ଜଳ ନିଷ୍କାସନ ବାଧାପ୍ରାପ୍ତ ଯୋଗୁ ଫସଲ ନଷ୍ଟ ହେଉଛି: ଜିଲାପାଳଙ୍କୁ ଭେଟିଲା ଯଯାତୀ କୃଷକ ସଂଗଠନ
8:49 amAugust 14, 2019 / 21

ଯାଜପୁର ଟାଉନ ୧୪।୮(ଡି.ଏନ୍‌.ଏ.)- ଡ୍ରେନେଜ ବିଭାଗର ଦାୟିତ୍ୱହୀନତା ଯୋଗୁ ଯାଜପୁର ବ୍ଲକ ଅନ୍ତର୍ଗତ ବିଚିତ୍ରପୁର, ବାଲିଆମୁଣ୍ଡୁଳୀ, ଦକ୍ଷିଣବିଲ, ମୋଗଲପୁର, ବାଛିଆରୀ, ରାଣୁଆ, ଧନିପୁର, ମାର୍କଣ୍ଡପୁର, ବଇଭୂଇଁ ମୌଜାରେ ଜଳ ନିଷ୍କାସନ ଠିକ୍‌ ଭାବେ ହୋଇ ନ ପାରିବାରୁ ଫସଲ ସବୁ ପଚି ନଷ୍ଟ ହୋଇଯାଉଛି ା ଏଅଞ୍ଚଳରେ କୁଶଭଦ୍ରା ନଦୀ ପ୍ରବାହିତ ହେଉଛି। ପୂର୍ବରୁ ଏହି ନଦୀ ବିଶାଳ ରୂପ ଧାରଣ କରିଥିବାବେଳେ ବିଭିନ୍ନ ସ୍ଥାନରେ ବନ୍ଧବାଡ ନିର୍ମାଣ ହେତୁ ଜଳସ୍ରୋତ ତୀବ୍ର ନ ଥିଲେ ମଧ୍ୟ ମକେଇପୁର ନିକଟରୁ କେନାଲ ଜଳ ଓ ବର୍ଷାପାଣି କୁଶଭଦ୍ରାରେ ଆସି ଅଞ୍ଚଳର ଚାଷଜମି ମାଡ଼ିଯାଉଛି। ଏହି ନଦୀର ଜଳ ବିଞ୍ଝାରପୁରର ନିମ୍ନ ଅଞ୍ଚଳକୁ ପ୍ରବାହିତ ହୋଇଛି। ସୁଦୁଗୋବିନ୍ଦା ଠାରେ ରହିଥିବା ଚେକଡ୍ୟାମଟି ସମ୍ପୂର୍ଣ୍ଣ ଭାବେ ଜଳ ନିଷ୍କାସନରେ ବାଧା ସୃଷ୍ଟି କରୁଛି। ଏହାକୁ ଡ୍ରେନେଜ ବିଭାଗ ନିର୍ମାଣ କରିଥିଲା। କିନ୍ତୁ ଜଳ ନିଷ୍କାସନ ପାଇଁ ପର୍ଯ୍ୟାପ୍ତ ବ୍ୟବସ୍ଥା କରି ନ ଥିବାଯୋଗୁ ବର୍ଷାଦିନେ ପାଣି ନିଷ୍କାସନ ନ ହୋଇ ହଜାର ହଜାର ଏକର ଜମିରେ ଜମା ରହି ଧାନଚାଷ ଓ ଅନ ପନିପରିବା ଚାଷକୁ ନଷ୍ଟ କରୁଛି। ଚେକ୍‌ଡ୍ୟାମଟି ଜଳ ସଂରକ୍ଷଣ ପାଇଁ କରାଯାଇଥିବାବେଳେ ଏବେ ଏହା ସଙ୍କଟଜନକ ପରିସ୍ଥିତି ସୃଷ୍ଟି କରି ଜମିକୁ ଜଳାର୍ଣ୍ଣବ କରି ରଖିଛି। ଏନେଇ ବିଭାଗୀୟ ନିର୍ବାହୀଯନ୍ତ୍ରୀଙ୍କୁ ଅବଗତ କରାଯାଇଥିଲେ ବି କୌଣସି ସୁଫଳ ମିଳି ନାହିଁ। ଉକ୍ତ ଚେକଡ୍ୟାମକୁ ସମ୍ପୂର୍ଣ୍ଣ ଭାବେ ଉଠାଇଲେ ଯାଇ ସମସ୍ୟାର ସମାଧାନ ହୋଇପାରିବ ବୋଲି ଯଯାତୀ କୃଷକ ଉପତ୍ାଦକ ସଂଗଠନ ପକ୍ଷରୁ ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଛି। ସଂଗଠନର କର୍ମକର୍ତ୍ତା ବିଜୟ ପରିଡା, ବିଦ୍ୟାଧର ମହାନ୍ତି, ଦୀପକ ମହାପାତ୍ର, ବିଶ୍ୱନାଥ କର, ଗଙ୍ଗାଧର ନାୟକ, ପ୍ରଫୁଲ୍ଲ ନାୟକ, ହରେକୃଷ୍ଣ ସାହୁ, ଅକ୍ଷୟ ସାହୁ, ରଘୁନାଥ ସାହୁ, ଗୋଲଖ ବରାଳ, ବାଇଧର ପ୍ରଧାନ, ସେକ୍‌ ବଦିରୁଦ୍ଦିନ, ରବୀନ୍ଦ୍ର ନାଥ, ଅଶୋକ ବେହେରା, ବିଦ୍ୟାଧର ଦାସ, ଧରଣୀ ଜେନା, ମହେଶ୍ୱର ନାଥ, ସୁଲଭ ଦାସଙ୍କ ସମେତ ଶତାଧିକ ଚାଷୀ ଜିଲାପାଳ ନିକଟରେ ସମସ୍ୟା ସମ୍ପର୍କରେ ଅବଗତ କରିଛନ୍ତି।