ନୂଆଦିଲ୍ଲୀ,୨୬।୮: ଲୋକ ସଭାରେ ବିରୋଧୀ ଦଳର ନେତା ରାହୁଲ ଗାନ୍ଧୀ ଅଭିନେତ୍ରୀ କ୍ରିତି ସାନନଙ୍କ ସମର୍ଥନରେ ଆଗକୁ ଆସିଛନ୍ତି। ଇନଷ୍ଟାଗ୍ରାମରେ କ୍ରିତି ସାନନଙ୍କ ଷ୍ଟୋରିକୁ ରିପୋଷ୍ଟ କରି କଂଗ୍ରେସ ସାଂସଦ ରାହୁଲ ଗାନ୍ଧୀ ଲେଖିଛନ୍ତି, ଜଣେ ମହିଳା କ’ଣ ପିନ୍ଧନ୍ତି, କ’ଣ କରନ୍ତି ଏବଂ କେଉଁଠାକୁ ଯାଆନ୍ତି ଏହା ତାଙ୍କର ନିଜସ୍ବ ପସନ୍ଦ। ମହିଳାମାନେ ନିଜ ସ୍ବାଧୀନତାର ବ୍ୟବହାର କଲେ ସେମାନଙ୍କୁ ଟ୍ରୋଲ କରିବା ବନ୍ଦ କରନ୍ତୁ।
ରକ୍ଷାବନ୍ଧନ ଅବସରରେ ପ୍ରକାଶିତ ତାଙ୍କର ନୂଆ ବିଜ୍ଞାପନରେ ପୋଷାକକୁ ନେଇ ଅଭିନେତ୍ରୀ କ୍ରିତି ସାନନ ଅନଲାଇନରେ ସମାଲୋଚନାର ସମ୍ମୁଖୀନ ହୋଇଥିଲେ। ଏକ ଗହଣା ବ୍ରାଣ୍ଡର ବିଜ୍ଞାପନରେ କ୍ରିତିଙ୍କ ଇଣ୍ଡୋ-ୱେଷ୍ଟର୍ନ ଲୁକ୍କୁ ନେଇ ପ୍ରଶ୍ନ ଉଠାଯାଇଥିଲା। ଏହା ପରେ ଅଭିନେତ୍ରୀ କଙ୍ଗନା ରଣାୱତ ମଧ୍ୟ କାହାର ନାମ ନନେଇ ବିଜ୍ଞାପନର ଷ୍ଟାଇଲିଂକୁ ଟାର୍ଗେଟ କରିଥିଲେ।
ଟ୍ରୋଲରମାନଙ୍କୁ ଜବାବ ଦେଇ କ୍ରିତି ସାନନ କହିଥିଲେ ଯେ, ବର୍ଷ ବର୍ଷ ଧରି ପାରମ୍ପରିକ ଫ୍ୟାଶନରେ ପରିବର୍ତ୍ତନ ଆସିଥିଲେ ମଧ୍ୟ ଆଜି ବି ଜଣେ ମହିଳା ନିଜ ସଂସ୍କୃତି ପ୍ରତି କେତେ ସମ୍ମାନ ରଖନ୍ତି, ତାହାକୁ ତାଙ୍କ ପୋଷାକ ଆଧାରରେ ମପାଯାଉଛି।
କ୍ରିତି ସାନନ ଇନଷ୍ଟାଗ୍ରାମ ଷ୍ଟୋରିରେ ଏକ ନୋଟ ଶେୟାର କରି ଲେଖିଥିଲେ, ସଂସ୍କୃତି ଏବଂ ପରମ୍ପରା ହୃଦୟରେ ଥାଏ, ନେକ୍ଲାଇନରେ ନୁହେଁ। ମହିଳାମାନଙ୍କୁ ସେମାନେ କ’ଣ ପିନ୍ଧିବା ଉଚିତ ବୋଲି କହିବା ଆମେ କେବେ ବନ୍ଦ କରିବୁ? ବର୍ଷ ବର୍ଷ ଧରି ପାରମ୍ପରିକ ଫ୍ୟାଶନ ବିକଶିତ ହୋଇଛି, କିନ୍ତୁ ଏବେ ବି ଜଣେ ମହିଳାଙ୍କର ନିଜ ସଂସ୍କୃତି ପ୍ରତି ସମ୍ମାନକୁ କେବଳ ତାଙ୍କ ପୋଷାକ ଆଧାରରେ ମପାଯାଉଛି।
ସେ ଆହୁରି ଲେଖିଥିଲେ, ପର୍ବପର୍ବାଣୀର ଅର୍ଥ ଆପଣ ପିନ୍ଧିଥିବା ପୋଷାକରେ ନୁହେଁ, ବରଂ ସେହି ପରମ୍ପରା ପ୍ରତି ଆପଣଙ୍କ ଭାବନା ଏବଂ ତାହାର ଗୁରୁତ୍ୱରେ ରହିଛି। ରକ୍ଷାବନ୍ଧନ ହେଉଛି ସୁରକ୍ଷା ଓ ଭଲପାଇବାର ସମ୍ପର୍କର ପ୍ରତୀକ। ମୁଁ ଏବଂ ମୋ ଭଉଣୀ ପରସ୍ପରକୁ ରାକ୍ଷୀ ବାନ୍ଧୁ ଏବଂ ପରସ୍ପରର ସୁରକ୍ଷା, ଭଲ ସ୍ବାସ୍ଥ୍ୟ, ଖୁସି ଓ ଦୀର୍ଘାୟୁ କାମନା କରୁ।
