ପୁରୀ ଅଫିସ, ୪ା୨: ପୁଣି ଜଣେ ଓଡ଼ିଆ ଅନ୍ତର୍ଜତୀୟସ୍ତରରେ ସଫଳତା ସାଉଣ୍ଟିଛନ୍ତି। ଜର୍ଜିଆରେ ଅନୁଷ୍ଠିତ ୱାଲର୍ଡ ରାଇଜିଂ ଷ୍ଟାର-୨୦୨୦ରେ ୧୨ଟି ଦେଶର ପ୍ରତିଯୋଗୀଙ୍କୁ ପଛରେ ପକାଇ ବେଷ୍ଟ ନ୍ୟାଶନାଲ କଷ୍ଟ୍ୟୁମ ଏବଂ ଟପ୍ ମଡେଲର ମୁକୁଟ ପିନ୍ଧିଛନ୍ତି ପୁରୀର ୫ବର୍ଷୀୟା ଝିଅ ଦିବ୍ୟଶ୍ରୀ। ଆଉ ସବୁଠୁ ଖୁସିର କଥା ହେଉଛି, ଦିବ୍ୟଶ୍ରୀଙ୍କ ପାଇଁ ଭାରତ ପ୍ରଥମଥର ଲାଗି ଏହି ଅନ୍ତର୍ଜାତୀୟ ପୁରସ୍କାର ପାଇଛି। ର଼୍ୟାମ୍ପ ଶୋ’ରେ ଅନ୍ତର୍ଜାତୀୟସ୍ତରରେ ରେକର୍ଡ ହାସଲ ପାଇଁ ଆଶା ବାନ୍ଧିଥିବା ଦିବ୍ୟଶ୍ରୀଙ୍କ ପରିବାର ଝିଅର ଏହି ସଫଳତାକୁ ନେଇ ବେଶ୍ ଉତ୍ସାହିତ ଅଛନ୍ତି। ପୁରୀ ମାର୍କଣ୍ଡେଶ୍ୱର ସାହିର ଦେବାଶିଷ ବେହେରା ଓ ଦେବୀ ଗୁହାଙ୍କ ୫ବର୍ଷର ଝିଅ ଦିବ୍ୟଶ୍ରୀ। ମା’ ଓ ବାପାଙ୍କ ନାମକୁ ନେଇ ତାଙ୍କ ନାମ ରହିଛି ଦିବ୍ୟଶ୍ରୀ ଦେବାଶିଷ ବେହେରା। ପ୍ରଚଣ୍ଡ ପ୍ରତିଭାର ଅଧିକାରୀ ଦିବ୍ୟଶ୍ରୀଙ୍କର ମାତ୍ର ଅଢେଇ ବର୍ଷ ବୟସରୁ ମଡେଲିଂ ଏବଂ ଫ୍ୟାଶନ ଶୋ’ ପ୍ରତି ଦୁର୍ବଳତା ଥିଲା। ଝିଅର ଆଗ୍ରହକୁ ଦେଖି ପରିବାର ମଧ୍ୟ ସମସ୍ତ ପ୍ରକାର ସହଯୋଗ ଯୋଗାଇଦେଲେ। ଭାରତର ବିଭିନ୍ନ ସ୍ଥାନରେ ହେଉଥିବା ଜାତୀୟସ୍ତରୀୟ ଫ୍ୟାଶନ ଶୋ’ରେ ଭାଗ ନେଇ ବେଶ୍ ସଫଳତା ପାଇଥିଲେ ଦିବ୍ୟଶ୍ରୀ। ବିଶାଖାପାଟଣା ଓ ବାଙ୍ଗାଲୋରରେ ଅନୁଷ୍ଠିତ ଅନ୍ତର୍ଜାତୀୟ ଫ୍ୟାଶନ ଶୋ’ରେ ତାଙ୍କ ସଫଳତା ଜର୍ଜିଆ ପାଇଁ ବାଟ ଫିଟାଇଥିଲା। ପରିବାରର ଅନିଚ୍ଛା ସତ୍ତ୍ବେ ଝିଅର ପ୍ରତିଭାକୁ ବିକଶିତ କରିବା ଲାଗି ସେମାନେ ଜର୍ଜିଆର ତିବିଲ୍ସେ ସହରରେ ପହଞ୍ଚତ୍ଥିଲେ। ଜାନୁୟାରୀ ୧୬ରୁ ୨୦ ତାରିଖ ପର୍ଯ୍ୟନ୍ତ ସେଠାରେ ଆୟୋଜିତ ୱାଲର୍ଡ ରାଇଜିଂ ଷ୍ଟାର-୨୦୨୦ କଣ୍ଟେଷ୍ଟାଣ୍ଟରେ ଭାରତ ପକ୍ଷରୁ ୪ରୁ ୭ବର୍ଷ ବର୍ଗରେ ଭାଗନେଇ ଦେଶପାଇଁ ଗୌରବ ଆଣିଥିଲେ ଦିବ୍ୟଶ୍ରୀ। ଏହି ବର୍ଗରେ ୧୨ଟି ଦେଶର ପ୍ରତିଯୋଗୀଙ୍କୁ ସେ ପଛରେ ପକାଇ ବେଷ୍ଟ ନ୍ୟାଶନାଲ କଷ୍ଟ୍ୟୁମ୍ ସହିତ ଟପ୍ ମଡେଲର କ୍ରାଉନ ହାତେଇଥିଲେ। ଦିବ୍ୟଶ୍ରୀ ଏହି ଟ୍ୟାଲେଣ୍ଟ ଶୋ’ରେ ତାଙ୍କ କାଟେଗୋରିରେ ପ୍ରଥମ ସ୍ଥାନ ହାସଲ କରିଥିବାରୁ ୱାକ୍ ଫର ଇଣ୍ଟରନ୍ୟାଶନାଲ ଡିଜାଇନର୍ସ ବ୍ରାଣ୍ଡ ପକ୍ଷରୁ ଫାଇଭ୍ ଷ୍ଟାର ହୋଟେଲ ହିଲ୍ ଷ୍ଟେଶନରେ ରହିବା ପାଇଁ ତାଙ୍କ ପରିବାରକୁ ମିଳିଥିଲା ସ୍ବତନ୍ତ୍ର ଗିଫ୍ଟ ଭାଉଚର। ଦିବ୍ୟଶ୍ରୀଙ୍କ ମା, ବାପା ଉଭୟେ ବାଙ୍ଗାଲୋରରେ ଆଇଟି ସେକ୍ଟରରେ କାମ କରୁଥିବାବେଳେ ଝିଅକୁ ନେଇ ଅନେକ ସ୍ବପ୍ନ ଦେଖିଥିଲେ। ଛୋଟ ବୟସରୁ ମଡେଲିଂ ଏବଂ ଫ୍ୟାଶନ ଶୋ’ରେ ଭାଗ ନେବାକୁ ଝିଅ ବି ଆଗ୍ରହ ଦେଖାଇଛି। ତେଣୁ ଏହି ବାଟରେ ଝିଅକୁ ନେଇ ସେମାନେ ଦେଖିଥିବା ସ୍ବପ୍ନ ପୂରଣ ହୋଇପାରିବ ବୋଲି ମା’ ବାପା ଆଶା କରିଛନ୍ତି।
