ଆନନ୍ଦପୁର, ୯। ୩(ସ୍ବ.ପ୍ର.)-କେନ୍ଦୁଝର ଜିଲା ରାମଚନ୍ଦ୍ରପୁର ଥାନା ଅଧୀନ ଖଡିକାଶୂଳ ବାହାଳୀ ଗ୍ରାମରେ ଥିବା ସର୍ବସାଧାରଣଙ୍କ ଖେଳ ପଡିଆକୁ ଜଣେ ବ୍ୟକ୍ତି ଜବରଦଖଲ କରି ଘର କରିବା ନେଇ ଗ୍ରାମବାସୀ ଥାନାର ଦ୍ୱାରସ୍ଥ ହୋଇଛନ୍ତି। ସମ୍ପୃକ୍ତ ଗ୍ରାମର ୯୦ ପ୍ରତିଶତ ଲୋକଙ୍କର ନିଜସ୍ବ ଜାଗା ନ ଥିବା ବେଳେ ସରକାରୀ ସ୍ତରରେ ୪ ଡିସମିଲି ପଟ୍ଟା ଜାଗା ପ୍ରଦାନ କରାଯାଇଛି। ତେବେ ଗ୍ରାମର ଜଣେ ବ୍ୟକ୍ତି ସରକାରୀ ପଟ୍ଟା ପାଇ ନିଜସ୍ବ ଘର କରିଥିଲେ ସୁଦ୍ଧା ଜବରଦସ୍ତ ଖେଳପଡିଆର କିଛି ଅଂଶରେ ଘର ତିଆରି ସାମଗ୍ରୀ ପକାଇ ସୋମବାର ଘର ତିଆରି କରିବାକୁ ଉଦ୍ୟମ କରିଥିଲେ। ଏହି ଘଟଣାରେ ଗ୍ରାମରେ ଉତ୍ତେଜନା ପ୍ରକାଶ ପାଇଥିଲା। ରାମଚନ୍ଦ୍ରପୁର ପୋଲିସ ପହଞ୍ଚି କେତେକ ବ୍ୟକ୍ତିଙ୍କୁ ଥାନାକୁ ଆଣି ଅଟକ ରଖି ପଚରାଉଚୁରା କରିଥିବା ଜଣାପଡିଛି। ଏହି ଘଟଣାର ବିଧିବଦ୍ଧ ତଦନ୍ତ କରି ଘର କରୁଥିବା ବ୍ୟକ୍ତିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ଗ୍ରାମର ବହୁ ସଂଖ୍ୟାରେ ପୁରୁଷ ଓ ମହିଳା ଥାନାରେ ପହଞ୍ଚିଥିଲେ। ପୋଲିସ ଘର କରୁଥିବା ଲୋକ ଏବଂ ଅଟକ ରହିଥିବା ଲୋକଙ୍କର ପଟ୍ଟା ମଗାଇ ଯାଞ୍ଚ କରିବା ସହିତ ସ୍ଥାନୀୟ ଆରଆଇଙ୍କ ସହିତ ଯୋଗାଯୋଗ କରିଥିଲେ। ସୋମବାର ଛୁଟି ଓ ହୋଲି ଛୁଟି ଖୋଲିବା ପରେ ଘସିପୁରା ତହସିଲଦାର ଏବଂ ଆରଆଇଙ୍କ ଉପସ୍ଥିତରେ ଜାଗା ମାପଚୁପ କରାଯାଇ ଚିହ୍ନଟ କରିବା ସହିତ ଆବଶ୍ୟକ ପଦକ୍ଷେପ ନେବାକୁ ପ୍ରତିଶ୍ରୁତି ଦେବା ପରେ ଲୋକମାନେ ଘରକୁ ଫେରିଥିଲେ।
