ବ୍ରହ୍ମପୁର ଅଫିସ,୨୩।୮- ଗଞ୍ଜାମ ଜିଲାର ଗ୍ରାମାଞ୍ଚଳରେ ଆତଙ୍କରାଜ ଚଳାଇଥିବା ଶିବ ସେଠୀ ଗ୍ୟାଙ୍ଗର ମୁଖ୍ୟ ଦୁର୍ଦ୍ଦାନ୍ତ ଶିବ ସମେତ ୮ଜଣଙ୍କୁ କାବୁ କରିଛି ବ୍ରହ୍ମପୁର ପୋଲିସ। ଗିରଫ ଅଭିଯୁକ୍ତ ମାନେ ହେଲେ ମୁଖ୍ୟ ଶିବ ସେଠୀ(୩୦), ଶଙ୍କର ସେଠୀ(୩୫), ଜିତୁ ସେଠୀ(୨୫), ଜି. ବିଶ୍ୱନାଥ ରେଡ୍ଡୀ(୨୬) , କେ . ଶଙ୍କର ରେଡ୍ଡୀ(୨୧), କେ ତିରୁପତି ରେଡ୍ଡୀ(୧୯), ଅଜୟ ସେଠୀ(୧୯) ଓ ସୁନୀଲ ସେଠୀ(୧୯)। ଶିବଙ୍କ ନିକଟରୁ ଗୋଟିଏ ବନ୍ଧୁକ, ୨ ରାଉଣ୍ଡ ଗୁଳି ଜବତ କରାଯାଇଥିବା ବେଳେ ଅନ୍ୟମାନଙ୍କଠାରୁ ୩ ଖଣ୍ଡା, ୫ ବୋମା ଓ ୩ ମୋବାଇଲ ଜବତ ହୋଇଛି। ଶୁକ୍ରବାର ଏକ ଖବରଦାତା ସମ୍ମିଳନୀରେ ଏସ୍ପି ପିନାକ ମିଶ୍ର ଏହି ସୂଚନା ଦେଇଛନ୍ତି।
ପ୍ରକାଶଯୋଗ୍ୟ, ଗତ ଗତ କିଛିଦିନ ତଳେ ଶିବ ସେଠୀ ଓ ତାଙ୍କ ଗ୍ୟାଙ୍ଗ ନରେନ୍ଦ୍ରପୁର ଗ୍ରାମ ଓ ଆଖପାଖ ଅଞ୍ଚଳରେ ବନ୍ଧୁକ ଧରି ଆତଙ୍କ ଖେଳାଇ ଥିଲେ। ଏଣୁ ଅଞ୍ଚଳରେ ଶାନ୍ତି ଶୃଙ୍ଖଳା ରଖିବା ସହ ଶିବ ଗ୍ୟାଙ୍ଗ୍କୁ ଗିରଫ କରିବା ନେଇ ନରେନ୍ଦ୍ରପୁର ଓ ଆଖପାଖ ଅଞ୍ଚଳର ବହୁ ମହିଳା ଓ ପୁରୁଷ ଏସ୍ପିଙ୍କୁ ଭେଟି ଅନୁରୋଧ କରିଥିଲେ। ଏହାକୁ ଆଧାର କରି ଗୁରୁବାର ରାତି ୭ଟା ବେଳେ ଶିବ ଓ ତା ଗ୍ୟାଙ୍ଗ ବଡ଼କୁସସ୍ଥଳୀ ନିକଟ ସିଏସି ଇନଷ୍ଟିଚ୍ୟୁଟ୍ ନିକଟରେ ମେଳି ବାନ୍ଧିଥିବା ଗୋପାଳପୁର ପୋଲିସ ଖବର ପାଇଥିଲା । ସେଠାରେ ପୋଲିସ ଚଢଉ କରିଥିଲା । ପୋଲିସକୁ ଦେଖି ଶିବ ତାଙ୍କ ଉପରକୁ ବୋମା ଫିଙ୍ଗିଥିଲା। ଏଥିରେ କେହି ଆହତ ହୋଇ ନ ଥିବା ବେଳେ ପୋଲିସ ଶିବ ସମେତ ୮ ଜଣଙ୍କୁ ଗିରଫ କରିଥିଲା। ଏହି ଗ୍ୟାଙ୍ଗରେ ଜଣେ ନାବାଳକ ସମିଲ ଥିବା ବେଳେ ପୋଲିସ ତାଙ୍କୁ ମଧ୍ୟ ଧରିଥିବା କହିଛି। ମାମଲା(ନଂ-୮୯/୧୯)ରେ ପୋଲିସ ଶିବଙ୍କ ସମେତ ଗିରଫ ୮ ଅଭିଯୁକ୍ତଙ୍କୁ ଶୁକ୍ରବାର କୋର୍ଟ ଚାଲାଣ କରାଯାଇଛି। ଅନ୍ୟପଟେ ନାବଳକଙ୍କୁ ଜୁବେନାଇଲ୍ ଜଷ୍ଟିସ ବୋର୍ଡ଼କୁ ପଠାଇ ଦିଆଯାଇଥିବା ପୋଲିସ ମଧ୍ୟ କହିଛି। ଏଥିରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଏସ୍ପି ପ୍ରଶାନ୍ତ କୁମାର ମିଶ୍ର, ସଦର ଏସ୍ଡିପିଓ ଜୟନ୍ତ ମହାପାତ୍ର ଓ ଗୋପାଳପୁର ଥାନାଧିକାରୀ ବିବେକାନନ୍ଦ ମହନ୍ତ ପ୍ରମୁଖ ଉପସ୍ଥିତ ଥିଲେ।
