ନୂଆଦିଲ୍ଲୀ, ୧୮।୫: କରୋନା ଭାଇରସ ସଂକ୍ରମଣ ଜନିତ ସ୍ଥିତିକୁ ଦୃଷ୍ଟିରେ ରଖି କ୍ରୀଡ଼ା ମନ୍ତ୍ରଣାଳୟ ସହାୟତା ଲୋଡ଼ିଛି ଭାରତୀୟ ଅଲିମ୍ପିକ୍ ଆସୋସିଏଶନ(ଆଇଓଏ)। ଆସନ୍ତାବର୍ଷ ପର୍ଯ୍ୟନ୍ତ କୌଣସି ପ୍ରାୟୋଜକ ଆଗକୁ ଆସିବା ସମ୍ଭାବନା ନାହିଁ। ତେଣୁ ସରକାର ସହାୟତାର ହାତ ବଢ଼ାଇବା ଜରୁରୀ ହୋଇପଡ଼ିଛି। ବିଭିନ୍ନ କ୍ରୀଡ଼ା ଅନୁଷ୍ଠାନ ପାଇଁ ୨୦୦ କୋଟିରୁ ଊର୍ଦ୍ଧ୍ୱ ଟଙ୍କା ଆର୍ଥିକ ସହାୟତା ଯୋଗାଇ ଦେବାକୁ କ୍ରୀଡ଼ା ମନ୍ତ୍ରଣାଳୟକୁ ଚିଠି ଲେଖିଛନ୍ତି ଆଇଓଏ ସଭାପତି ନରିନ୍ଦର ବାତ୍ରା। ଯଦି ସରକାରୀ ସହାୟତା ନ ମିଳେ ତେବେ ଲକ୍ଡାଉନ୍ ଉଠିଲେ ବିଭିନ୍ନ କ୍ରୀଡ଼ାର ସହଜ ଆରମ୍ଭ ଅସମ୍ଭବ ହୋଇପଡ଼ିବ ବୋଲି କ୍ରୀଡ଼ାମନ୍ତ୍ରୀ କିରେନ ରିଜିଜୁଙ୍କ ନିକଟକୁ ଲେଖିଥିବା ପତ୍ରରେ ବାତ୍ରା ଦର୍ଶାଇଛନ୍ତି। ଆଇଓଏ ପାଇଁ ୧୦କୋଟି, ଅଲିମ୍ପିକ୍ସ କ୍ରୀଡ଼ାର ବିଭିନ୍ନ ଜାତୀୟ ସ୍ପୋଟର୍ସ ଫେଡେରେଶନ (ଏନ୍ଏସ୍ଏଫ୍) ଗୁଡ଼ିକ ପାଇଁ ୫ କୋଟି ଲେଖାଏ, ଅଣ ଅଲିମ୍ପିକ୍ସ ଜାତୀୟ ସ୍ପୋଟର୍ସ ଫେଡେରେଶନଗୁଡ଼ିକ ପାଇଁ ୨.୫୦ କୋଟି ଲେଖାଏ, ବିଭିନ୍ନ ରାଜ୍ୟ କ୍ରୀଡ଼ା ଆସୋସିଏଶନ ପାଇଁ ୧ କୋଟି ଲେଖାଏ ଏହିପରି ପାଖାପାଖି ୨୨୦ କୋଟି ଟଙ୍କା ପ୍ରଦାନ କରିବାକୁ ବାତ୍ରା ଅନୁରୋଧ କରିଛନ୍ତି। ”୨୦୨୧ ଅଲିମ୍ପିକ୍ସ ଓ ଏହା ପର ପର୍ଯ୍ୟନ୍ତ ପ୍ରାୟୋଜକମାନେ ସହାୟତା କରିବା ସମ୍ଭାବନା ନାହିଁ। ଏପରି ସ୍ଥିତିରେ କ୍ରୀଡ଼ା ମନ୍ତ୍ରଣାଳୟ ସାହାଯ୍ୟ କରିବା ଉଚିତ। ଏହା କ୍ରୀଡ଼ାବିତ୍ ମାନଙ୍କୁ ଅନେକ ପରିମାଣରେ ସହାୟକ ହୋଇ ପାରିବ। ସମ୍ପୂର୍ଣ୍ଣ ବିଶ୍ୱ ଏବେ କଠିନ ସମୟ ଦେଇ ଗତି କରୁଛି। ସମସ୍ତ କ୍ରୀଡ଼ା ପ୍ରତିଯୋଗିତା, ଟ୍ରେନିଂ ଏବଂ ଅନ୍ୟ କାର୍ଯ୍ୟକଳାପ ସ୍ଥାଣୁ ଅବସ୍ଥାକୁ ଚାଲି ଆସିଛି। ଏ ସବୁ ଆରମ୍ଭ କରିବାକୁ ହେଲେ ଆସୋସିଏଶନଗୁଡ଼ିକୁ ଆର୍ଥିକ ସହାୟତା ଜରୁରୀ“ ବୋଲି ବାତ୍ରା ଲେଖିଛନ୍ତି ।
