ମୁମ୍ବାଇ,୮।୬: ଟେଲି ଅଭିନେତ୍ରୀ ତଥା ମଧ୍ୟପ୍ରଦେଶର ରଓ୍ବୋ ରାଜକୁମାରୀ ମୋହେନା କୁମାରୀ ସିଂହ ଓ ତାଙ୍କ ପୁରା ପରିବାର ଏବେ କରୋନା କବଳରେ। ମୋହେନାଙ୍କ ସହ ପରିବାରର ୨୧ଜଣ ସଦସ୍ୟ କରୋନା ସଂକ୍ରମଣରେ ସଂକ୍ରମିତ ହୋଇଥିବା ଜଣାପଡ଼ିଛି। ସମସ୍ତ ଆକ୍ରାନ୍ତଙ୍କୁ ଉତ୍ତରାଖଣ୍ଡର ରିଷିକେଶ ଏମ୍ସ ହସ୍ପିଟାଲରେ ଭର୍ତ୍ତି କରାଯାଇଛି। କରୋନା ସହ ଲଢ଼ୁଥିବା ମୋହେନା ନିକଟରେ ଇନ୍ଷ୍ଟାଗ୍ରାମରେ ଲାଇଭ୍ ଭିଡିଓ କରି ନିଜ କଷ୍ଟ ବିଷୟରେ ବଖାଣିଛନ୍ତି। ସେହି ସମୟରେ ସେ ଅନ୍ଲାଇନରେ ନିଜ ବନ୍ଧୁଙ୍କୁ ଦେଖି କାନ୍ଦି ପକାଇଥିବା ଦେଖିବାକୁ ମିଳିଛି। ଏଥିସହ ହସ୍ପିଟାଲରେ ଚିକିତ୍ସିତ ହେଉଥିବାର ୬ଦିନ ବିତିଯାଇଥିଲେ ମଧ୍ୟ ତାଙ୍କ ରିପୋର୍ଟ କରୋନା ନେଗେଟିଭ୍ ଆସି ନ ଥିବାରୁ ସେ ଚିନ୍ତିତ ଥିବା ଭିଡିଓରେ ଜଣାପଡ଼ୁଛି। ଉକ୍ତ ଭିଡିଓରେ ମୋହେନା କହିଛନ୍ତି, ଶାରିରୀକ ସ୍ତରରେ ସୁସ୍ଥ ଥିଲେ ମଧ୍ୟ ସେ ମାନସିକ ସ୍ତରରେ ଅସୁସ୍ଥତା ଅନୁଭବ କରୁଛନ୍ତି। ତାଙ୍କର ଏହି ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ସୂଚନାଯୋଗ୍ୟ, ସର୍ବପ୍ରଥମେ ମୋହେନା ଶାଶୁଙ୍କ ଦେହ ଅସୁସ୍ଥ ହୋଇଥିଲା। ଏହାପରେ ସେ ମଧ୍ୟ ଅସୁସ୍ଥ ଅନୁଭବ କରିଥିଲେ। ପରେ ଦୁହିଁଙ୍କର ଯାଞ୍ଚ କରାଯାଇଥିବା ବେଳେ ରିପୋର୍ଟ ନେଗେଟିଭ୍ ଆସିଥିଲା। କିନ୍ତୁ ଶାଶୁଙ୍କର ଜ୍ୱର ନ କମିବାରୁ ପୁଣି ଥରେ ଯାଞ୍ଚ କରାଯାଇଥିଲା। ହେଲେ ଚଳିତ ଥର ତାଙ୍କର ରିପୋର୍ଟରେ କରୋନା ପଜିଟିଭ୍ ବାହାରିଥିଲା ବୋଲି ମୋହିନା ଲାଇଭ୍ ଚାଟ୍ରେ କହିଥିଲେ। ତେବେ ସୁରକ୍ଷା ଦୃଷ୍ଟିରୁ ପରିବାରର ଅନ୍ୟ ସଦସ୍ୟଙ୍କୁ କ୍ୱାରାଣ୍ଟାଇନ୍ ସେଣ୍ଟରକୁ ପଠାଇ ଦିଆଯାଇ ଯାଞ୍ଚ କରାଯାଇଥିଲା। ସେଥିରେ ଅଧିକରୁ ଅଧିକ ରିପୋର୍ଟ ପଜିଟିଭ୍ ବାହାରିଥିବା ବେଳେ ସେମାନଙ୍କୁ ଚିକିତ୍ସା ପାଇଁ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଛି।
