ଖୋର୍ଦ୍ଧା,୬।୧(ପ୍ରଭାତ ପାଣିଗ୍ରାହୀ): ଖୋର୍ଦ୍ଧା ଜିଲାରେ ଧାନକିଣାରେ ବ୍ୟାାପକ ଅବ୍ୟବସ୍ଥା ଲାଗି ରହିଛି। ଧାନର ଏଫଏକ୍ୟୁ ମାନ ନ ଥିବା ଦର୍ଶାଇ ମନଇଚ୍ଛା କଟନିଛଟନି କରାଯାଉଛି। ଏହାର ପ୍ରତିବାଦରେ ନବ ନିର୍ମାଣ କୃଷକ ସଙ୍ଗଠନ ରାଜ୍ୟ ସଭାପତି ଅକ୍ଷୟ କୁମାରଙ୍କ ନେତୃତ୍ୱରେ ଖୋର୍ଦ୍ଧା, ବେଗୁନିଆ, ବୋଲଗଡ, ଟାଙ୍ଗୀ, ବାଣପୁର ଓ ଜଟଣୀ ବ୍ଲକ ଶତାଧିକ ଚାଷୀ ବାଟମଙ୍ଗଳାଠାରେ ଏକାଠି ହୋଇ ସାଧାରଣ ସଭାରେ ଏହାର ବିରୋଧ କରିଥିଲେ। ସେଠାରୁ ଶୋଭାଯାତ୍ରାରେ ବାହାରି ଜିଲାପାଳଙ୍କ କାର୍ଯ୍ୟାଳୟ ଆଗରେ ପହଞ୍ଚି ବିକ୍ଷୋଭ କରିଥିଲେ। କଟନିଛଟନି ବନ୍ଦ, ସିଏସଓଙ୍କ ବଦଳି ଦାବିରେ ଜିଲାପାଳଙ୍କ ଉଦ୍ଦେଶ୍ୟରେ ଦାବିପତ୍ର ଦେଇଥିଲେ। ଅତିରିକ୍ତ ଜିଲାପାଳ ପ୍ରତାପ ଚନ୍ଦ୍ର ବେଉରା ଘଟଣାସ୍ଥଳରେ ପହଞ୍ଚି ଆଲୋଚନା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା।
ଧାନ କୁଇଣ୍ଟାଲ ପିଛା ୫ କେଜିରୁ ୧୦ କେଜି କଟାଯାଉଛି। ମଣ୍ଡି ମିଲର୍ସଙ୍କ ମନଇଚ୍ଛାରେ ଚାଲିଛି। ବିରୋଧ କରିଲେ ମିଲ ମାଲିକ ଧାନ ଉଠାଉନାହାନ୍ତି। ଚାଷୀଙ୍କୁ ଝୋଟ ଅଖା ଦିଆଯାଉନି। ମଣ୍ଡି ମିଲ ମାଲିକ ଓ ସିଏସଓଙ୍କ ମଧୁଚନ୍ଦ୍ରିକାରେ ଚାଲିଛି। ଟୋକନ ଲାପସ କରିବାକୁ ଆସିଲାଣି, ଟାର୍ଗେଟ ନ ଥିବା କହି ଦିନ ଗଡାଇ ଚାଲିଛନ୍ତି। ମଣ୍ଡିରେ ଧାନ ପଡିରହିଛି। ବାରମ୍ବାର ଅଭିଯୋଗ ସତ୍ତ୍ବେ ସିଏସଓ କାର୍ଯ୍ୟାନୁଷ୍ଠାନ ପରିବର୍ତ୍ତେ ମିଲର୍ସଙ୍କୁ ଘଣ୍ଟ ଘୋଡାଉଛନ୍ତି। ତୁରନ୍ତ ସିଏସଓଙ୍କୁ ଏଠାରୁ ବଦଳି ଦାବି କରିଛନ୍ତି ଚାଷୀ।
ନବ ନିର୍ମାଣ କୃଷକ ସଙ୍ଗଠନ ରାଜ୍ୟ ସଭାପତି ଅକ୍ଷୟ କୁମାର, ରାଜ୍ୟ ଯୁବ ସଂଯୋଜକ ମନହୋର ଅଲୀ, ରାଜ୍ୟ ସଂଯୋଜକ ଶେଷଦେବ ନନ୍ଦ ପ୍ରମୁଖ କହିଥିଲେ, ସଫା, ଶୁଖିଲା, ସାଧାରଣ ମାନ ଧାନ ଉପରୁ ୫ କେଜି କାଟ ବନ୍ଦ କରାଯାଉ। ଖୋର୍ଦ୍ଧା ଜିଲାରେ ଏଫଏକ୍ୟୁ ନ ଥିବା ଦର୍ଶାଇ କଟନି-ଛଟନିକୁ ପ୍ରୋତ୍ସାହିତ କରୁଥିବା ମିଲର୍ସ, ଅସାଧୁ କର୍ମଚାରୀ ଗିରଫ କରାଯାଉ। ଯୋଗାଣ ବିଭାଗ ସ୍କ୍ବାଡ କଣ କରୁଛି ବୋଲି ପ୍ରଶ୍ନ କରିଛନ୍ତି। ମଣ୍ଡିରେ ସମ୍ପାଦକ ଧାନ କିଣିବା ପରିବର୍ତ୍ତେ ମିଲର୍ସ ଏଜେଣ୍ଟ ଜରିଆରେ ଧାନ କିଣାଯାଉଛି। ଅସାଧୁ ମିଲର୍ସଙ୍କୁ ଧାନକିଣାରୁ ବାଦ ଦିଆଯିବ ସହ ବିନା କଟନିଛଟନିରେ ଧାନ କିଣିବାକୁ ଦାବି କରିଛନ୍ତି।
ଅତିରିକ୍ତ ଜିଲାପାଳ ପ୍ରତାପ ଚନ୍ଦ୍ର ବେଉରା କହିଛନ୍ତି, ସରକାରଙ୍କ ଗାଇଡଲାଇନ ଅନୁସାରେ ଧାନର ଏଫଏକ୍ୟୁ ଥିଲେ ଚାଷୀ ତାହାର ଫାଇଦା ପାଇବ। ଚାଷୀଙ୍କ ପକ୍ଷରୁ ଆସିଥିବା ଅଭିଯୋଗ ତଦନ୍ତ ପାଇଁ ଡିଆରସିଏସଙ୍କୁ ନିଦ୍ଦେର୍ଶ ଦିଆଯାଇଛି। ମିଲର୍ସ ଚାଷୀଙ୍କୁ ଝୋଟ ଅଖା, ପ୍ରଦାନ କରିବାକୁ କୁଆଯାଇଛି। ଏଥିରେ ଅଣଦେଖା କରାଗଲେ କାର୍ଯ୍ୟନୁଷ୍ଠାନ ନିଆଯିବ।
