ଚିକିଟି,୬ା୨(ଡି.ଏନ.ଏ.): ଗଞ୍ଜାମ ଜିଲାରେ ଜାଲ ସାର୍ଟିଫିକେଟ ଦେଇ ଚାକିରି କରିଥିବା ଶିକ୍ଷୟିତ୍ରୀ, ଶିକ୍ଷକଙ୍କ ଯାଞ୍ଚ ଚାଲିଛି। ଚିକିଟି ବ୍ଲକରେ ଏପରି ଜଣେ ନକଲି ଶିକ୍ଷୟିତ୍ରୀ ଧରାପଡ଼ିଛନ୍ତି। ତାଙ୍କ ବିରୋଧରେ ଥାନାରେ ଏତଲା ଦିଆଯିବା ସହ କାର୍ଯ୍ୟରୁ ନିଲମ୍ବିତ କରାଯାଇଛି। ନକଲି ଶିକ୍ଷୟିତ୍ରୀ ଜଣକ ସେ ହେଲେ ଗମାଙ୍ଗ ଜୟନ୍ତୀ। ଜାଲ୍ ସାର୍ଟିଫିକେଟ ଦେଇ ସେ ୨ବର୍ଷ ହେଲା ଚାକିରି କରି ଆସୁଥିଲେ।
ଚାକିରି ଆବେଦନ ବେଳେ ଗମାଙ୍ଗ ବ୍ରହ୍ମପୁର ତହସିଲ ଅଞ୍ଚଳର ସ୍ଥାୟୀ ବାସିନ୍ଦା ବୋଲି ପ୍ରମାଣପତ୍ର ଦେଇଥିଲେ। ୨୦୧୮ ଏପ୍ରିଲ୍ ୩ ତାରିଖରେ ସେ ପତିଗୋବିନ୍ଦପୁର ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟରେ କାର୍ଯ୍ୟରେ ଯୋଗ ଦେଇଥିଲେ। ଗତ ଜୁଲାଇ ୧୯ ତାରିଖରୁ ଡେପୁଟେଶନରେ ନୂଆପଡ଼ା ଗ୍ରାମ ଯୁବରାଜପେଣ୍ଠ ବାଳକ ଉଚ୍ଚ ପ୍ରାଥମିକ ବିଦ୍ୟାଳୟକୁ ଆସିଥିଲେ। ଜିଲାରେ ବହୁ ନକଲି ଶିକ୍ଷକ ଥିବା ଅଭିଯୋଗ ଆସିବାରୁ କିଛିମାସ ହେଲା ସାର୍ଟିଫିକେଟ ଯାଞ୍ଚ ଚାଲିଛି। ଚିକିଟି ବ୍ଲକର ଶିକ୍ଷୟିତ୍ରୀ, ଶିକ୍ଷକଙ୍କ ଯାଞ୍ଚ ଚାଲିଥିବା ବେଳେ ଗମାଙ୍ଗ ବ୍ରହ୍ମପୁର ତହସିଲ ଅଞ୍ଚଳର ନୁହଁନ୍ତି ବୋଲି ଜଣାପଡିଥିଲା। ଏଥିସହ ସେ ଦେଇଥିବା ଜାତି ପ୍ରମାଣପତ୍ର ଜାଲ୍ ବୋଲି ସ୍ପଷ୍ଟ ହୋଇଥିଲା। ଏ ନେଇ ସମଗ୍ର ଶିକ୍ଷାର ଜିଲା ପ୍ରକଳ୍ପ ସଂଯୋଜିକା (ଡିପିସି) ବିନିତା ସେନାପତିଙ୍କ ନିର୍ଦ୍ଦେଶକ୍ରମେ ଚିକିଟି ବ୍ଲକର ଭାରପ୍ରାପ୍ତ ଶିକ୍ଷାଧିକାରୀ କୋରେଶୁ ସେଠୀ ମଙ୍ଗଳବାର କେ.ନୂଆଗାଁ ଥାନାରେ ଏତଲା ଦେଇଛନ୍ତିି। ଏହାକୁ ଭିତ୍ତିକରି ନଂ. ୩୦/୨୦୨୦ ଦଫା ୪୨୦/୪୬୭, ୪୬୮/ ୪୭୧ରେ ମାମଲା ରୁଜୁ କରାଯାଇ ଘଟଣାର ତଦନ୍ତ କରାଯାଉଥିବା ଥାନାଧିକାରୀ ମାଧବନନ୍ଦ ନାୟକ କହିଛନ୍ତିି। ଅନ୍ୟପକ୍ଷରେ ସମ୍ପୃକ୍ତ ଶିକ୍ଷୟିତ୍ରୀଙ୍କୁ କାର୍ଯ୍ୟରୁ ନିଲମ୍ବିତ କରାଯାଇଥିବା ଭାରପ୍ରାପ୍ତ ବିଇଓ ସେଠୀ କହିଛନ୍ତି। ସମ୍ପୃକ୍ତ ଶିକ୍ଷୟିତ୍ରୀ ଛୁଟି ଦରଖାସ୍ତ ନ ଦେଇ ବୁଧବାର ବିଦ୍ୟାଳୟରେ ଅନୁପସ୍ଥିତ ଥିବା ପ୍ରଧାନ ଶିକ୍ଷୟତ୍ରୀ ସୌଭାଗ୍ୟ ମଞ୍ଜରି ସିଂ କହିଛନ୍ତିି।
