ଭୁବନେଶ୍ୱର, ୨।୧(କ୍ରୀଡ଼ା ପ୍ରତିନିଧି)- ୨୦୧୮ ପୁରୁଷ ହକି ବିଶ୍ୱକପର ନୈରାଶ୍ୟକୁ ଭୁଲି ଭାରତୀୟ ହକି ଦଳ ଏବେ ୨୦୨୦ ଟୋକିଓ ଅଲିମ୍ପିକ୍ସ ଉପରେ ଦୃଷ୍ଟି ନିବଦ୍ଧ କରିଛି। ୨୦୧୯ ନଭେମ୍ବରରେ ଭୁବନେଶ୍ୱରର କଳିଙ୍ଗ ଷ୍ଟାଡିୟମରୁ ଦଳକୁ ଟୋକିଓ ଅଲିମ୍ପିକ୍ସ ଯୋଗ୍ୟତା ମିଳିଥିଲା। ଏବେ ଏହି ଷ୍ଟାଡିୟମରେ ଜାତୀୟ ଦଳର କ୍ୟାମ୍ପରେ ଦଳ ଆଗାମୀ ମେଗା ଇଭେଣ୍ଟ ପାଇଁ ରଣନୀତି ପ୍ରସ୍ତୁତ କରିବାକୁ ଯାଉଛି। ”୨୦୧୯ ଭାରତୀୟ ହକି ପାଇଁ ସକାରାତ୍ମକ ରହିଥିଲା। ଆମର ମୁଖ୍ୟ ଟାର୍ଗେଟ ଥିଲା ଅଲିମ୍ପିକ୍ସ ଯୋଗ୍ୟତା। ବର୍ଷ ସାରା ଦଳ ସ୍ଥିର ପ୍ରଦର୍ଶନ ଦେବା ସହ ଲକ୍ଷ୍ୟ ସ୍ଥଳରେ ପହଞ୍ଚତ୍ଥିଲା। ବିଶ୍ୱ ର଼୍ୟାଙ୍କିଙ୍ଗରେ ୫ ନମ୍ବର ସ୍ଥାନ ବଜାୟ ରଖିବା ମଧ୍ୟ ଦଳର ମନୋବଳକୁ ବଢ଼ାଇ ଦେଇଛି“ ବୋଲି ଅଧିନାୟକ ମନପ୍ରୀତ ସିଂ ପ୍ରକାଶ କରିଛନ୍ତି। ଟୋକିଓ ଅଲିମ୍ପିକ୍ସରେ ଟପ୍-୪ରେ ସ୍ଥାନ ପାଇବା ସମ୍ଭବ ବୋଲି ଦଳର ଖେଳାଳିଙ୍କ ହୃଦ୍ବୋଧ ହେଉଛି। ଆମେ ସେମିଫାଇନାଲରେ ପ୍ରବେଶ କରିପାରିଲେ ତେଣିକି ନିର୍ଦ୍ଧିଷ୍ଟ ଦିବସର ଖେଳ ଯେ କୌଣସି ଦଳର ହୋଇପାରେ ବୋଲି ସେ କହିଛନ୍ତି। ପ୍ରକାଶ ଯୋଗ୍ୟ ଯେ ୨୦୧୮ ହକି ବିଶ୍ୱକପରେ ଭାରତ କ୍ୱାର୍ଟର ଫାଇନାଲରୁ ବିଦାୟ ନେଇଥିଲା।
ଦକ୍ଷ ଯୁବ ଖେଳାଳିଙ୍କ ସଂଖ୍ୟା ବଢ଼ିଛି
ଅନ୍ତର୍ଜାତୀୟ ଷ୍ଟାଣ୍ଡାର୍ଡର ଖେଳାଳିଙ୍କ ସଂଖ୍ୟା ବୃଦ୍ଧି ମଧ୍ୟ ଭାରତୀୟ ଦଳର ଶକ୍ତିବୃଦ୍ଧି କରିଛି ବୋଲି ମନପ୍ରୀତ ବିଶ୍ୱାସ କରୁଛନ୍ତି। ”ଗତବର୍ଷ ଅନେକ ଯୁବ ଖେଳାଳି ଅନ୍ତର୍ଜାତୀୟ ପଦାର୍ପଣ କରିଥିଲେ। ଅନ୍ତର୍ଜାତୀୟ ଷ୍ଟାଣ୍ଡାର୍ଡର ଖେଳାଳି ମହଜୁଦ ହେବା ଫଳରେ ଭାରତୀୟ ଦଳର ବେଞ୍ଚ୍ଷ୍ଟ୍ରେନ୍ଥ ବୃଦ୍ଧି ପାଇଛି। ଅନନ୍ତର୍ଜାତୀୟ ସ୍ତରରେ ଯୁବ ଖେଳାଳିମାନେ ଚାପରେ ବିଚଳିତ ନ ହେବା ମଧ୍ୟ ଭଲ ଲକ୍ଷ୍ୟଣ ଥିଲା। ଆମେ ଏବେ ଏଫଆଇଏଚ୍ ପ୍ରୋ ଲିଗ୍ ମ୍ୟାଚ ଖେଳିବାକୁ ଯାଉଥିବାରୁ ଏହା ଆମକୁ ନିଶ୍ଚିତ ଫାଇଦାରେ ରଖିବ“ ବୋଲି ମନପ୍ରୀତ କହିଛନ୍ତି।
