ନୂଆଦିଲ୍ଲୀ,୧୧।୧୧(ପି.ଟି.)- ଅଭିଜ୍ଞ ଟେନିସ ତାରକା ଲିଆଣ୍ଡର ପେସ୍ ଗତ ୧୯ ବର୍ଷ ପ୍ରଥମଥର ପାଇଁ ବିଶ୍ୱ ଡବଲ୍ସ ର଼୍ୟାଙ୍କିଙ୍ଗ୍ର ଶ୍ରେଷ୍ଠ-୧୦୦ରୁ ବାଦ୍ ପଡିଛନ୍ତି। ୫ଟି ସ୍ଥାନ ତଳକୁ ଖସି ସେ ୧୦୧ତମ ସ୍ଥାନରେ ରହିଛନ୍ତି। ୮୫୬ ପଏଣ୍ଟ ସହ ପେସ୍ ଏବେ ର଼୍ୟାଙ୍କିଙ୍ଗ୍ରେ ଚତୁର୍ଥ ଶ୍ରେଷ୍ଠ ଭାରତୀୟ ସାବ୍ୟସ୍ତ ହୋଇଛନ୍ତି। ଡବଲ୍ସ ତାଲିକାରେ ଅନ୍ୟତମ ଭାରତୀୟ ଖେଳାଳି ରୋହନ ବୋପାନ୍ନା ୩୮, ଦିଭିଜ ଶରନ ୪୬ ଓ ପୁରବ ରାଜା ୯୩ତମ ସ୍ଥାନରେ ରହିଛନ୍ତି। ରାଜା ୮ଟି ସ୍ଥାନ ଉପରକୁ ଉଠି ୯୩ତମ ସ୍ଥାନରେ ରହି ପୁଣି ଟପ୍-୧୦୦ରେ ସ୍ଥାନ ପାଇଛନ୍ତି।
୯୦ ଦଶକର ଶେଷ ଭାଗରେ ଓ ୨୦୦୦ର ପ୍ରାରମ୍ଭରେ ପେସ ନିଜ ଦେଶର ମହେଶ ଭୂପତିଙ୍କ ସହ ସାଥି ହୋଇ ବିଶ୍ୱ ଡବଲ୍ସ ଟେନିସରେ ସଫଳତାର ଶୀର୍ଷକୁ ଛୁଇଁଥିଲେ ଓ ଆଧିପତ୍ୟ ଜାହିର କରିଥିଲେ। ୨୦୧୪ ଅଗଷ୍ଟରେ ପେସ୍ ଟପ୍-୧୦ରୁ ବାଦ୍ ପଡିଥିଲେ। ଏହାର ଦୁଇ ବର୍ଷ ପରେ ପେସ୍ ଟପ୍- ୫୦ରୁ ବାଦ୍ ପଡିଥିଲେ। ୧୮ଟି ଗ୍ରାଣ୍ଡସ୍ଳାମ ଟାଇଟଲ ଜିତିଥିତ୍ବା ପେସ୍ ସେପ୍ଟେମ୍ବରରେ ୟୁଏସ୍ ଓପନ୍ ଅଂଶଗ୍ରହଣ କରିବାପରେ ଆଉ ଖେଳିନାହାନ୍ତି। ଆଗାମୀ ପାକିସ୍ତାନ ବିପକ୍ଷ ଡେଭିସ କପ୍ ପାଇଁ ସେ ଉପଲବ୍ଧ ହେବ ବୋଲି କହିଛନ୍ତି।
ଅପରପକ୍ଷରେ ସିଙ୍ଗଲ୍ସ ର଼୍ୟାଙ୍କିଙ୍ଗ୍ରେ ପ୍ରାଜନେସ ଗୁଣେଶ୍ୱରନ ଗୋଟିଏ ସ୍ଥାନ ତଳକୁ ଖସି ୯୫ତମ ସ୍ଥାନରେ ରହିଥିଲେ ମଧ୍ୟ ଶ୍ରେଷ୍ଠ ଭାରତୀୟ ସାବ୍ୟସ୍ତ ହୋଇଛନ୍ତି। ସିଙ୍ଗଲ୍ସ ର଼୍ୟାଙ୍କିଙ୍ଗ୍ରେ ସେହିପରି ସୁମିତ ନାଗାଲ ଦୁଇଟି ସ୍ଥାନ ଉପରକୁ ଉଠି ୧୨୭, ରାମକୁମାର ରାମନାଥନ ୯ଟି ସ୍ଥାନ ଉପରକୁ ଉଠି ୧୯୦, ଶଶି କୁମାର ମୁକୁନ୍ଦ ୨ଟି ସ୍ଥାନ ଉନ୍ନତି କରି ୨୫୦ ଓ ସାକେତ ମିନେନି ଗୋଟିଏ ସ୍ଥାନ ତଳକୁ ଖସି ୨୬୭ ତମ ସ୍ଥାନରେ ରହିଛନ୍ତି।
