ବାଲେଶ୍ୱର ଅଫିସ, ୧୫।୨-ବାଲେଶ୍ୱର ଜିଲା ସଦର ତହସିଲ ଅଧୀନ ହିଡ଼ିଗାଁ ପଞ୍ଚାୟତରେ ଥିବା ଭୂମିହୀନମାନେ ୫ବର୍ଷ ପୂର୍ବରୁ ଚିହ୍ନଟ ହୋଇ ଚାନ୍ଦିପୁର ଆର୍ଆଇ ଅଫିସରୁ ପଟ୍ଟା ପାଇଥିଲେ। ପଟ୍ଟା ପାଇଥିବା ଭୂମିହୀନମାନେ ନିଜର ଜମି ଚିହ୍ନଟ ଦାବିରେ ଶୁକ୍ରବାର ଘେରାଉ କରିଥିଲେ। ସରକାରଙ୍କ ପ୍ରକଳ୍ପ କାର୍ଯ୍ୟ ତ୍ୱରାନ୍ବିତ ପାଇଁ କରାଯାଇଥିବା ଉଚ୍ଛେଦ ନୋଟିସ୍କୁ ବିରୋଧ କରି ପ୍ରଥମେ ମିଳିଥିବା ଜମିର ଚିହ୍ନଟ ଓ ପରେ ଉଚ୍ଛେଦ ଦାବି କରିଛନ୍ତି।
ହିଡ଼ିଗାଁ ପଞ୍ଚାୟତର ୩୧ଜଣ ଗରିବ ଆଦିବାସୀ ଲୋକ ଭୂମିହୀନ ଭାବେ ଚିହ୍ନଟ ହୋଇ ଗତ ୫ବର୍ଷ ପୂର୍ବରୁ ସରକାରଙ୍କଠାରୁ ୪ ଡିସିମିଲ କରି ଜମିର ପଟ୍ଟା ପାଇ ଖଜଣା ମଧ୍ୟ ଦେଉଛନ୍ତି। କିନ୍ତୁ ସରକାରଙ୍କ ପକ୍ଷରୁ ସେମାନଙ୍କୁ ସ୍ଥାନ ଚିହ୍ନଟ ନ କରିବାରୁ କେତେକ ଲୋକ ଉକ୍ତ ଜମି ଉପରେ ଇନ୍ଦିରା ଆବାସ, ପ୍ରଧାନମନ୍ତ୍ରୀ ଆବାସ ଯୋଜନା, ବିଜୁ ଜ୍ୟୋତି ଯୋଜନାରେ ବିଦ୍ୟୁତ୍ ସଂଯୋଗ ସହ ସ୍ବଚ୍ଛ ଭାରତ ମିଶନରେ ଶୌଚାଳୟ ପାଇ ସାରିଛନ୍ତି। ଗତ କିଛିଦିନ ପୂର୍ବରୁ ସେମାନଙ୍କୁ ଉଚ୍ଛେଦ ପାଇଁ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ନିର୍ଦ୍ଦେଶରେ ସଦର ତହସିଲଦାର ପଞ୍ଚାନନ ପାତ୍ର ଆର୍ଆଇଙ୍କ ମାଧ୍ୟମରେ ୧୫ ତାରିଖରେ ଉଚ୍ଛେଦ କରାଯିବା ପାଇଁ ନୋଟିସ୍ କରିଥିଲେ। ସ୍ଥାନୀୟ ଜିଲାପରିଷଦ କମଳା ସାହୁଙ୍କ ନେତୃତ୍ୱରେ ୩୧ପରିବାରର ଲୋକମାନେ ଶୁକ୍ରବାର ପୂର୍ବାହ୍ନରେ ଚାନ୍ଦିପୁର ଆର୍ଆଇ ଅଫିସ୍ ଘେରାଉ କରି ସରକାରଙ୍କ ଦ୍ୱାରା ପାଇଥିବା ଅନୁଦାନ ଜମିର ସ୍ଥିତି କେଉଁଠି ବୋଲି ପଚାରିଥିଲେ। ଜିଲାପରିଷଦ ସାହୁଙ୍କ କହିବାନୁସାରେ, ୫ବର୍ଷ ପୂର୍ବରୁ ଉକ୍ତ ଆଦିବାସୀ ଲୋକମାନେ ପାଇଥିବା ପଟ୍ଟାର ପ୍ରଶାସନ ଚିହ୍ନଟ ନ କରିବା ଫଳରେ ଲୋକେ ଉକ୍ତ ସ୍ଥାନରେ ରହି ଘରଦ୍ୱାର କରିସାରିଛନ୍ତି। ପ୍ରଶାସନ ଥଇଥାନ ବ୍ୟବସ୍ଥା ନ କରି ଏପରି ଭାବେ ସେମାନଙ୍କୁ ଉଚ୍ଛେଦ କଲେ ସେମାନେ କେଉଁଠି ରହିବେ ଏବଂ ହଠାତ୍ କେଉଁ ଜାଗାରେ ଘର କରିବେ ତାହା ପ୍ରଶ୍ନ ଉଠୁଛି। ଏଥିପାଇଁ ପ୍ରଥମେ ଥଇଥାନ ଓ ପରେ ଉଚ୍ଛେଦ ପାଇଁ ଦାବି କରିଛନ୍ତି।
ସଦର ତହସିଲଦାର ପଞ୍ଚାନନ ପାତ୍ରଙ୍କ କହିବାନୁସାରେ, ଲୋକମାନେ ରହୁଥିବା ଜମିରେ କେନ୍ଦ୍ର ସରକାରଙ୍କ ଦ୍ୱାରା ୪କୋଟି ଟଙ୍କାର ରାଡ଼ାର୍ ସେଣ୍ଟର ନିର୍ମାଣ କରାଯାଉଛି। ରାସ୍ତା ପାଇଁ ଉକ୍ତ ସ୍ଥାନରେ ରହୁଥିବା ୪/୫ଟି ଘରର ଉଚ୍ଛେଦ ପାଇଁ ନୋଟିସ୍ ହୋଇଛି। ଏଥିପାଇଁ ସେମାନଙ୍କ ସହ ଆଲୋଚନା କରାଯାଇଛି। ସ୍ଥାନୀୟ ସରପଞ୍ଚ ଓ ଜିଲାପରିଷଦ ସଦସ୍ୟଙ୍କ ଉପସ୍ଥିତିରେ ସେମାନଙ୍କୁ କିଛିଦିନ ସମୟ ମଧ୍ୟ ପ୍ରଦାନ କରାଯାଇଛି। ସେମାନେ ଉକ୍ତ ସମୟ ମଧ୍ୟରେ ନିଜସ୍ବ ଉଠି ପଳାଇଯିବାର ପ୍ରତିଶ୍ରୁତି ଦେଇଥିବାରୁ ଉଚ୍ଛେଦ କାର୍ଯ୍ୟ ସ୍ଥଗିତ ରଖାଯାଇଛି।
