ଭୁବନେଶ୍ୱର,୨୬।୪(ବ୍ୟୁରୋ): ଅନ୍ୟରାଜ୍ୟରୁ ଓଡ଼ିଶାକୁ ଆସିଥିବା ଓ ରାଜ୍ୟ ଭିତରେ ଥିବା ଶ୍ରମିକଙ୍କୁ ଆଶ୍ୱସ୍ତି ମିଳିଛି। ବିଭିନ୍ନ ଜିଲାରେ ଥିବା ୨,୬୧୦ ରିଲିଫ କ୍ୟାମ୍ପରେ ୧୪ଦିନ କ୍ୱାରାଣ୍ଟାଇନ୍ ବିତାଇ ସାରିଥିବା ଶ୍ରମିକମାନେ ରାଜ୍ୟ ଭିତରେ ଯେକୌଣସି ସ୍ଥାନକୁ କାମ କରିବାକୁ ଯାଇପାରିବେ। ଶନିବାର ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ପକ୍ଷରୁ ଏନେଇ ଏକ ଗାଇଡଲାଇନ ଜାରି କରାଯାଇଛି। ପ୍ରକାଶିତ ବିଜ୍ଞପ୍ତି ଅନୁଯାୟୀ ଶିଳ୍ପ ସଂସ୍ଥା, ଏଜେନ୍ସି କିମ୍ବା ଠିକାଦାର ଶ୍ରମିକଙ୍କୁ କାର୍ଯ୍ୟସ୍ଥଳକୁ ନେଇ ଯିବାବେଳେ ସରକାରଙ୍କ ଲକ୍ଡାଉନ ଗାଇଡ୍ଲାଇନ ଏବଂ ସାମାଜିକ ଦୂରତାକୁ କଡ଼ାକଡ଼ି ଭାବେ ଭାବେ ପାଳନ କରିବେ। ଶ୍ରମିକଙ୍କୁ ନେବାବେଳେ ସେମାନଙ୍କ ସମ୍ପୂର୍ଣ୍ଣ ବିବରଣୀ ସହ କେଉଁଠିକୁ ଯାଉଛନ୍ତି ଓ କେଉଁ ଯାନରେ ଯାଉଛନ୍ତି ସେନେଇ ସମସ୍ତ ସୂଚନା ଜିଲା ଶ୍ରମ ଅଧିକାରୀ(ଡିଏଲ୍ଓ)ଙ୍କ ଜରିଆରେ ଜିଲାପାଳଙ୍କୁ ଦେବାକୁ ପଡ଼ିବ। ଜିଲାପାଳ ଏନେଇ ପାସ୍ ଇସ୍ୟୁ କରିବେ। ଆବଶ୍ୟକ ହେଲେ ଜିଲାପାଳ ଏନେଇ ବସ୍ ମଧ୍ୟ ଯୋଗାଇ ଦେବେ। ଏହାର ସମସ୍ତଖର୍ଚ୍ଚ ଠିକାଦାର, ଶିଳ୍ପ ସଂସ୍ଥା ବହନ କରିବେ। ଯଦି କୌଣସି ଶ୍ରମିକ ଶିଳ୍ପ ସଂସ୍ଥା, ଠିକାଦାର କିମ୍ବା ଏଜେନ୍ସି ସହିତ କାର୍ଯ୍ୟପାଇଁ ଯାଉ ନ ଥିବେ ସେପରି ସ୍ଥଳେ ବିଡିଓ/ଡିଏଲଓ ଶ୍ରମିକଙ୍କ ବିଷୟରେ ଜିଲାପାଳ/ଡିଆରଡିଓଙ୍କୁ ଜଣାଇବାକୁ ନିର୍ଦ୍ଦେଶ ଦିଆଯାଇଛି। ସେହି ଶ୍ରମିକଙ୍କ ଯିବାଆସିବା ପାଇଁ ଆର୍ଟିଓଙ୍କ ସହଯୋଗରେ ବସ୍ ଯୋଗାଇ ଦେବେ। ଏଥିପାଇଁ ହେବାକୁ ଥିବା ଖର୍ଚ୍ଚ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ କରାଯିବ। ଏନେଇ ଜିଲାପାଳଙ୍କୁ କ୍ଷମତା ପ୍ରଦାନ କରାଯାଇଛି। ବର୍ତ୍ତମାନ ସମସ୍ତ ବସ୍ ଚଳାଚଳ ବନ୍ଦ ଥିବାବେଳେ ଶ୍ରମିକଙ୍କୁ ନେବା ଲାଗି ଜିଲାପାଳ ଛିଡ଼ା ହୋଇ ରହିଥିବା ବସ୍କୁ ବ୍ୟବହାର କରିପାରିବେ। ଉକ୍ତ ବସ୍ଗୁଡ଼ିକର ସେହିମାସର ସମସ୍ତ ଟିକସ ଛାଡ଼ କରାଯିବ। ଏନେଇ ବାଣିଜ୍ୟ ଓ ପରିବହନ ବିଭାଗପକ୍ଷରୁ ଆବଶ୍ୟକ ନିର୍ଦ୍ଦେଶନାମା ଜାରି କରାଯିବ ବୋଲି ଗାଇଡ୍ଲାଇନରେ କୁହାଯାଇଛି। ଯେଉଁ ଶ୍ରମିକମାନେ କ୍ୱାରାଣ୍ଟାଇନ ଅବଧି ଶେଷ କରିଛନ୍ତି, ସେମାନଙ୍କୁ ସରପଞ୍ଚ କିମ୍ବା ସହରାଞ୍ଚଳର କାର୍ଯ୍ୟ ନିର୍ବାହୀ ଅଧିକାରୀ ପୁଣିଥରେ କ୍ୱାରାଣ୍ଟାଇନ୍ ସେଣ୍ଟରକୁ ନେଇ ପାରିବେ ନାହିଁ। ଏନେଇ ପଞ୍ଚାୟତିରାଜ ବିଭାଗ, ନଗର ଉନ୍ନୟନ ବିଭାଗ ସରପଞ୍ଚଙ୍କ ପାଇଁ ଆବଶ୍ୟକ ନିର୍ଦ୍ଦେଶନାମା ଜାରି କରିବେ। ଜିଲାପାଳମାନେ ନିଜ ଜିଲାରେ କାର୍ଯ୍ୟଗୁଡ଼ିକୁ ତଦାରଖ କରିବେ। ପିଡି ଡିଆରଡିଏମାନେ ଜିଲାର ନୋଡାଲ ଅଫିସର ଭାବେ କାର୍ଯ୍ୟ କରିବେ। ଡିଏଲ୍ଓ ପ୍ରତ୍ୟେକ ଦିନ କାର୍ଯ୍ୟଗୁଡ଼ିକର ରିପୋର୍ଟ ପିଡିଡିଆର୍ଡିଏଙ୍କୁ ପ୍ରଦାନ କରିବେ। ରାଜ୍ୟସ୍ତରରେ କୃଷି ଉପତ୍ାଦନ କମିଶନରଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ କମିଟି ଗଠନ କରାଯିବ। ଏହି କମିଟିରେ ଶ୍ରମ, ପରିବହନ ବିଭାଗର ଅଧିକାରୀ ସଦସ୍ୟ ରହିବେ। ସେମାନେ ଶ୍ରମିକଙ୍କ ଯାତାୟାତ ବିଷୟରେ ନିୟମିତ ସମୀକ୍ଷା କରିବେ।
