ଲାଠୋର, ୧୪ା୧ (ଡି.ଏନ୍.ଏ.)-
ସରକାର କଳାକାରମାନକୁ ମାସିକ ୧୨ଶହ ଟଁକା ଭତା ଯୁଗେଇ ଦେବାର ବେବସ୍ତା କରିଛନ୍। ହେଲେ ଅନେକ ଗଁାଗଁଡ଼ାରେ କଳାକାରମାନେ ଭତା ପାଏବାରୁ ବଁଚିତ୍ ହେଉଥିବାର ଅଭିଯୋଗ ହେଉଛେ। ସେ ହିସାବେ ବଲାଙ୍ଗୀର ଜିଲା ତୁରେକେଲା ବ୍ଲକ କୁହିବାହାଲ ପଁଚେତ୍ ଅଧୀନ ବାଞ୍ଜିପାଲି ଗଁାର ଗଣ୍ଡାବଜା କଳାକାର କନିଷ୍ଠ କୁମ୍ଭାର ଭତାରୁ ବଁଚିତ୍ ଥିବାର ଅଭିଯୋଗ କରିଛନ୍।
ସୂଚନା ଅନ୍ସାରେ କନିଷ୍ଠକଁର ପରିବାର କହେଲେ ମାଏକିନା ବିଳମତୀ, ଝି’ବନିତା ଆର ପୁଓ ଟୁନାକେ ନେଇ ତାକର ସଁସାର। ଜମିବାଡ଼ି ବଲି କିଛି ନାଇଁ, ପରିବାରଟା ମୂଲୁ ସୁଖ୍ବାସୀ ଆଏ। ଦମ୍ପତି ପରହର କାମବୁତା କରି ଦୁଇପଏସା ରୁଜ୍ଗାର କରୁଛନ୍। ସେଥ୍ରେ ତାକର ପରିବାରର ତେଲ୍ନୁନ, କପଡ଼ାଲତା, ଉଷୋକଷା ଖରଚ୍ ତୁଲଉଛନ୍। ହେଲେ ଅଭାବ ଅନାଟନ ଘରେ ସବୁବେଲେ ଲାଗି ରହିଛେ। ଏନ୍ତାଥି ଝି’ ବନିତା ପଁଚମ ଶ୍ରେଣୀରୁ ପାଠ୍ପଢ଼ା ଛାଡ଼ି ଘରେ ମା’ବାପ୍କେ ସାହାଯ୍ କରୁଛନ୍। ପୁଓ ଟୁନାକେ କଷ୍ଟେମଷ୍ଟେ ନବମ ଶ୍ରେଣୀରେ ପଢ଼ଉଛନ୍। ଇତାର ବାହାରେ କନିଷ୍ଠ ବଛରକ ପାଖାପାଖି ୧୦ ଜାଗାରେ ବଜା ବଜାବାର ଡକ୍ରା ପାଉଛନ୍। ସେଥ୍ରୁ ସେ ବଛରକ ୧୦ ହଜାର ଟଁକା କମାନି କରୁଛନ୍। କୁଲିମଜୁରି ଆର ବଜା ବଜେଇ କନିଷ୍ଠ ବଛରକ ପାଖାପାଖି ୩୦ ହଜାର ଟଁକା କମାନି କରୁଛନ୍। ହେଲେ ସେଟା ପରିବାରର ଦିହିକେ ଅଁଟ୍ଲେ ପେଟ୍କେ ନାଇଁ। ଏନ୍ତାଥି ସେ ରୁଜ୍ଗାର ବଢ଼ାବାର ଚିନ୍ତା କଲେ ବି ସେ ବାଟ୍ ନାଇଁ ପାଏବାର। ସେନ୍ତା କଳାକାର ଭତା ପାଏବାର ଲାଗି ସେ ଅନେକ ଥର ଅନେକ ଲୁକ୍କୁ ଭେଟି ଗୁହାରି କରି ନିରାଶ ହେଇଛନ୍। ଦିନ୍ଥିଲା କନିଷ୍ଠ ଗଣ୍ଡାବଜା ବଜେଇ ଭିନେ ଭିନେ ଜାଗାରୁ ପାଖାପାଖି ୧୩ ଖଁଡ୍ ମାନପତର ପାଇଥିଲେ। ହେଲେ ସେସବୁ ଆଏଜ୍ ତାକର ଲାଗି ଅଦରକାରୀ ପାଲଟିଛେ। କଳାକାର ଭତା ପାଏବାର ଆଶ୍ରେ ବଛ୍ରେ ତଲେ ଝନେ ଲୋକ୍କେ କନିଷ୍ଠ ଦରକାରୀ କାଗଜପତର ସହିତେ ୩ ହଜାର ଟଁକା ଦେଇଥିଲେ। ହେଲେ ସେ ଲୋକ୍ ଭତା ତ କରେଇ ନାଇଁପାରଲେ, ପଏସା ବି ନାଇଁ ଫିରାଲେ। ତୁରେକେଲା ବ୍ଲକ ଅଂଚଲରେ କେହି ଝନେ ନିରିହ କଳାକାରମାନକୁ ଭୁରତେଇ ଭତା କରେଇ ଦେବାର ବାହାନାରେ ୩ ହଜାର ଟଁକା ଲେଖେଁ ଠକୁଥିବାର ଅନେକ କଳାକାର ଅଭିଯୋଗ କରିଛନ୍। ଇ ଦିଗେ ଥାନୀଅ ପରଶାସନ ଦୁରୁଷ୍ଟି ଦେବାକେ ବୁଧିଜୀବୀ ମହଲରେ ଦାବି ହେଉଛେ। ସେନ୍ତା ଜିଲା ପରଶାସନ ଗଁଗଁାଲିରେ ଥିବାର ପୁରଖା କଳାକାରମାନକୁ ଚିନ୍ହଁଟ କରି କଳାକାର ଭତା ଯୁଗେଇଦେବାକେ ଅଂଚଲର କଳାକାରମାନେ ଦାବି କରିଛନ୍।
