ଭୁବନେଶ୍ୱର,୨୫ା୨(ବ୍ୟୁରୋ): ପାରମ୍ପରିକ ଶକ୍ତି ଉତ୍ସର ଭବିଷ୍ୟତ ବେଳକୁ ବେଳ ଅନିଶ୍ଚିତତା ଆଡକୁ ଗତି କରୁଥିବା ବେଳେ ରାଜ୍ୟ ସରକାର ଅଣପାରମ୍ପରିକ ଶକ୍ତି ଉତ୍ସଗୁଡିକର ବିନିଯୋଗ ଦିଗରେ ପଦକ୍ଷେପ ଆରମ୍ଭ କରିଛନ୍ତି। ରାଜ୍ୟ ସରକାର ୨୦୨୨ ବେଳକୁ ରାଜ୍ୟରେ ୨୨୦୦ ମେଗାଓ୍ବାଟ ସୌରଶକ୍ତି ପ୍ରକଳ୍ପ ସ୍ଥାପନ କରିବାକୁ ଯୋଜନା କରିଛନ୍ତି। ଏଥିପାଇଁ ହେବାକୁ ଥିବା ସବୁଜ ଶକ୍ତି କରିଡର(ଜିଇସି)କୁ କେନ୍ଦ୍ର ସରକାର ଅନୁମତି ଦେଉ ନାହାନ୍ତି। ଫଳରେ ଏହି ଶକ୍ତି ପ୍ରକଳ୍ପର ଭବିଷ୍ୟତ ଅନ୍ଧକାର ଭିତରକୁ ଚାଲିଯାଇଛି । ଓଡିଶା ପାଓ୍ବାର ଟ୍ରାନ୍ସମିଶନ କର୍ପୋରେଶନ ଲିମିଟେଡ(ଓପିଟିସିଏଲ) ସୌରଶକ୍ତିରୁ ୨୮୦ ମେଗାଓ୍ବାଟ ଶକ୍ତି ନେବାକୁ ଯୋଜନା ପ୍ରସ୍ତୁତ କରିଛି। ଅନ୍ୟପକ୍ଷରେ ଅଲଟ୍ରା ମେଗା ସୋଲାର ପାଓ୍ବାର ପାର୍କ ଯୋଜନାରେ ୧୦୦୦ ମେଗାଓ୍ବାଟ ସୋଲାର ପାର୍କକୁ ନୂତନ ଓ ଅଣପାରମ୍ପରିକ ଶକ୍ତି ମନ୍ତ୍ରଣାଳୟ ଅନୁମତି ଦେଇଥିଲା। ଏହି ପାର୍କ ଓଡିଶା ସବୁଜ ଶକ୍ତି ବିକାଶ କର୍ପୋରେଶନ ଲିମିଟେଡ(ଜେଡକଲ) ଜରିଆରେ କାର୍ଯ୍ୟକାରୀ କରାଯାଇ ଥାଆନ୍ତା। ଏହି ପ୍ରକଳ୍ପ ପାଇଁ ରାଜ୍ୟ ସରକାର ୩୧୩.୮୦ କୋଟି ଟଙ୍କାର ଏକ ସମ୍ପୂର୍ଣ୍ଣ ପ୍ରକଳ୍ପ ରିପୋର୍ଟ(ଡିପିଆର) ପ୍ରସ୍ତୁତ କରିଥିଲେ। ନିଲଡୁଙ୍ଗୁରିଠାରେ ୨୨୫ ଏବଂ ମନମୁଣ୍ଡାଠାରେ ୫୫ ମେଗାଓ୍ବାଟ ସୌରଶକ୍ତି ପ୍ରକଳ୍ପ କରାଯାଇ ଥାଆନ୍ତା। ଏହି ଡିପିଆରକୁ ସେଣ୍ଟ୍ରାଲ ଇଲେକ୍ଟ୍ରିିସିଟି ଅଥରିଟି(ସିଇଏ)ର ଅନୁମୋଦନ ପାଇଁ ପଠାଯାଇଥିଲା। ଡିପିଆରକୁ ସିଇଏ ପରୀକ୍ଷାନିରୀକ୍ଷା କରିବା ପରେ ଅନୁମୋଦନ କରିଥିଲା। ଓପିଟିସିଏଲ ପକ୍ଷରୁ ଏ ନେଇ ଟେଣ୍ଡର ପ୍ରକ୍ରିୟା ମଧ୍ୟ ଆରମ୍ଭ କରାଯାଇଛି। ଏହି ପ୍ରକଳ୍ପ ଚୂଡାନ୍ତ ପର୍ଯ୍ୟାୟରେ ପହଞ୍ଚିଥିବା ବେଳେ ଓପିଟିସିଏଲ ଏଥିପାଇଁ ୫୦ ପ୍ରତିଶତ ଅର୍ଥ ନ୍ୟାଶନାଲ କ୍ଲିନ ଏନର୍ଜୀ ଫଣ୍ଡ(ଏନସିଇଏଫ)ରୁ ଦେବାକୁ କେନ୍ଦ୍ର ସରକାରଙ୍କୁ ଅନୁରୋଧ କରିଥିଲା। ରାଜ୍ୟ ସରକାରଙ୍କ ପ୍ରସ୍ତାବକୁ ଅନୁମୋଦନ ନ କରି ଗ୍ରୀନ ଏନର୍ଜୀ କରିଡର-୨ ସ୍କିମ କେନ୍ଦ୍ର ସରକାରଙ୍କ ଦ୍ୱାରା ଅନୁମୋଦନ ହୋଇ ନ ଥିବା ଜଣାଇ ଦିଆଯାଇଛି। ତେବେ ନିଲଡୁଙ୍ଗୁରୀ ଏବଂ ମନମୁଣ୍ଡାଠାରେ ହେବାକୁ ଥିବା ପ୍ରସ୍ତାବିତ ପ୍ରକଳ୍ପ ପାଇଁ ୪୦ ପ୍ରତିଶତ ଅର୍ଥ କେନ୍ଦ୍ର ନ ଦେଲେ ତାହା କାର୍ଯ୍ୟକାରୀ ହେବା ସମ୍ଭବ ନୁହେଁ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି।
