ଭୁବନ, ୨୬ା୧ – ବିଦ୍ୟୁତ୍ ଆଘାତରେ ରୁଦ୍ଧ ହୋଇଯାଇଥିଲା କଣ୍ଠସ୍ବର। ଆଉ କେବେ ଅର୍କେଷ୍ଟ୍ରାରେ ଗୀତ ଗାଇପାରିବେ କି ନାହଁ ତାହାକୁ ନେଇ ସୃଷ୍ଟି ହୋଇଥିଲା ଅନେକ ଆଶଙ୍କା, ଦ୍ୱନ୍ଦ୍ୱ। ହେଲେ ଏହି ଦୁର୍ଘଟଣା ହିଁ ଏବେ ପାଲଟିଯାଇଛି ତାଙ୍କ ପାଇଁ ବରଦାନ। ଅବିରତ ଅଭ୍ୟାସରୁ ତାଙ୍କ କଣ୍ଠରେ ଗୁଞ୍ଜରି ଉଠୁଛି ଡୁବିତବଲା, ମୃଦଙ୍ଗ, ଗିଟାର ଏବଂ ଭାଓଲିନ୍ ଭଳି ବାଦ୍ୟଯନ୍ତ୍ରର ଅବିକଳ ସ୍ବର। ବୃତ୍ତିଗତ ଜୀବନରେ ଜଣେ ସାଧାରଣ ଚା ଦୋକାନୀ, ଅଥଚ ନିଶା ସଙ୍ଗୀତ। ଏପରି ଜଣେ ପ୍ରତିଭାଧର ହେଲେ ଭୁବନ ଏନ୍ଏସିର ଡମ୍ବରୁଧର ପୋଥାଳ। ପ୍ରତିକୂଳ ସମୟରେ ନିଷ୍ଠାପର ଉଦ୍ୟମ ତାଙ୍କୁ ପରିଚିତି ଆଣିଦେଇଥିବାବେଳେ ସେ ଏବେ ପାଲଟିଛନ୍ତି ସବୁରି ପ୍ରିୟ।
ଭୁବନ ଏନ୍ଏସି ୬ନଂ. ଓ୍ବାର୍ଡରେ ରୁହନ୍ତି ଡମ୍ବରୁଧର। ବୟସ ୪୩ ଟପିଲାଣି। ସ୍ତ୍ରୀ, ଦୁଇଝିଅଙ୍କୁ ନେଇ ତାଙ୍କ ପରିବାର। ଶିକ୍ଷିତ ଡମ୍ବରୁଧର ଯୁକ୍ତ ୨ଯାଏ ପାଠ ପଢ଼ିଛନ୍ତି। ଟଙ୍କା ଅଭାବରୁ ପାଠପଢ଼ାରେ ବନ୍ଧା ହେଲା ଡୋରି। ପରିବାରର ଦାୟିତ୍ୱ କାନ୍ଧକୁ ଆସିବା ପରେ ସେ କିଛି ଦିନ ଦିଲ୍ଲୀରେ ଏକ ବେସରକାରୀ ସଂସ୍ଥାରେ କାମ କରିଥିଲେ। ହେଲେ କାହା ପାଖରେ ଗୋଡ଼ଭାଙ୍ଗି ଠିଆ ହେବା ପସନ୍ଦ ଆସିଲାନି। ନିଜ ଉଦ୍ୟମରେ କିଛି କରିଦେଖାଇବା ଉଦ୍ଦେଶ୍ୟରେ ପୁଣି ଗଁା ମୁହଁା ହୋଇଥିଲେ ସେ। କଳାପ୍ରତି ଆଗ୍ରହ ଥିବାରୁ ସେ ଡ୍ରାମାରେ ଅଭିନୟ କରିବା ସାଙ୍ଗକୁ ଅର୍କେଷ୍ଟ୍ରା ପାର୍ଟିରେ ଗୀତ ଗାଇବା ଆରମ୍ଭ କଲେ। ତା’ ସହ ବିଭିନ୍ନ ବାଜା ବଜାଇ ହାସଲ କଲେ ଲୋକପ୍ରିୟତା। ୧୯୯୩ରେ ପରିବାର ଚଳାଇବାକୁ ସେ ଆରମ୍ଭ କରିଥିଲେ ପରିବା ବ୍ୟବସାୟ। ହେଲେ ଏହା ମଧ୍ୟ ବେଶିଦିନ ତିଷ୍ଠିଲାନି। ଏହାପରେ ସେ ଚା ଦୋକାନ କରିଥିଲେ। ହେଲେ ଏକ ଦୁର୍ଘଟଣା ତାଙ୍କ ଜୀବନର ଗତିପଥ ବଦଳାଇଦେଲା। ବିଦ୍ୟୁତ୍ ସଂସ୍ପର୍ଶରେ ଆସିବା କାରଣରୁ ତାଙ୍କ କଣ୍ଠରୁଦ୍ଧ ହୋଇଯାଇଥିଲା। ସେ ଭଲ ଭାବେ କଥା ହୋଇପାରୁ ନ ଥିଲେ। ସ୍ବର ବି ବେସୁରା ହୋଇଗଲା। ହେଲେ ସଙ୍ଗୀତ ପ୍ରତି ଥିବା ସମର୍ପଣ ଭାବ ପାଇଁ ମାତ୍ର କିଛିଦିନରେ ସବୁକିଛି ସ୍ବାଭାବିକ ହୋଇଗଲା। ଅନବରତ ଉଦ୍ୟମ କରି ସେ ଏବେ ତବଲା, ଗିଟାର, ମୃଦଙ୍ଗ ଏବଂ ଭାଓଲିନର ସ୍ବରର ନକଲ କରିପାରୁଛନ୍ତି। କଳାକାରମାନେ ସଙ୍ଗୀତ ପରିବେଷଣ କରିବା ସମୟରେ ସେ ନିଜ କଣ୍ଠକୁ ଉପଯୋଗ କରି ଭିନ୍ନ ଭିନ୍ନ ବାଦ୍ୟର ତାଳ ସୃଷ୍ଟି କରିପାରୁଛନ୍ତି। ଏହା ତାଙ୍କ ବ୍ୟବସାୟିକ ସଫଳତା ପାଲଟିଛି। ଚା, କଫି ପିଇବାକୁ ଆସୁଥିବା ଗ୍ରାହକମାନେ ତାଙ୍କ ଗୀତକୁ ବେଶ୍ ପସନ୍ଦ କରୁଛନ୍ତି। ଏ ନେଇ ଡମ୍ବରୁଧର କୁହନ୍ତି, ୧୫୦୦ଟଙ୍କାରୁ ଚା’ ଦୋକାନ ଆରମ୍ଭ ହୋଇଥିଲା। ଏବେ ଲକ୍ଷେ ଟଙ୍କାରେ ପହଞ୍ଚତ୍ଲାଣି। ଦିନକୁ ୫୦୦ରୁ ବେଶି ଟଙ୍କା ଲାଭ ହେଉଛି। ପେଟପାଟଣା କଥା ବୁଝୁଛି ଚା ଦୋକାନ। ମନକୁ ଆନନ୍ଦ ଦେଉଛି ସଙ୍ଗୀତ। ଲୋକମାନଙ୍କୁ ମନୋରଞ୍ଜନ କରିପାରୁଥିବାରୁ ବେଶ୍ ଖୁସି ବୋଲି ସେ କହିଛନ୍ତି।
