ମୁମ୍ବାଇ, ୧୧।୬:ମୁମ୍ବାଇର ବିୱାଇଏଲ ନାୟର ହସ୍ପିଟାଲର ଛାତ୍ରୀନିବାସରେ ସଂରକ୍ଷିତ ବର୍ଗର ମହିଳା ଡାକ୍ତର ପାୟଲ ତଡଓ୍ବିଙ୍କ ଆତ୍ମହତ୍ୟା ମାମଲାରେ ଅଭିଯୁକ୍ତ ୩ ଜଣ ଡାକ୍ତର କୋର୍ଟରେ କାନ୍ଦିଛନ୍ତି। ଏକ ମାମଲା ସମସ୍ତ ଘଟଣାକ୍ରମ ରେକର୍ଡଂ କରାଯାଉ ବୋଲି ପାୟଲଙ୍କ ମା’ କୋର୍ଟରେ ଆବେଦନ କରିଥିଲେ। ଏହାର ଶୁଣାଣି କରି କୋର୍ଟ ମାମଲାର ରେକର୍ଡିଂ ପାଇଁ ପୋଲିସକୁ ନିର୍ଦ୍ଦେଶ ଦେଇଥିଲେ। ମାମଲାର ଶୁଣାଣି ବେଳେ ଅଭିଯୁକ୍ତ ବରିଷ୍ଠ ମହିଳା ଡାକ୍ତର ଭକ୍ତି ମେହେର, ଡା. ହେମା ଆହୁଜା ଏବଂ ଡା. ଅଙ୍କିତା ଖଣ୍ଡେଲୱାଲ କୋର୍ଟ ଉପସ୍ଥିତ ଥିଲେ। ଏହି ସମୟରେ ୩ଜଣ ମହିଳା ଡାକ୍ତର କାନ୍ଦି କାନ୍ଦି କହିଥିଲେ ଯେ, ଆମେ ଜେଲରେ ଏତେ ଦିନ ରହିଲୁଣି। ସମ୍ପର୍କୀୟଙ୍କୁ ଭେଟିବାକୁ ଦିଆଯାଉନାହିଁ ବୋଲି କହିଥିଲେ। ତିନି ଡାକ୍ତରଙ୍କ ଜାମିନ ଆବେଦର ଶୁଣାଣି ୧୭ ଜୁନରେ ହେବା ବୋଲି କୋର୍ଟ ପକ୍ଷରୁ ସୂଚନା ଦିଆଯାଇଛି। ସୂଚନାଯୋଗ୍ୟ, ପାୟଲଙ୍କ ଘର ଜଲଗାଓଁରେ। ସେ ଏକ ଆଦିବାସୀ ପରିବାରରୁ ଆସିଥିବାରୁ ତାଙ୍କ ଜାତିକୁ ନେଇ ଅଭିଯୁକ୍ତ ଡାକ୍ତରମାନେ ବାରମ୍ବାର କଟୁ ଆକ୍ଷେପ କରିଆସୁଥିଲେ। ଏପରି କି ତାଙ୍କୁ ଏକ ହ୍ବାଟ୍ସଆପ ଗ୍ରୁପରେ ମଧ୍ୟ ଆକ୍ଷେପ କରି ଲଜ୍ଜିତ କରୁଥିଲେ। ଗତ ୨୨ ତାରିଖରେ ହଷ୍ଟେଲ ରୁମରୁ ପାୟଲଙ୍କ ଝୁଲନ୍ତା ମୃତଦେହ ଜବତ ହୋଇଥିଲା। କିନ୍ତୁ ପୁଲିସ ଅପମୃତ୍ୟୁ ମାମଲା ରୁଜୁ କରି ଚୁପ ବସିପଡ଼ିଥିଲା। ପୋଲିସର ନିଷ୍କ୍ରିୟତା ପ୍ରତିବାଦରେ ଦେଶବ୍ୟାପୀ ଜୋରଦାର ବିରୋଧ ସୃଷ୍ଟି ହେବାରୁ ପୋଲିସ ୩ ଅଭିଯୁକ୍ତଙ୍କୁ ଗିରଫ କରିଥିଲା।