ପ୍ରଥମ ଟାର୍ଗେଟ ପ୍ରୋ ଲିଗ୍
ନିକଟରେ ପ୍ରୋ ଲିଗ୍ ଆରମ୍ଭ ହେବାକୁ ଯାଉଥିବାରୁ ଏହି ପ୍ରତିଯୋଗିତା ଆମର ପ୍ରଥମ ଟାର୍ଗେଟ। ଗତ ସୋମବାର ଆମେ ଏକ ବୈଠକରେ ଏକତ୍ରିତ ହୋଇ ଆମର ଇଚ୍ଛା ମୁଖ୍ୟ କୋଚ୍ ଗ୍ରାହାମ ରିଡ୍ଙ୍କୁ ଜଣାଇ ଦେଇଛୁ। ଜାନୁୟାରୀ, ଫେବୃୟାରୀରେ ଆମେ ନେଦରଲାଣ୍ଡ୍ସ, ବେଲଜିୟମ ଓ ଅଷ୍ଟ୍ରେଲିଆ ପରି ଦଳକୁ ଭେଟିବୁ। ତେଣୁ ଏହିସବୁ ଦଳ ବିପକ୍ଷରେ କିପରି ବିଜୟ ସମ୍ଭବ ହୋଇପାରିବ ତା ଉପରେ ଫୋକସ୍ କରାଯାଉଛି। ଏହିସବୁ ଦଳ ଗୁଡ଼ିକ ବିପକ୍ଷରେ ଖେଳିସାରିବା ପରେ ଆମେ ଅଲିମ୍ପିକ୍ସ ପାଇଁ କେତେ ପ୍ରସ୍ତୁତ ହୋଇପାରିଛୁ ତାହାର ଆଭାଷ ମିଳିବ ବୋଲି ଏହି ତାରକା ମିଡ୍ଫିଲ୍ଡର ପ୍ରକାଶ କରିଛନ୍ତି।
୯ ମାସ ସମୟ
ଅଲିମ୍ପିକ୍ସ ପ୍ରସ୍ତୁତି ପାଇଁ ଆମେ ମୋଟ ୯ ମାସ ସମୟ ପାଇଥିଲୁ। ତେଣୁ ଦିନକୁ ଦିନ କିପରି ଆମ ପ୍ରଦର୍ଶନରେ ଉନ୍ନତି ହୋଇପାରିବ ସେଥିପାଇଁ ଟ୍ରେନିଂର ପ୍ରତି ସେସନରେ ଯୋଜନା ପ୍ରସ୍ତୁତ ହେଉଛି। ରିଡ୍ଙ୍କ ତତ୍ତ୍ୱାବଧାନରେ ଆମେ କିଛି ନିର୍ଦ୍ଧିଷ୍ଟ ଯୋଜନାକୁ ନେଇ ଆଗକୁ ବଢ଼ୁଛୁ। ଆମେ ତାହାକୁ କାର୍ଯ୍ୟକାରୀ କରିପାରିଲେ ଭଲ ଫଳ ମିଳିବାନେଇ ମୁଁ ଦୃଢ଼ ନିଶ୍ଚିତ ବୋଲି ସେ କହିଛନ୍ତି।
ଏସିଆନ ଚାମ୍ପିୟନ୍ସ ଟ୍ରଫିରେ ହ୍ୟାଟ୍ରିକ ଟାଇଟଲ ଲକ୍ଷ୍ୟ
ଭାରତ ୨୦୧୬ ଓ ୨୦୧୮ରେ ଏସିଆନ ଚାମ୍ପିୟନ୍ସ ଟ୍ରଫି ଟାଇଟଲ ଜିତିଛି। ୨୦୨୦ରେ ଏହି ପ୍ରତିଯୋଗିତା ଖେଳାଯିବାକୁ ଥିବାରୁ କ୍ରମାଗତ ତୃତୀୟଥରପାଇଁ ଟାଇଟଲ ଜିତି ହ୍ୟାଟ୍ରକ କରିବା ଦଳର ଲକ୍ଷ୍ୟ ବୋଲି ମନପ୍ରୀତ କହିଛନ୍ତି। ଏସିଆନ ଚାମ୍ପିୟନ୍ସ ଟ୍ରଫି ଟାଇଟଲ ବଜାୟ ରଖିବା କଥା ଆମ ମନରେ ରହିଛି। ତେବେ ଆମେ ହଠାତ ଏହି ଟୁର୍ନାମେଣ୍ଟ ସମ୍ପର୍କରେ ଚିନ୍ତା ନ କରି ପ୍ରଥମେ ଆସୁଥିବା ପ୍ରତିଯୋଗିତା ସମ୍ପର୍କରେ ଚିନ୍ତା କରୁଛୁ। ଏହାପରେ ଆମେ ଆଗାମୀ ଟୁର୍ନାମେଣ୍ଟ ସମ୍ପର୍କରେ ଯୋଜନା ପ୍ରସ୍ତୁତ କରି ଆଗକୁ ବଢ଼ିବୁ ବୋଲି ଅଧିନାୟକ ପ୍ରକାଶ କରିଛନ୍ତି।
