ଭୁବନେଶ୍ୱର/ଫୁଲବାଣୀ,୨୮ା୨(ତ୍ରିନାଥ ମହାନ୍ତି/ରାକେଶ କୁମାର ରାଉତ): ମାଓବାଦୀଙ୍କୁ ଡିଜିପି ଓ୍ବାଇ.ବି. ଖୁରାନିଆ ଶୁକ୍ରବାର ଅନ୍ତିମ ଚେତାବନୀ ଦେଇଛନ୍ତି। ହିଂସା ଛାଡ଼ି ଆତ୍ମସମର୍ପଣ କର, ନ ହେଲେ ଏନ୍କାଉଣ୍ଟରର ଶିକାର ହେବ। ଡିଜିପି କହିଛନ୍ତି, ମାଓବାଦୀ ବନ୍ଧୁକ ନ ଛାଡ଼ିଲେ ଯେସାକୁ ତେସା ନୀତି ଆପଣାଇବ ପୋଲିସ। ମାଓବାଦୀମୁକ୍ତ ପାଇଁ ସ୍ବରାଷ୍ଟ୍ରମନ୍ତ୍ରୀ ଦେଇଥିବା ଟାର୍ଗେଟ ମାର୍ଚ୍ଚ ୩୧ ସୁଦ୍ଧା ଶେଷ ହେବ। ସେଥିଲାଗି କନ୍ଧମାଳରେ ଦାରିଙ୍ଗବାଡିରେ ଚାଲିଛି ଅପରେଶନ ‘ଶୁକ୍ରୁ’। ଘଞ୍ଚ ଜଙ୍ଗଲ ଓ ଗୁମ୍ଫାରେ ମାଓବାଦୀ ନେତା ଶୁକ୍ରୁ, ଶୀଳା, ନକୁଳ ଓ ସହଯୋଗୀମାନେ ଲୁଚିଥିବା ସନ୍ଦେହରେ ଜୋରଦାର ଅପରେଶନ ଚାଲିଛି। ଡ୍ରୋନ ଏବଂ ସନ୍ଧାନୀ କୁକୁର ସହାୟତାରେ ଖୋଜୁଛି ଓଡ଼ିଶା ପୋଲିସ। ଏଥିସହ ପୋଲିସ ତା’ର ଗୋଇନ୍ଦା ଟିମ୍କୁ ସକ୍ରିୟ କରିଛି। ଖୁବ୍ଶୀଘ୍ର ଶୁକ୍ରୁ ଓ ତାଙ୍କ ମନୋବଳ ବଢ଼ାଉଥିବା ଶୀଳାଙ୍କୁ ଖୋଜି ଖୋଜି ଏନ୍କାଉଣ୍ଟର କରାଯିବ। ଏନ୍କାଉଣ୍ଟର ପୂର୍ବରୁ ପୋଲିସ ଦେଇଥିବା ହେଲ୍ପ ଲାଇନ୍ ନମ୍ବରରେ ଯୋଗାଯୋଗ କରି ଆମତ୍ସମର୍ପଣ କଲେ ସବୁ ପ୍ରକାର ସହଯୋଗ ଯୋଗାଇ ଦିଆଯିବ। ସରକାରଙ୍କ ପୁନର୍ବାସ ଯୋଜନାର ଫାଇଦା ନେବାକୁ ଅପିଲ କରିଛନ୍ତି ପୋଲିସ ଡିଜି। ଏହା ସହ ହତିଆର ନେଇ ଆତ୍ମସମର୍ପଣ କଲେ ମିଳିବ ସରକାରୀ ସହାୟତା। କିନ୍ତୁ ହିଂସା ପଥ ଆପଣାଇଲେ ପରିସ୍ଥିତି ଭୟଙ୍କର ହେବ ବୋଲି ଚେତାବନୀ ଦେଇଛନ୍ତି ଡିଜିପି।
ଛତିଶଗଡ଼ରେ ମାଓବାଦୀ ଅପରେଶନ ଜୋର୍ଦାର ହେବା ପରେ ଛତିଶଗଡୀ ମାଓବାଦୀଙ୍କ ସହ ମିଶି ଶୁକ୍ରୁ ଓ ତା’ର ଟିମ୍ କନ୍ଧମାଳ ଜଙ୍ଗଲରେ ଲୁଚି ବୁଲୁଥିବା ଖବର ପାଇବା ପରେ ସେମାନଙ୍କୁ ଧରିବାକୁ ଗତ ୨୦ ତାରିଖରୁ ଓଡ଼ିଶା ପୋଲିସ ପକ୍ଷରୁ ଏହି ବଡ଼ ଅପରେଶନ ଜାରି ରହିଛି। ଏହି ଅପରେଶନରେ ନଣ୍ଡାବା ଜଙ୍ଗଲରେ ସିପିଆଇ ମାଓବାଦୀର ଡେପୁଟି କମାଣ୍ଡର ଯୋଗେଶ ଓ ପାର୍ଟି ସଦସ୍ୟା ରତ୍ନାକରଙ୍କ ମୁଣ୍ଡ ଗଡ଼ିବା ପରେ ଜଙ୍ଗଲ ଭିତରେ ସାଥୀ ନକ୍ସଲଙ୍କୁ ବନ୍ଧୁକ ଧରି ଲୁଚି ବୁଲୁଛନ୍ତି ଶୁକ୍ରୁ। ଆତ୍ମସମର୍ପଣ ପାଇଁ ଡିଜିପି ଖୁରାନିଆ ଶେଷ ଚେତାବନୀ ଦେଇଥିବାବେଳେ ଶନିବାରଠାରୁ ବଡ଼ ଧରଣର ଅପରେଶନ ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ ହୋଇଥିବା ସୂଚନା ମିଳିଛି। ଆକାଶମାର୍ଗରେ ଡ୍ରୋନ୍ ଓ ଘଞ୍ଚ ଜଙ୍ଗଲର ଗୁମ୍ଫା ଭିତରେ ସନ୍ଧାନୀ କୁକୁର ସହାୟତାରେ ଶୁକ୍ରୁଙ୍କୁ ଖୋଜିବାକୁ ନୂଆ ୧୩ଟି ଏସ୍ଓଜି ଟିମ୍କୁ ଜଙ୍ଗଲ ଭିତରକୁ ପଠାଯାଇଥିବା ସୂଚନା ମିଳିଛି।
ଆତ୍ମସମର୍ପଣରେ ବାଟ ଓଗାଳୁଛନ୍ତି ଶୁକ୍ରୁ
ମାଲକାନଗିରି ଜିଲା ବାସିନ୍ଦା ଶୁକ୍ରୁ ହେଉଛନ୍ତି କନ୍ଧମାଳ-କଳାହାଣ୍ଡି-ବୌଦ୍ଧ-ନୟାଗଡ଼ (କେକେବିଏନ୍) ଡିଭିଜନର ଷ୍ଟେଟ୍ କମିଟି ମେମ୍ବର। ସେ ୮କମ୍ପାନୀର ନେତୃତ୍ୱ ନେଇ କନ୍ଧମାଳ ଜଙ୍ଗଲ ଭିତରେ ଲୁଚି ମାଓମୁକ୍ତ ଅଭିଯାନ ବିରୋଧରେ ରଣନୀତି ଚଳାଇଛନ୍ତି। ଶୁକ୍ରୁ ତା’ର ଟିମ୍ ସଦସ୍ୟ ତଥା ଛତିଶଗଡ଼ ସାଥୀ ମାଓବାଦୀ ଅନ୍ବେଷଙ୍କୁ ହତ୍ୟା କରି ଜଙ୍ଗଲରେ ପୋତି ଦେଇଥିଲେ। ପୋଲିସ ପାଖରେ ଆତ୍ମସମର୍ପଣ କରିବାକୁ ଅନ୍ବେଷ ଚାହୁଁଥିଲେ। କିନ୍ତୁ ଏହାକୁ ବାରଣ କରିଆସୁଥିଲେ ଶୁକ୍ରୁ। ଆଉ କଥା ନ ଶୁଣିବାରୁ ଅନ୍ବେଷଙ୍କୁ ଗୁଳିକରି ମାରି ଗାତ ଖୋଳି ଜଙ୍ଗଲ ଭିତରେ ପୋତିଦେଇଥିଲେ। କେବଳ ଅନ୍ବେଷ ନୁହନ୍ତି, ଆତ୍ମ ସମର୍ପଣ ପାଇଁ ଚାହୁଁଥିତ୍ବା ତାଙ୍କ ଟିମ୍ର ଅନ୍ୟ ମାଓବାଦୀଙ୍କୁ ସେ ଏବେ ବାଟ ଓଗାଳିଛନ୍ତି। ତେଣୁ ପୋଲିସ ପାଇଁ ଶୁକ୍ରୁ ନିହାତି ଆବଶ୍ୟକ ହୋଇପଡ଼ିଛି। ସେ ପୋଲିସ ଧମକକୁ ଖାତିର ନ କରି ୩୦ରୁ ଊର୍ଦ୍ଧ୍ୱ ସାଥୀ ମାଓବାଦୀଙ୍କୁ ଧରି ଜଙ୍ଗଲରେ ଲୁଚି ବୁଲୁଛନ୍ତି। ସଂଗଠନ ଭିତରେ ବିଦ୍ରୋହ ଓ ଏପଟେ ପୋଲିସର ଚେତାବନୀ ଭିତରେ ୪୯ ବର୍ଷୀୟ ଶୁକ୍ରୁର ସାହା ଭରସା ସାଜିଛନ୍ତି ନକୁଳ ସହ ଜଣେ ଲେଡି ମାଓବାଦୀ ଶୀଳା। ନକୁଳ ଓ ଶୀଳା ହେଉଛନ୍ତି କେକେବିଏନ୍ ଡିଭିଜନର ଏରିଆ କମିଟି ମେମ୍ବର। ଅନ୍ୟମାନଙ୍କ ମଧ୍ୟରେ ଅଧିକାଂଶ ସଦସ୍ୟଙ୍କର ଘର ଛତିଶଗଡ଼ରେ ବୋଲି ଜଣାପଡିଛି।
Dharitri – Odisha’s No.1 Odia Daily
