ନୂଆଦିଲ୍ଲୀ,୨୬।୧୨:ଆଇପିଏଲ ୨୦୨୭ ପାଇଁ ଖେଳାଳିଙ୍କ ମିନି ନିଲାମ ଡିସେମ୍ବର ୧୬ରେ ଗୋଆରେ ଆୟୋଜିତ ହେବ। ଏହି ଦିନ ବେଙ୍ଗାଲୁରୁରେ ଭାରତ ଓ ଶ୍ରୀଲଙ୍କା ମଧ୍ୟରେ ଦ୍ୱିତୀୟ ଦିନିକିଆ ମ୍ୟାଚ ମଧ୍ୟ ଖେଳାଯିବାର କାର୍ଯ୍ୟସୂଚୀ ରହିଛି। ନିଲାମ ପୂର୍ବରୁ ସମସ୍ତ ୧୦ଟି ଫ୍ରାଞ୍ଚାଇଜକୁ ନଭେମ୍ବର ୧୫ ସୁଦ୍ଧା ସେମାନେ କେଉଁ ଖେଳାଳିଙ୍କୁ ଦଳରେ ରଖିବେ ଏବଂ କାହାକୁ ଛାଡ଼ିବେ, ସେନେଇ ତାଲିକା ଦେବାକୁ ପଡ଼ିବ। ନିଲାମ ଆରମ୍ଭ ହେବାର ପ୍ରାୟ ଏକ ସପ୍ତାହ ପୂର୍ବରୁ ଫ୍ରାଞ୍ଚାଇଜ୍ଗୁଡ଼ିକୁ ନିଲାମରେ ସାମିଲ ହେବାକୁ ଥିବା ଖେଳାଳିଙ୍କ ଚୂଡ଼ାନ୍ତ ତାଲିକା ଓ ନିଲାମର କ୍ରମ ସମ୍ପର୍କିତ ସୂଚନା ମିଳିବ।
ଆଇପିଏଲ ୨୦୨୬ ସିଜନ ଶେଷ ହେବା ପରଠାରୁ ଏପର୍ଯ୍ୟନ୍ତ ଦୁଇ ଜଣ ଖେଳାଳିଙ୍କ ଟ୍ରେଡ ହୋଇଥିବା ଜଣାପଡ଼ିଛି। ଆଇପିଏଲ୍ର ନିୟମ ଅନୁଯାୟୀ, ସିଜନ ଶେଷ ହେବାର ଏକ ମାସ ପରେ ଖେଳାଳି ଟ୍ରେଡ ୱିଣ୍ଡୋ ଖୋଲିଥାଏ। ଏହା ନିଲାମର ଏକ ସପ୍ତାହ ପୂର୍ବରୁ ବନ୍ଦ ହୁଏ। ପରେ ନୂଆ ସିଜନ ଆରମ୍ଭ ହେବାର ଏକ ମାସ ପୂର୍ବ ପର୍ଯ୍ୟନ୍ତ ଏହି ୱିଣ୍ଡୋ ପୁଣି ଖୋଲା ରହେ। ଲକ୍ଷ୍ନୌ ସୁପର ଜାଏଣ୍ଟସ ନିଜ ଅଧିନାୟକ ଋଷଭ ପନ୍ତଙ୍କୁ ଦିଲ୍ଲୀ କ୍ୟାପିଟାଲ୍ସକୁ ଦେଇ ତାଙ୍କ ବଦଳରେ ରିଷ୍ଟ ସ୍ପିନର କୁଲଦୀପ ଯାଦବଙ୍କୁ ଦଳରେ ସାମିଲ କରିଛି।
ସେହିପରି ଦିଲ୍ଲୀ କ୍ୟାପିଟାଲ୍ସ ନିଜର ଦ୍ରୁତ ବୋଲର ଟି. ନଟରାଜନଙ୍କୁ ସନ୍ରାଇଜର୍ସ ହାଇଦ୍ରାବାଦକୁ ଟ୍ରେଡ କରିଛି। ଏହା ବଦଳରେ ଦିଲ୍ଲୀ ଯୁବ ଲେଗ ସ୍ପିନର ଜିଶାନ ଅନସାରୀଙ୍କୁ ନିଜ ଦଳରେ ସାମିଲ କରିଥିବା ଖବର ପ୍ରକାଶ ପାଇଛି। ଜିଶାନ ଏପର୍ଯ୍ୟନ୍ତ ଅନ୍ତର୍ଜାତୀୟ କ୍ରିକେଟ ଖେଳିନାହାନ୍ତି। ତେଣୁ ସେ ଜଣେ ଅନକ୍ୟାପ୍ଡ ଖେଳାଳି।
ଆଇପିଏଲ ୨୦୨୭ ସିଜନ କେବେ ଆରମ୍ଭ ହେବ ଓ କେବେ ଶେଷ ହେବ, ସେନେଇ ବିସିସିଆଇ ପକ୍ଷରୁ ଏପର୍ଯ୍ୟନ୍ତ ଚୂଡ଼ାନ୍ତ ଘୋଷଣା ହୋଇନାହିଁ। ୨୦୨୪ରେ ପରବର୍ତ୍ତୀ ତିନିଟି ସିଜନ ପାଇଁ ସମ୍ଭାବ୍ୟ ସମୟସୀମା ଘୋଷଣା କରାଯାଇଥିଲା। ସେଥିରେ ମାର୍ଚ୍ଚ ୧୪ରୁ ମେ’ ୩୦ ମଧ୍ୟରେ ଟୁର୍ନାମେଣ୍ଟ ଆୟୋଜନ କରିବାର ଯୋଜନା ରହିଥିଲା। ତେବେ ଚଳିତ ବର୍ଷ ସେପ୍ଟେମ୍ବରରେ ବିସିସିଆଇର ବାର୍ଷିକ ସାଧାରଣ ସଭା (AGM) ପରେ ବୋର୍ଡ ସଚିବ ଦେବଜିତ ସାଇକିଆ ଟୁର୍ନାମେଣ୍ଟ ମାର୍ଚ୍ଚ ଶେଷ ଆଡ଼କୁ ଆରମ୍ଭ ହୋଇପାରେ ବୋଲି ସଙ୍କେତ ଦେଇଥିଲେ।
ଆଇପିଏଲ୍ର ଗତ କିଛି ନିଲାମ ଭାରତ ବାହାରେ ଆୟୋଜିତ ହୋଇଥିଲା। ୨୦୨୪ର ନିଲାମ ଦୁବାଇରେ, ୨୦୨୫ର ନିଲାମ ସାଉଦି ଆରବର ଜେଦ୍ଦାରେ ଏବଂ ୨୦୨୬ର ନିଲାମ ଆବୁଧାବିରେ ଆୟୋଜିତ ହେବାର ଯୋଜନା ରହିଥିଲା।
ନିଲାମ ପରିଚାଳନା ପାଇଁ ଫ୍ରାଞ୍ଚାଇଜ ମାଲିକ, ଅଧିକାରୀ, ପ୍ରଶିକ୍ଷକ ଓ ଖେଳାଳି ଚୟନକାରୀ ପ୍ରତିନିଧିମାନଙ୍କୁ ଯୋଗ ଦେବାକୁ ପଡ଼ିଥାଏ। ବିଦେଶରେ ଏତେ ଲୋକଙ୍କ ରହଣି, ହୋଟେଲ, ଯାତାୟାତ ଓ ଅନ୍ୟାନ୍ୟ ବ୍ୟବସ୍ଥା କରିବା ବ୍ୟୟବହୁଳ ହେବା ସହ ଜଟିଳ ମଧ୍ୟ ହୋଇଥାଏ। ବିଶେଷକରି ମିନି ନିଲାମରେ ମେଗା ନିଲାମ ତୁଳନାରେ କମ ଖେଳାଳି କିଣାଯାଉଥିବାରୁ ଏହି ବ୍ୟବସ୍ଥା ନେଇ ଆଲୋଚନା ହୋଇଥାଏ।
Dharitri – Odisha’s No.1 Odia Daily
