ନୂଆଦିଲ୍ଲୀ,୯।୧୦: ଭାରତୀୟ କ୍ରିକେଟ୍ର ଯୁବ ତାରକା ଅଭିଷେକ ଶର୍ମା ନିଜ ବିସ୍ଫୋରକ ବ୍ୟାଟିଂ ପାଇଁ ବେଶ ପରିଚିତ। ଛକା ଓ ଚୌକା ବର୍ଷା କରିବାରେ ମାହିର ଏହି ବାମହାତୀ ଓପନର ଏବେ ଭାରତୀୟ ଦଳର ଜଣେ ପ୍ରମୁଖ ଆକର୍ଷଣ। ଭାରତୀୟ କ୍ରିକେଟ୍ରୁ ମହାନ ଖେଳାଳିଙ୍କଠାରୁ ଗୋଟିଏ ସ୍କିଲ ନେବାର ସୁଯୋଗ ମିଳିଲେ ସେ କାହାର କେଉଁ ଦକ୍ଷତା ନେବେ ପଚରାଯିବାରୁ
ସେ ଅଜବ ଜବାବ ଦେଇଛନ୍ତି। ବିରାଟ କୋହଲିଙ୍କ ନାଁ ଆସିବା ମାତ୍ରେ ଅଭିଷେକ ହସି ହସି କହିଛନ୍ତି ‘ସବୁକିଛି’। ଅର୍ଥାତ୍ ବିରାଟଙ୍କ ବ୍ୟାଟିଂର ସମସ୍ତ ଦକ୍ଷତା ନିଜ ଭିତରେ ଆଣିବାକୁ ଚାହାନ୍ତି ସେ। ତାଙ୍କର ଏହି ମଜାଦାର ଉତ୍ତର କ୍ରିକେଟ ପ୍ରଶଂସକଙ୍କ ମଧ୍ୟରେ ଚର୍ଚ୍ଚାର ବିଷୟ ହୋଇଛି।
ଅଭିଷେକ ଶର୍ମାଙ୍କ କ୍ରିକେଟ ଜୀବନରେ ଯୁବରାଜ ସିଂହଙ୍କର ବିଶେଷ ଭୂମିକା ରହିଛି। ଯୁବରାଜ ତାଙ୍କ ମେଣ୍ଟର ଭାବେ ମାର୍ଗଦର୍ଶନ କରିଆସିଛନ୍ତି। ଅଭିଷେକ କହିଛନ୍ତି ଯେ, ସେ ଯୁବରାଜଙ୍କ ମ୍ୟାଚ ଜିତାଇବାର କ୍ଷମତା ନିଜ ଭିତରେ ଆଣିବାକୁ ଚାହାନ୍ତି। ସେହିପରି ମହେନ୍ଦ୍ର ସିଂହ ଧୋନୀଙ୍କ ନାଁ ଆସିବାରୁ ତାଙ୍କ ମ୍ୟାଚ ଫିନିସ କରିବାର ଦକ୍ଷତାକୁ ବାଛିଥିଲେ ଅଭିଷେକ। ରୋହିତ ଶର୍ମାଙ୍କ ବ୍ୟାଟିଂ ଦକ୍ଷତା ମଧ୍ୟ ଅଭିଷେକଙ୍କୁ ପ୍ରଭାବିତ କରେ। ରୋହିତଙ୍କ ବଲ୍କୁ ଠିକ ଭାବେ ଟାଇମିଂ କରିବାର କଳାକୁ ସେ ନିଜ ଖେଳରେ ଆଣିବାକୁ ଚାହାନ୍ତି। କେବଳ ଭାରତୀୟ ଖେଳାଳି ନୁହନ୍ତି, ୱେଷ୍ଟଇଣ୍ଡିଜ୍ର ଷ୍ଟାର୍ କ୍ରିକେଟରଙ୍କ ଦକ୍ଷତା ମଧ୍ୟ ଅଭିଷେକଙ୍କୁ ଆକର୍ଷିତ କରେ। କ୍ରିସ ଗେଲ, କିରନ ପୋଲାର୍ଡ, ଡ୍ବେନ୍ ବ୍ରାଭୋ ମଧ୍ୟ ଅଭିଷେକଙ୍କୁ ବେଶ ପସନ୍ଦ।
ଅଭିଷେକ ନିଜେ ଜଣେ ବିସ୍ଫୋରକ ବ୍ୟାଟର ହୋଇଥିଲେ ମଧ୍ୟ ଅନ୍ୟ ମହାନ ଖେଳାଳିଙ୍କଠାରୁ ଶିଖିବାର ଇଚ୍ଛା ତାଙ୍କ ଉତ୍ତରରୁ ସ୍ପଷ୍ଟ ହୋଇଛି। କାହାର ମ୍ୟାଚ ଫିନିସିଂ, କାହାର ଟାଇମିଂ, ଆଉ କାହାର ପାୱାର୍ ଏହି ସବୁ ଗୁଣକୁ ନିଜ ଖେଳରେ ଯୋଡ଼ିବାକୁ ଚାହାନ୍ତି।
Dharitri – Odisha’s No.1 Odia Daily
