କଟକ ସଦର,୩ା୨(ଡି.ଏନ୍.ଏ.): ପଞ୍ଚାୟତିରାଜ ଓ ପାନୀୟ ଜଳ ବିଭାଗର ନିର୍ଦ୍ଦେଶକୁ ଉଲ୍ଲଂଘନ କରି କଟକସଦର ସମେତ ଜିଲାର ଅଧିକାଂଶ ବ୍ଲକରେ ଏଲ୍ଇଡି ଲାଇଟ୍ କିଣାଯାଇଥିଲା। ଏ ନେଇ ‘ଧରିତ୍ରୀ’ରେ ଶନିବାର ରିପୋର୍ଟ ପ୍ରକାଶ ପାଇଥିଲା। ଖବର ପ୍ରକାଶ ପାଇବା ପରେ ତପତ୍ର ହୋଇପଡ଼ିଛି ପ୍ରଶାସନ। ଲାଇଟ୍ କିଣାର ତଦନ୍ତ କରିବା ସହ ୭୨ ଘଣ୍ଟାରେ ରିପୋର୍ଟ ଦାଖଲ କରିବାକୁ କଟକ ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ମହମ୍ମଦ ଅବଦ୍ଦଲ ଅଖତର୍ ବିଡ଼ିଓମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ସହ ଭାରତରେ ଥିବା ବିଭିନ୍ନ ବ୍ରାଣ୍ଡର ଏଲ୍ଇଡି ଲାଇଟ ଥିବା ବେଳେ ଚାଇନା କମ୍ପାନୀର ଲାଇଟ୍ କିଣିବାର ମଧ୍ୟ ତଦନ୍ତ ହେବ। ଲାଇଟ୍ ଉପରେ ଗୋଟିଏ ବର୍ଷର ଗ୍ୟାରେଣ୍ଟି ଦିଆଯାଇଥାଏ। କିନ୍ତୁ ପଞ୍ଚାୟତ କ୍ଷେତ୍ରରେ ଏହି ନିୟମକୁ ଲାଗୁ କରାଯାଇ ନ ଥିବା ପିଡ଼ିଙ୍କ ନିକଟରେ ଶୁକ୍ରବାର ଅଭିଯୋଗ ହୋଇଥିଲା। ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା ୧୦ ଲକ୍ଷରୁ ଅଧିକ ଟଙ୍କାର କାର୍ଯ୍ୟକ୍ଷେତ୍ରରେ ଟେଣ୍ଡର୍ ପ୍ରକ୍ରିୟାକୁ ଅନୁସରଣ କରିବା ନିୟମ ରହିଛି । ଏହାକୁ ମଧ୍ୟ ଉଲଂଘନ କରାଯିବା ସହ କୌଣସି ଖବରକାଗଜରେ ବିଜ୍ଞାପନ ମଧ୍ୟ ଦିଆଯାଇ ନ ଥିଲା। ସ୍ଥାନୀୟ ବଜାରରୁ ଲାଇଟ ନ କିଣି ଏକ ନିର୍ଦ୍ଦିଷ୍ଟ ଠିକା ସଂସ୍ଥାରୁ କ୍ରୟ ପାଇଁ ପଞ୍ଚାୟତିରାଜ ବିଭାଗ ପତ୍ର ସଂଖ୍ୟା ୪୨୨୬/୨୫-୨-୧୯ରେ ଜାରି କରିଥିଲେ।
