦେବବ୍ରତଙ୍କ ସହିତ ବନ୍ଧୁତା କରିବା ସହ ତାଙ୍କ ନମ୍ବର ନେଇଥିଲେ। କିଛି ସମୟ ପରେ ଯୁବକ ଜଣଙ୍କ ଡେଲିଭରି ବୟଙ୍କୁ ଡାକି ୮ଟି ମୋବାଇଲ ପ୍ୟାକେଟ୍ ଫେରାଇ ଦେଇଥିଲେ। ଫଳରେ ଦେବବ୍ରତଙ୍କଠାରୁ ସେ ୨ଲକ୍ଷ ୮୮ ହଜାର ଟଙ୍କା ଫେରସ୍ତ ନେଇ ଯାଇଥିଲେ। ମାତ୍ର ଦେବବ୍ରତ ଡିପୋରେ ଯାଇ ଉକ୍ତ ପ୍ୟାକେଟ ଗୁଡ଼ିକ ଡିପୋଜିଟ କରିବାପରେ ସେଥିରେ ମୋବାଇଲ ବଦଳରେ ସାବୁନ ଥିବା ଜାଣିବାକୁ ପାଇଥିଲେ। ଏହାପରେ ସେ ଯୁବକଙ୍କ ନମ୍ବରକୁ ଯୋଗାଯୋଗ କରିଥିଲେ ମଧ୍ୟ ଫୋନ୍ ଲାଗି ନ ଥିଲା। ଡେଲିଭରି କରିଥିବା ଉକ୍ତ ସ୍ଥାନରେ ପହଞ୍ଚି ସେ ଖୋଜାଖୋଜି କରିଥିଲେ ମଧ୍ୟ ଦୁଇ ଯୁବକଙ୍କ ପତ୍ତା ପାଇ ନ ଥିଲେ। ପରେ ସେ ଟାଉନ ଥାନାରେ ଅଭିଯୋଗ କରିବାପରେ ପୋଲିସ ଏନେଇ ଏକ ମାମଲା (ନଂ.୧୦୨/୨୦) ରୁଜୁ କରି ତଦନ୍ତ ଚଳାଇଛି।
