ନୂଆଦିଲ୍ଲୀ,୧୭ା୭(ପି.ଟି.): ବିଶିଷ୍ଟ ତବଲା ବାଦକ ଜାକିର ହୁସେନ୍, ଅହମିୟା ନୃତ୍ୟଶିଳ୍ପୀ ତଥା ନିର୍ଦ୍ଦେଶକ ଯତୀନ ଗୋସ୍ବାମୀ(ସତ୍ରୀୟ) ଏବଂ କେ. କଲ୍ୟାଣସୁନ୍ଦରମ୍ ପିଲାଇ(ଭାରତନାଟ୍ୟମ୍)ଙ୍କୁ ସଂଗୀତ ନାଟକ ଏକାଡେମୀର ଫେଲୋଶିପ୍ ପ୍ରଦାନ କରାଯାଇଛି। ଏଥିସହିତ ଏକାଡେମୀ ୨୦୧୮ ପୁରସ୍କାର ପାଇଁ ୪୪ ଜଣଙ୍କ ନାମ ଘୋଷଣା କରିଛି। ଗୁଆହାଟୀଠାରେ ଜୁନ୍ ୨୬ରେ ଅନୁଷ୍ଠିତ ଏକାଡେମୀର ଏକ ସ୍ବତନ୍ତ୍ର ବୈଠକରେ କଳାକାରଙ୍କ ନାମ ଚୟନ କରାଯାଇଥିଲା। ଏକାଡେମୀର ସାଧାରଣ ପରିଷଦ ବୈଠକରେ ସଂଗୀତ, ନୃତ୍ୟ, ମଞ୍ଚନାଟକ, ପାରମ୍ପରିକ ଲୋକସଂଗୀତ, ଆଦିବାସୀ ନୃତ୍ୟ ଆଦି ବିଭିନ୍ନ କ୍ଷେତ୍ରରେ ପ୍ରସିଦ୍ଧି ହାସଲ କରିଥିବା କଳାକାରଙ୍କୁ ୨୦୧୮ର ସଂଗୀତ ନାଟକ ଏକାଡେମୀ ପୁରସ୍କାର ପାଇଁ ଚୟନ କରାଯାଇଥିଲା।
କ୍ଷେତ୍ରରେ ପୁରସ୍କୃତ ହେବାକୁ ଥିବା ବ୍ୟକ୍ତିବିଶେଷ ହେଉଛନ୍ତି ମଣି ପ୍ରସାଦ ଓ ମଧୁପ ମୁଦ୍ଗଲ(ହିନ୍ଦୁସ୍ତାନୀ ଭୋକାଲ), ତରୁଣ ଭଟ୍ଟାଚାର୍ଯ୍ୟ (ସନ୍ତୁର), ତେଜେନ୍ଦ୍ର ନାରାୟଣ ମଜୁମ୍ଦାର(ସରୋଦ), ଆଲାମେଲୁ ମଣି ଓ ମାଲାଡି ସୁରିବାବୁ(କର୍ନାଟକୀ ଭୋକାଲ), ସୁରେଶ ଓ୍ବାଡକର ଓ ଶାନ୍ତି ହୀରାନନ୍ଦ(ସୁଗମ ସଂଗୀତ) ଏବଂ ଏଚ. ଅଶଙ୍ଗ୍ବି ଦେବୀ(ନାଟ ସଂକୀର୍ତ୍ତନ)। ଏସ୍. କାସିମ ଏବଂ ଏସ୍. ବାବୁଙ୍କୁ ନାଗେଶ୍ୱରମ୍ ଇନ୍ଷ୍ଟ୍ରୁମେଣ୍ଟ ଏବଂ ଗଣେଶ ଓ କୁମାରେଶଙ୍କୁ ଭାୟୋଲିନ୍ ପାଇଁ ଯୁଗ୍ମ ପୁରସ୍କାର ଦିଆଯିବ।
ମଞ୍ଚନାଟକ କ୍ଷେତ୍ରରେ ପ୍ଲେରାଇଟିଂ ପାଇଁ ରାଜୀବ ନାଏକ ଏବଂ ଲାଙ୍ଗ୍ଲୁଙ୍ଗଲିଆନା ଖିଆଙ୍ଗଟେ, ନିର୍ଦ୍ଦେଶନା ପାଇଁ ସଞ୍ଜୟ ଉପାଧ୍ୟାୟ ଏବଂ ଏସ୍. ରଘୁନନ୍ଦନ, ଅଭିନୟ ପାଇଁ ସୁହାସ ଜୋଷୀ ଓ ଟିକମ ଜୋଷୀ ଏବଂ ବ୍ୟଙ୍ଗ ପାଇଁ ସ୍ବପନ ନନ୍ଦୀଙ୍କୁ ଏକାଡେମୀ ପୁରସ୍କାର ପ୍ରଦାନ କରାଯିବ। ଏକାଡେମୀ ଫେଲୋଶିପ୍ ବାବଦ ୩ଲକ୍ଷ ଟଙ୍କା ଏବଂ ଆଓ୍ବାର୍ଡ ବାବଦ ୧ଲକ୍ଷ ଟଙ୍କାର ଅର୍ଥରାଶି ଦିଆଯିବ।
