ନୂଆଦିଲ୍ଲୀ, ୧ା୬ : କେନ୍ଦ୍ର ମନ୍ତ୍ରିମଣ୍ଡଳରେ ଜେଡ଼ିୟୁ ସାମିଲ ହୋଇ ନ ଥିବା ବେଳେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଭାଜପାକୁ ଟାର୍ଗେଟ କରି ବିଷ ଓକାଳିଛନ୍ତି। ସାରା ଦେଶରେ ମୋଦି ହାଓ୍ବା ଏନ୍ଡିଏକୁ ବିପୁଳ ବିଜୟ ଆଣିଦେଇଥିବା କୁହାଯାଉଥିବାବେଳେ ବିହାରରେ କୌଣସି ବ୍ୟକ୍ତିଙ୍କ ନାମରେ ଏନ୍ଡିଏକୁ ଲୋକେ ଭୋଟ ଦେଇନାହାନ୍ତି ବୋଲି ଜେଡିୟୁ ନେତା ନୀତୀଶ କୁମାର କହିଛନ୍ତି। ବିହାରରେ ଏନ୍ଡିଏର ବିଜୟ ହେଉଛି ବିହାରବାସୀଙ୍କ ବିଜୟ। ଏନେଇ କେହି ଭ୍ରମରେ ପଡ଼ିବା ଠିକ୍ ନୁହେଁ ବୋଲି ସେ ପ୍ରକାଶ କରିଛନ୍ତି।
ଶପଥ ଗ୍ରହଣ ଉତ୍ସବରେ ଯୋଗଦେଇ ପାଟ୍ନା ଫେରିବା ପରେ ଗଣମାଧ୍ୟମକୁ ନୀତୀଶ କହିଛନ୍ତି,
କେନ୍ଦ୍ର ସରକାରରେ ଜେଡିୟୁକୁ ଗୋଟିଏ ମନ୍ତ୍ରୀ ପଦ ଦେବାକୁ ସ୍ଥିର ହୋଇଥିଲା। ଆମେ କିନ୍ତୁ ସମାନୁପାତିକ ପ୍ରତିନିଧିତ୍ୱ ଚାହିଁଥିଲୁ। ଏନଡିଏର ପ୍ରତ୍ୟେକ ସହଯୋଗୀ ଦଳକୁ ଗୋଟିଏ ଲେଖାଏ ମନ୍ତ୍ରୀ ପଦ ମିଳିବ ବୋଲି ନିଷ୍ପତ୍ତି ନିଆଯାଇଥିବା ଅମିତ୍ ଶାହ କହିଥିଲେ। ଜେଡିୟୁକୁ କେନ୍ଦ୍ରରେ ଗୋଟିଏ ମନ୍ତ୍ରୀ ପଦ ମିଳିବା ଗ୍ରହଣଯୋଗ୍ୟ ନୁହେଁ। ସାଂକେତିକ ନୁହେଁ, ବରଂ ସମାନୁପାତିକ ପ୍ରତିନିଧିତ୍ୱକୁ ମଧ୍ୟ ଗୁୁରୁତ୍ୱ ଦିଆଯିବା ଉଚିତ୍ ବୋଲି ନୀତୀଶ କହିଥିଲେ। ହେଲେ ଏହାକୁ ଗ୍ରହଣ କରାଯାଇ ନ ଥିଲା। ଶେଷରେ ଜେଡିୟୁ କେନ୍ଦ୍ର ମନ୍ତ୍ରିମଣ୍ଡଳରୁ ଓହରିଆସିଲା। ତେବେ ଏନ୍ଡିଏର ସହଯୋଗୀ ହୋଇ ଆମେ ରହିଛୁ ବୋଲି ନୀତୀଶ କୁମାର କହିଛନ୍ତି।
